Jesuspa yachatsikïninkuna
Espïritukunaqa allita o mana allitapis ruramashwanmi
“Manaraq que patsa captinmi” Jesusqa ciëlochö teytanwan kawarqanna (Juan 17:5). Tsëmi qateqnin tapukïkunata yachakunapaq pëlla yanapamäshun.
¿Angelkunaqa rikëkämantsiktsuraq?
▪ Angelkuna noqantsikpaq altanto këkäyanqantam Jesusqa kënö willakurqan: ‘Juc jutsasapa jutsancunata jaqiriptenqa, sielucho Diospa anjelnincunapis allapam cushicuyan’ (Lucas 15:10).
Hina, Teyta Diosta cristiänokuna limpio adorayänampaq angelkuna yanapayanqantapis nirqanmi. Y tsëpaq parlarmi cristiano mayinkunapa concienciankunata mana dañayänampaq qateqninkunata willaparqan, porque “pecunata cuidaq anjelcunam sielucho Dios Yayäpa qaqllanta riquecayan” nirqanmi (Mateo 18:10). Tsënö nirqa, manam cada cristiänopa angel de la guardan kapunqantatsu nikarqan. Antis Diosta sirveq angelkunaqa, rasumpa kaq cristiänokunata yanapayänampaq listo këkäyanqantam nikarqan.
¿Imanöraq Diabluqa mana allita ruramashwan?
▪ Nunakuna Diosta reqiyänanta Satanás mana munanqantam Jesus willakurqan. Kënömi nirqan: “Diospa mandaquinincho cayänanpaq alli willaquita wiyar mana cäyicoq nunacunam, näniman muru pintishqa cuentano cayan. Shonquncunaman alli willaqui chasquiyashqantam diablu pasepa qonqaratsin” (Mateo 13:19).
Huk kutinam, chakranman trigo muroq nunapaq Jesus parlarqan. Tsënömi rikätsikurqan nunakunata Satanás imanö engañanqanta. Murukoq nunaqa kikin Jesusmi, y trïgonam pëwan ciëlopita gobernamoqpaq kaq rasumpa cristiänokuna kayan. Tsë willakïchöqa, huk chikikoqmi “tse murushqa jananman balliguta maqtsicur cuticorqan”. Tsë ballïgu cuentaqa mana alli kaq cristiänokunam kayan y ‘balliguta maqtsicoq caqnam, quiquin diablu’ (Mateo 13:25, 39). Imanömi balligu manaraq poqurqa trïgorikoqlla, tsaq tsënömi mana alli kaq cristiänokunapis rasumpa kaq cristiänorikoq kayan. Pero rasun kaqchöqa mana alli yachatsikïninkunawanmi nunakunata ulipäyan y mana alli kaqta ruratsiyan. Tsënömi Satanasqa mana alli kaq religionwan rurëkan nunakuna Jehoväta mana reqiyänampaq.
¿Imataraq rurashwan Satanaspa makinman mana ishkinapaq?
▪ Juan 14:30 textochömi “mana alli ruraqcunapa mandacoqnin” Satanás kanqanta Jesucristu willakurqan. Y mandakïninman mana ishkinapaq imata ruranapaq kaqtapis yachatsikurqanmi. Qateqninkunapaq yarpararmi Teytanman kënö mañakurqan: “Manam nunacunapita raquicacuriyänanpaqtsu mañacoq, sinoqa llutan rurecunapita wardecunequipaq[mi]. Noqaqa manam que patsa nunacunanotsu cä. Y pecunapis manam que patsa nunacunanotsu cayan. Qamqa rason caqllatam willacunqui. Tseta cäsucur qamllapaqna pecuna cayätsun” (Juan 17:15-17). Tsëmi, Satanaspa imëkanman mana ishkinapaqqa, Diospa Palabrampita yachakunantsik alläpa precisan.
¿Kanan witsanqa angelkuna yanapamantsiktsuraq?
▪ Kë mana alli kawëpa ushëninchö, ‘anjelcuna jutsa sapacunata alli ruraq nunacunapita acrayänampaq’ kaqtam Jesus yachatsikurqan (Mateo 13:49). Y kanan witsanmi kë mana alli kawëpa ushënin hunaqkunachö kawëkantsik, y atska millón nunakunam Diospa Gobiernompita yachatsikïta wiyakïkäyan (Mateo 24:3, 14).
Pero manam llapan Bibliata estudiar qallaqkunatsu Diospa rikënimpaq allita rurëkäyan. Jehoväqa angelninkunawanmi sirveqninkunata yanapëkan nunakunata yachatsiyänampaq y yachakuyanqannö mana ruraqkunapita rasumpa kuyaqninkunata rakinampaq. Diospa rikënimpaq alli këkaq nunakunapaqmi Jesus kënö nirqan: “Allapa alli shonquncunawan alli willaquita wiyarmi, creyicuyan. Tseno carmi, imata sufrirninpis tsaracuyan, y allapa allicunata Diospaq rurayan” (Lucas 8:15).
Más yachakïta munarqa Rasumpëpaqa, ¿imatataq Biblia yachatsikun? libropa 10 kaq capïtulonta leiri. Kë librotaqa Jehoväpa testïgonkunam rurayämushqa.
[9 kaq päginachö dibüju]
Angelkunaqa yanapayanmi Diospita rasumpa yachakï munaq nunakunata