Ishkë hunaq asambleaqa yanapamantsik Diospa kaqchö alli kanapaqmi
1. ¿Imawantaq Jehová yanapamantsik alli noticiata llapan nunakunaman chätsinapaq?
1 Jehoväqa kuyakurmi nunakunam alli noticiata chätsinapaq kallpata qomantsik, y imanö ruranapaqpis willamantsik y yachatsimantsik (Mat. 24:14; 2 Tim. 4:17). Tsë yanapakïkunataqa cada wata chaskintsik ishkë hunaq asambleachömi. Y 2010 watachö ishkë hunaq asambleachöqa yachakushun Diospa kaqchö alli këkanqantsikta mana oqranapaqmi. Kë yachatsikïkunaqa kanqa Romanos 8:5 y Judas 17 a 19 textokunapitam, y 31 de agosto semänachömi qallanqa.
2. a) ¿Imakunachöraq yanapamäshun ishkë hunaq asambleantsik? b) ¿Imanötaq yanapashorqonki yachatsikunëkipaq ishkë hunaq punta asambleakuna?
2 Imachöraq yanapamäshun: Kë asambleaqa yanapamäshun mana alliman ima ishkitsikonqantapis reqinapaqmi, Diospa kaqpaq tiempo churanqantsikta oqratsimaqnintsik rurëkunam hukqa kanman. Hina yachakushunmi imëka mana alli rurëkunata mana rikaräkunapaq y Diospa kaqchö alli kë imanö kanqanta musyanapaqpis. Y domingochönam atskaman rakishqa discurso kanqa, tsëchömi yachakushun, kikintsik o familiantsikwan sasa tiempokunachö kar y tukïta pasar Diospa kaqchö imanö tsarakunapaqpis. Tsë asambleachö llapan yachakonqantsikqa yanapamäshun mana allikunapita shonquntsikta tsapänapaq, Diospa kaqchö alli kanapaq, y Diospa kaqchö alli këkaqkunata ima bendicionkuna shuyaranqantapis yarpänapaqmi.
3. ¿Imëraq kanqa ishkë hunaq asamblea, y imatataq rurëkänantsikna?
3 Ishkë hunaq asamblea imë y mëchö kanantapis musyarerqa, ishkan hunaq tsëchö kanëkipaq alistakï, y yarpëkëllana yachatsikayämonqanta shumaq wiyakunëkipaq. Ama qonqëtsu, Jehoväqa bendecimonqam tsëchö kanëkirëkur llapan ruranqëkita (Pro. 21:5).
4. ¿Imataraq chaskishun shamoq asambleantsikchö?
4 Musyënam, Jehovämi kë hatun qarëtaqa qomantsik. Mäkoq mäkoq cumplido sirveqnin alistanqan asambleaqa yanapamäshun imëpis alli yachatsikunapaqmi. Yachatsikïnintsikchö ‘alli firmi tsaracunapaq, y “¿cumplenqatsuraq o manatsuraq?” nir mana cacunapaq’ tukïnöpa yanapamanqantsikpita gracias nikushun Jehoväta (Heb. 10:23-25; Sant. 1:17).