Yarpakachashun nunakunapaq, shumaq animanaparnin
1 Shumaq yanapakïnintsikmi nunakunata animanqa kushishqa allita rurarnin kayänampaq. Atskaq publicadorkunam rikäyashqa shumaq parlakïnintsikshi animan nunakunata willapakoq ewashqa wiyamänantsikpaq. Tseqa, ¿imanotaq shumaq animarishwan alli willakita willapakoq ewarnin?
2 Listu kashun: Jesucristuqa manam qonqekorqantsu Asia Menorcho qanchis congregacionkunapa alli rurëninkunata (Rev. 2:2, 3, 13, 19; 3:8). Tsenollam hina territoriuntsikcho nunakunapaq yarparashqaqa yanapamashun listu kanapaq, mecho toparnimpis shumaq animaparinapaq. ¿Imataq nintsik huk shumaq jardinta rikarnin, y papanin wambranta shumaq kuyaqta rikarnin o nunakuna kushisqa saludamarnintsik shumaq chaskiramashqa? ¿Kë llapanta rikarnin, tse horaku nunakunata shumaq animaparintsik?
3 Shumaq wiyashun: Willapäkikarnenqa tapurishun nunakunata pekunapis parlakarayämunampaq, y tsetana respetuwan wiyarishun shumaq kayirinapaq (Rom. 12:10). Tsenopam pensayanqanta niramashun y shumaq animarnin yachatsir qallarinapaq.
4 Alli käyishun ima niyanqantapis: ¿Imanöraq kashwan huk nuna Bibliapa contran nimashqa? Tse hora piñashqa nenqantsiknöqa agradesikushwanmi pekuna niyanqanta, “kayirerqomi kë parlekanqantsikkunaman pensanqekita” nishwanmi (Col. 4:6). Huk nuna willapakinintsikpeq pletita munaptenqa, shumaqmi animapärishwan parlekanqantsikpaq masta musyeta munaptenqa. Tseno shumaq parlakinintsikmi yanapanqa pletita munaqkuna wiyaramanantsikpaq (Pro. 25:15).
5 Animakinintsik wakinta yanapanampaqqa shonquntsikpeqmi kanman. Tseno rurarnenqa Jehovatam alabashun y nunakunapis masmi yachakita munayanqa Reinupita willapäkinintsikpeq.