Nunakunata wayinkunacho mana tarirnin
1. ¿Ima problëmakunatatan tarintsik, wayin wayin alli willakïkunata willapäkur?
1 Atska markakunachö mananam tarintsiknatsu nunakunata wayinkunacho. Kë “sasa tiempokunachöqa” atska horam nunakuna uryayan kawayänanllapaq (2 Tim. 3:1). Wakinkunaqa, qellëninkunata gastar y pukllakurmi wayinkunacho täräyantsu. ¿Imanötaq chätsishwan alli willakïkunata kë nunakunaman?
2. ¿Imataraq rurashwan, wayinkunacho nunakunata mana tarirnenqa?
2 Apë huk alli registrota: Mana wayinkunacho tarirnenqa puntatam qellqanki kë registroman wayinkunapa direccionninta. Këqa alläpa importantem, territoriota raslla willapäkur ushayaptikeqa. ¿Qellqankiku cällepa shutinta, territoriopa numeronta, fechata y shutikita? Espaciota haqinki, qam o huk publicador qellqayänëkipaq, wayinkunacho mana tarinqëkita visitarnin. Willapäkur usharirnin, mana qonqashpa qoykunki kë registrota territoriopa tarjetan katseq wawqita, kikiki visitarnenqa quedakï registrowan. Inshi registrota, yachakï munaq nunapa shutinta y mëcho täranqantapis qellqanëkipaq, tsënöpa yapë visitanëkipaq.
3. ¿Imakunatash rurashwan, mana wayicho tarinqantsik nunakunaman alli willakï chänampaq?
3 Ama kutitsu tsë horallaqa: Mana wayicho tarinqëkikunataqa tarinkiman paqaspa o ushanan semanachömi. ¿Wayinkunacho nunakunata tarinëkipaq, puedenkimanku huk horacho kutita? (1 Cor. 10:24.) Mana tsëta rurarqa hina huk publicadortam qoykunkiman kë registrota, huk alli horacho visitanampaq. Kë nunakunaman cartakïtapis puedenkim, tsëqa, qeshyapäkurnin wayin wayin willapäkoq mana yarqita puedeqkunapis, kushishqam yanapayäshunkiman.
4. ¿Imataq yachatsimantsik nunakunata wayinkunacho mana tarirnimpis ashïkänapaq?
4 Rikäshun huk ejemplota, y këmi yachatsimäshun imanir alli kanqanta wayinkunacho nunakunata mana tarirnimpis ashinapaq. Huk wayita atska kuti visitarnin, kima watachöraq publicadorkuna parlayänaq wayiyoqwan. Tsë warmiqa puntata estudiashqanash kanaq Bibliata manaraq tsë tärëkanqan wayiman shamurnin, kanannash shuyarëkänaq Jehovapa Testigonkunata, yapë yachakunampaq.
5. ¿Imëtan huk territoriota usharerqontsikmi willapäkur nishwan?
5 Llapan territoriota ushë willapäkurnin: ¿Imëtan usharerqontsik llapan territoriotam nishwan? Llapan wayikunacho hukllaqllawampis parlanapaq kallpachakushqa karmi. Wayinkunacho mana tarirnenqa, allim kanman nunakuna mana rikäyänanman tratadota y punta kaq revistakunata haqishwan, y tsënöllam rurashwan mana alläpa chanqantsik territoriokunachöpis. Huk territoriotaqa ushashwan chusku killallachömi. Tsëpitaqa qonëki territoriopita encargakoq wawqitam, registrota llenanampaq.
6. ¿Imanir-raq territoriontsikcho llapan nunakunawan parlashwan alli willakïkunapita?
6 Atska nunakuna Jehovapa shutincho mañakita yachakuyänantam munantsik, tsënöpa salvacionta chaskiyänampaq (Rom. 10:13, 14). Këqa wayin wayin willapäkoq ewarnin, nunakunata mana tarinqantsikpaqwanmi. Qampis, Pablonö “Diospa ankupäkinimpita alli willakïkunata llapanta willanki” (Hech. 20:24).