Jehovaqa bendecinmi yanapakï munaqkunata
1. ¿Imanötaq rikätsiyarqan Davidwan Nehemías yanapakita munayanqanta?
1 Goliat Israelitakunapita burlakïkaptenqa, meqan soldadollapis peleaq yarqunmanchi karqan. Pero huk mitsikoq mana peleeta yachaq jovenllam änikorqan peleanampaq (1 Sam. 17:32). Israelitakuna esclavo kënimpita Jerusalenman kutiyanqancho perqanllatapis mana rurayaptinmi, Persia markacho reypa uryaqnin listo karqan tse shumaq palaciocho uryakïninta haqirïkur, Jerusalenman ewanampaq alistapakoq uryayänampaq (Neh. 2:5). Davidta y Nehemiastam Jehová bendecirqan yanapakita munar listo kayanqampita (1 Sam. 17:45, 50; Neh. 6:15, 16).
2. ¿Imanirtaq huk cristiano yanapakoq nuna kanman?
2 Kë “ushanan tiempokunachoqa” manam yanapakitaqa munayannatsu: nunakuna allapa ocupadom kawayan, “kikinkunallatam kuyakuyan” (2 Tim. 3:1, 2). Pï karpis facil-llam pasepa ocupado tikrarinman kikimpa rurëninkunallacho, tsemi wakinkuna yanapakita necesitayanqantapis mäkuyantsu. Pero cristianokunaqa Jesusno ketam munantsik, pëqa yanapaqmi nunakunata (Juan 5:5-9; 13:12-15; 1 Ped. 2:21). ¿Imanötaq rikätsikuntsik yanapaki munanqantsikta, y ima bendicionkunatataq apamun?
3. Imepis listo yanapakunapaq karnenqa, ¿imanötaq congregacionta yanapashun?
3 Wawqintsikkunarekur: Wakinkunata yanapantsik “espiritual qarëkunawan” reunionkunacho comentarninmi (Rom. 1:11). Comentanqantsikkunaqa Jehovatam honran, y razonpa kaqtam peqantsikman y shonquntsikman churan y masmi miratsin kushikïnintsikta reunionkunacho (Sal. 26:12). Hinamampis, Escuela del Ministerio Teocraticocho discursaq mana chämuptenqa, noqantsikpis rurarishwanmi, tseta rurashqaqa kikintsikpis allim yachakushun shumaq willapäkita.
4. ¿Imanötaq más yanapakita munanqantsikta rikätsikushwan?
4 Ollqukunaqa yanapakita munayanqanta rikätsikuyanmanmi, kallpachakurnin congregacioncho más yanapakuyänampaq (Isa. 32:2; 1 Tim. 3:1). Hatun o ichik asambleantsik shumaq kanampaqqa, llapantsikmi änikushwan tukilaya uryëkunapaq. Voluntadwan superintendente circuitowan shumaq willapäkur uryashqam, o mikïnin qarashqam ‘llapantsik animanakuntsik’ (Rom. 1:12). Qeshyaqkunata, viudakunata, pishi wambrayoq mamakunata, mana papäyoq mamäyoq wambrakunata yanapashqaqa, kushishqam kashun y Jehovapa kuyakïnintam chaskishun (Pro. 19:17; Hech. 20:35).
5. ¿Imakunapaqtaq más necesitayan yanapaki munaq wawqikunata?
5 Yanapakushwanmi hina, tiempontsikta y kallpantsikta inshirnin Ellukäna Wayita limpiarnin y altsapakurnin. Hinamampis, kayanmi más atskaq nunakuna razonpa kaqpita yachakïkaqkuna y tsemi pishin más Ellukäna Wayikuna y tseta rurayänampaqqa uryaq wawqikunapis pishinmi. Huk matrimoniom ofrecikorqan Grupo de Construcción de Salones del Reino nishqancho yanapakuyänampaq; wayi rurëcho meqampis mana ni imata yachëkarnin. Yachatsiyarqanmi y kananqa yanapakuyan ladrillokunawan perqëchomi. Tsenopam pëkuna más alli reqinakuyashqa wakin wawqikunawan panikunawampis junto junto uryarnin. Warmi kaqmi keno nin: “Huk hunaq ushariptinmi utishqa ushariyä, pero espiritualmenteqa atska kallpayoqmi”.
6. ¿Imanirtaq willapäkonqantsik allapa preciso imëka ruranqantsikpitapis?
6 Willapäkurnin: Kananmi más preciso Reinopita willapäkurnin yanapakunantsik. Pitapis Bibliapa consejonkunata kayinampaq y kaweninmam cuentaman churanampaq yanapashqam, tse nuna kallpata tarin mana allikunata haqinampaq, hina yachakunmi, shumaq kawaki shamoq tiempopaqwan. Bibliapita yachatsikorqa, voluntadwan uryetam rurëkantsik y tseqa mana ushakaq bendicionkunatam apamonqa (Juan 17:3; 1 Tim. 4:16). Wakinkunaqa itsa rikäyan más willapäkita puedeyanqanta precursor auxiliar o regularno, huk idiomata yachakurnin o huk markakunacho willapäkoq pisheqkunaman ewarnimpis.
7. ¿Imanirtaq allapa preciso kanan yanapakunantsik?
7 Rey Davidmi nerqan, kë Mesías gobernamur qallëkuptenqa, Diospa markanqa “alli munëwanmi änikuyanqa” willapäkuyanampaq (Sal. 110:3, nota). Jehovami raslla chëkatsimun espiritual cosechata, tsemi atska trabajo kan kikintsik voluntadwan ofrecikunapaq (Isa. 60:22). ¿Qam ninkiku: “¡Kechomi keqa noqa! Noqa ewashaq”? (Isa. 6:8.) Imëkachopis yanapakushqaqa, Jehovatam kushitsishun y bendicionkunatam chaskishun.