Yachatsikïnintsikta más alliyätsinapaq kima yanapakïkuna
1. ¿Imanirtaq yachatsikïnintsikta más alliyätsinantsik?
1 Diospita alli willakïta yachatsikoqkunaqa llapampis maestrom kayan. Wayin wayin yachatsikur, yachakïta munaqkunaman kutir o estudio biblicota qoykarpis, alläpa precisaq yachatsikïta nunakuna o runakuna musyayänantam munantsik. “Diospa palabranta” alli yachatsirninqa ‘salbacuyanampaqmi’ yanapëkäshun (2 Tim. 3:15). Tsëqa ¡imanö kushikïpaqmi! ¿Manaku más alli yachatsikunapaq këqa yanapamantsik? Kima o kimsa yanapakïkunata rikärishun.
2. ¿Imanötaq yachakuyänampaqnölla yachatsikushwan?
2 Yachakuyänampaqnölla yachatsishun. Yachanqantsikkunapita wakinkunata parlaparqa quizá qonqarishwan pëkunaqa tsëta mana musyayanqanta y entiendeyänan sasaraq o ajarag kanqanta. Tsëmi estudio biblicota qorninqa atska yachatsikïwan nitipakätsishwantsu. Antis precisaq kaqllatam parlapashwan. Alli yachatsikunapaqqa manam atskataraqtsu parlanantsik precisan (Pro. 10:19). Jina manam llapan textokunatatsu leinantsik, antis precisaq kaqllatam. Y textota leirapurninqa, yachëkätsinqantsikllapitam parlapärinantsik. Yarpäshun sasa o aja kaqkunata Jesus Jirkapita Yachatsikunqanta (Mat., caps. 5-7). Pëqa alläpa mana parlarninllam wiyaqninkuna yachakuyänampaqnölla parlaparqan.
3. ¿Imanirtaq igualatsikïwan yachatsikïqa alli y mëqan igualatsikïtaq más alliqa kanman?
3 Igualatsikïkunawan yachatsikushun. Igualatsikïkunawan yachatsikïkunaqa yanapakun yachakunqantsikkunata cuentata qokunapaq y mana qonqanapaqmi. Tsëkunawan alli yachatsikunapaqqa manam alli parlaqraqtsu kanantsik. Jesusqa imatapis igualatseq reqiyanqan kaqwanmi y wallkallachömi (Mat. 7:3-5; 18:2-4). Jina dibüjokunapis yanapamashwanmi más alli yachatsikunapaq. Puntallapitana preparakurqa quizá más igualatsikïkunamampis yarpärishwan.
4. ¿Imanötaq tapukïkunata shumaq rurashwan?
4 Tapukïkunata shumaq rurashun. Tapukïkunaqa Bibliata estudiëkaqta yanapan yachakunqanman pensanampaqmi. Tsëmi tapurirqa, pacienciawan shuyaränantsik contestamunanta. Kikintsiklla ras contestarqa manam musyashuntsu yachakïkanqanta o mana yachakïkanqantapis. Pero ¿imataraq rurashwan mana rasun kaqta contestamuptinqa? Manam rasllaqa mana allita kanqanta nirishwantsu, antis juk tapukïkunata rurarmi shumaq yacharatsishwan (Mat. 17:24-27). Pero musyantsikmi llapantaqa mana yachanqantsikta. Tsëmi Bibliapis nimantsik imanö yachatsikïkanqantsikta alli rikänapaq, tsëmi yanapanqa wiyamaqnintsikunatapis (1 Tim. 4:16).