Kutï llapan ichiklla wiyë munaqkunaman
1 Atskaqmi kanan këkantsik Jehovapa kaqcho pï karpis Reinopita wiyë munanqantsikta rikanqampita, y kutimorqan shumaq pacienciawan atska kuti interesnintsikta más winatsinampaq. Tsenomi, noqantsikpis alleq rikänantsik y kutinantsik llapan ichiklla wiyë munaqkunamampis. ‘Discípulo rurananqa’ hina revisitakuna ruranampismi (Mat. 28:19, 20).
2 Wiyë munaqkunata rike: Huk nuna mana publicacionkunata munarnimpis, nenqankuna, imano parlanqan, y kushikïninmi rikätsimashun Reinopita wiyë munanqanta. Tse llapanta rikëkurmi huk revisitata rurarishwan. Huk wawqim visitarqan huk nunata pitsqa semanapa mana ni ima publicacionta haqipurnin. Hoqta kaq visitachonam kë nuna chaskerqan huk publicacionta y tiempuwannam qallarqan huk estudio biblicota.
3 Ichikllapis wiyeta munaptenqa, raslla kutï, ama unëtaraqqa. Ama haqitsu shonquncho muronqekita Diablo qochinanta (Mat. 13:19). Ama qonqetsu huk día kutinëkipaq nishqa karqa (Mat. 5:37).
4 Callekunacho willapäkurnin: Reinopita wiyë munaq nunakunata callekunacho o mecho karpis tarirnin, ¿yanapankiku más yachakuyänampaq? Parlar usharirninmi keno ninkiman: “Gustamashqam parlarinqantsik. ¿Mechotaq tareqman yape parlarinapaq?”. Alli kaptenqa wakin publicadorkuna tse interesaq nunatam niyan telefonompa numeronta, y munaptenqa tapun tse nunapa telefonompa numerontapis. Nunakuna tsellacho willapäkikaqta rikäshurnikiqa, más facilmi telefonompa numeronta willashunki o mecho täranqantapis nishunki. Pero tseta mana willashuptikipis, yape callecho tarirnenqa parlapärinkimanmi más interesanampaq.
5 Kushikuntsikmi planta cuidanqantsik y reganqantsik shumaq wetäreqta rikarnin, ¿manaku tseno? Atska kushikitam tarishun y allim sientekushun revisitakunata rurarnin y wakin nunakunata espiritualmente winayänampaq yanaparnin (1 Cor. 3:6). Tsemi, llapan ichiklla wiye munaqkunaman imëkanopis kutineki.