“¿Mëchötaq Diosqa këkarqan?”
“IMËPIS KËNÖMI TAPUKÏKANTSIK: ¿MËCHÖTAQ DIOSQA KËKARQAN?” (Papa Benedicto XVI, Polonia nacionpa Auschwitz nishqanchö campo de concentracionman ëwanqan kuti).
¿Y QAMQA? ¿TSËNÖKU TAPUKURQUNKI IMA DESGRACIALLAPIS PASAKUPTIN? IMA MANA ALLIPAPIS PASASHQA KARKU, ¿DIOS QAMPAQ MANA YARPACHAKUNQANTA PENSARQUNKI?
Estädus Unïduspita Sheila jutiyoq cristiänata religiösu teytankuna wätëkäyaptimpis, kënömi willakun: “Pishi kanqäpitam Diosmanqa creirqö, porqui pëmi Kamamarquntsik. Peru manam amïgütanötsu rikaq kä. Rikarëkämanqantaqa musyaqmi kä, peru noqapaq mana yarpachakunqantam pensarqä. Kuyamarpis noqapaq mana yarpachakunqantam pensaq kä”. ¿Imanirtaq Sheila tsënö pensarqan? Kënömi willakun: “Qatinallamanmi familiätaqa tukïraq pasarqan y Diosqa qonqëkamarquntsikchi nirmi pensayarqä”.
Sheilanö itsa alläpa puëdeq Diosnintsikman creikarpis, qampaq mana yarpachakunqanta pensanki. Tsënöllam alli kaqta ruraq Jobpis pensarqan, puntataqa Diosnintsik alläpa puëdeq y yachaq kanqantam pensarqan (Job 2:3; 9:4). Peru imëka desgracia pasëkuptinmi, kushikïta manana tarinampaq kaqta pensarqan y Diostam kënö nirqan: “¿Imanirtaq rikämëtapis munankitsu? Y ¿enemïguïkitanö rikämanki?” (Job 13:24).
Peru ¿imatataq Biblia yachatsikun? ¿Diostsuraq culpayoq sufrinantsikpaq? ¿Qampaq y llapankunapaqku yarpachakun? ¿Imanöraq musyashwan cada ünupaq yarpachakunqanta, entiendimanqantsikta y imëka problëmapa pasashqa yanapamënintsikta puëdinqanta?
¿Imanötaq Diosnintsik kamanqankuna y Palabranchö ninqan rikätsikun noqantsikpaq pë yarpachakunqanta? Qateqnin kaqkunachömi tsëpita yachakunki (Romänus 1:20). Tsënöpam alläpa puëdeq Kamakoqnintsikta maslla reqinki, y reqirirmi qamta alläpa kuyashunqëkita musyarinki (1 Juan 2:3; 1 Pëdru 5:7).