Yachakuyänampaqnölla yachatsikushun
1. ¿Imataq alläpa precisan alli yachatsikoq kanapaq?
1 Alli yachatsikoq kanapaqqa, nunakuna yachakuyänampaqnölla yachatsikunantsikmi alläpa precisan. Alli Yachatsikoq Jesusqa shumaqmi yachatsikorqan. Tsëmi shumaq ‘willapäquita’ munarqa pë ruranqankunapita yachakunantsik (2 Tim. 4:2; Juan 13:13).
2. ¿Imanötaq yachatsikushwan, y tsënö yachatsikorqa imatataq horquntsik?
2 Yachakuyänampaqnö parlë: Imanö kawanapaqpis alli yachatsikïkunataqa tarintsik huk hirkachö këkar Jesus yachatsikonqanchömi, y imëkakunatam shumaq yachakuyänampaqnölla parlarqan (Mat., caps. 5-7). Jesusta wiyaqkunaqa “allapa espantacur[mi] mantsacäcuyarqan tse yachatsiquininpita”, y tsarita munar ëwaq soldädokunapis “manam pipis tse nuna parlanqannöqa parlantsu” nirmi haqiriyarqan (Mat. 7:28, 29; Juan 7:46). Këchö rikanqantsiknöpis, rasumpa kaqta yachatsikunapaqqa manam alli palabrakunata ashïkur o mana musyë igualatsikïwanraqtsu yachatsikunantsik, rasumpa kaqtaqa musyatsikushwan pï mëpis parlayanqan palabrakunallawanmi.
3. ¿Imanirtaq wakinkunaqa atskata yachatsikuyan? ¿Imataq yanapamäshun tsëta mana ruranapaq?
3 ¿Atskatatsuraq yachatsikushwan? Atskata o wallkata yachatsikunampaqpis Jesusqa wiyaqninkunamanraqmi puntata pensarqan (Juan 16:12). Tsënöllam noqantsikpis wiyaqkunaman pensanantsik y wanayanqanmannölla yachatsinantsik; këkunataqa más yarpänantsik kastantsikkunata, wiyakïta munaqkunata o wambrakunata parlaparmi. Shumaq wiyakïkaqnö kayaptimpis manam atskatatsu yachatsishwan. Hinamampis, Jehová Diosta alli reqita munarqa imëpis yachakïkäyanqam (Juan 17:3; 1 Cor. 3:6).
4. ¿Imanirtaq precisaq kaqllata yachatsikunantsik?
4 Precisaq yachatsikïkuna: Jesusqa manam atskata yachatsikurtsu nunakunata pantatseq. Tsënö yachatsikonqanta rikärishun: ‘Wanushqacuna cawariyämunampaq’ parlarpis, mëman kawariyämunampaq kaqta manam yachatsikorqanraqtsu (Juan 5:28, 29). Tsënöllam noqantsikpis estudio biblicota qokurnin precisaq kaqllata yachatsikunantsik, estudianqantsik publicacionchö këkaqpita mastaqa mananam yachatsikunantsiknatsu.
5. ¿Imarëkurtaq shumaq yachatsikunantsik?
5 ¡Imanömi kushikuntsik llapan wananqantsikta Jehová shumaq yachatsimanqantsikpita! (Mat. 11:25.) Kananqa noqantsiknam tsënö yachatsikunantsik, y tsëqa kushikïpaqmi yachatsikïnintsikchö masta rurashun.