Jehovata adoraq familiakuna
1 Unë tiempochö Diosta kuyaq familiakunaqa, llapanmi rurayaq wayicho rurëpaq kaqta y wakin rurayänantapis. Tsë rurëkunapitapis, Jehovatam llapan adorayaq (Lev. 10:12-14; Deu. 31:12). Kanan witsanqa familiakunachö llapanmi munayanqanta imatapis rurakuyan. Tsënö kayaptimpis, cristianokunaqa käyintsikmi familiachö junto imatapis ruranantsikta y puntachöqa kanman Diosta servikïmi. Tsëqa, familia Kamaq Diosnintsik alläpam kushikonqa teyta mamakuna wambrankunawan adorayaptin.
2 Familiawan willapäkushun. Alli noticiapita willapäkïqa, familiakunatam yanapanqa shumaq kawakuyänampaq. Tsëmi ancianokuna publicadorkunawan willapäkïman yarqurpis, warminkunawan y wambrankunawampis willapäkuyänanmi (1 Tim. 3:4, 5). Hina superintendente de circuitokunapis alli arreglota rurayanmi warminkunawan willapäkuyänampaq.
3 Teyta mamankuna wambrakunawan willapäkïman yarqorqa, alli willapäkoq këtam yachakuyanqa. Teytankuna kushishqa këkäyanqanllatatsu manam rikäyan, hina Jehovata y nunakunata alläpa kuyayanqantawanmi rikäyan (Deu. 6:5-7). Këqa rasumpam, hina wambrakuna winayaptimpis. Huk casadopam 15 y 21 watayoqno kima ollqu wambrankuna kan, y pëkunawanmi imëpis yarqïkäyan willapäkoq. Teytanmi kënö nin: “Imatapis pëkunata yachatsiyämi. Kushishqa kayänampaqmi kallpachakuyä”.
4 Llapantsik yachakushun. Atskaq wawqi panikunam willapäkïman manaraq yarqurnin familiankunawan yachakuyan. Wambrakunaqa kushiyanmi familiachö kikimpura willapäkipaq puntata yachakurnin, publicadornö karnin o wayiyoqnö karnin. Wakinkunanam estudio de familia nishqanta usharirnin yachakuyan willapäkïpaq.
5 Kushikïnintsikqa miran familiantsikwan willapäkïman imëpis alli yarqushqam. Manam këpita más alleqa ni imapis kantsu, familiantsikwan wayin wayin alli noticiapita willapäkunqantsiknö, wiyakï munaqkunaman kutinqantsiknö, y Bibliapita yachatsikonqantsiknöqa. Familiantsikwan Jehovata adorarqa kushishqam kënö nishun: “Noqawan wayïcho kaqkunaqa, llapäkunam Jehovata serviyäshaq” (Jos. 24:15).