2010 watapaq huk hunaqlla kaq asamblea
1. a) ¿Imakunapitataq pasaq huk hunaqlla kaq asambleakunachö yachakorqantsik? b) ¿Yachatsikunëkipaq yanapashorqonkiku pasaq asambleakunachö wiyakonqëki?
1 “Alläpa ocupado kashun willapäkïchö”, “Noqantsikmi mitu kantsik y Jehovänam Mituwan Uryaq”, “Diospa yachatsikïninta cumplïta tïrë” (Hech. 18:5; Isa. 64:8; Col. 4:17). Kë tëmakunapitam pasaq huk hunaqlla kaq asambleakunachö yachatsikayämorqan. Y 2010 watapaq huk hunaqlla kaq asambleapis chäramonqanam. ‘Key tyempu ushakänampaqqa ichikllanam pishin’ neqmi tëman kanqa, 1 Corintios 7:29, QKW textopita. ¿Manaku kë asamblea chämunanta kushishqa shuyarëkantsik?
2. ¿Imataraq rurashwan huk hunaqlla kaq asambleata kushishqa shuyarëkänapaq?
2 Huk hunaqlla kaq asamblea imë kanqantapis congregacionchö willakarayämuptinlla, familiëkita parlapärëkë shumaq kanampaq kaqta, tsënöpa ëwëta munarllana këkäyänëkipaq. Tsërëkurmi, wakin teytakunaqa imë kanantapis calendarioman qellqayan, tsë asambleapaq imata wanayanqanta listaman churayan y ëka hunaq pishenqantapis yuparllana këkäyan. Hina familiachö Diosta adorana hunaqchöpis yarpäriyankimanmi, pasaq huk hunaqlla kaq asambleachö qellqayanqëkipita. Hinamampis Benefíciese libropa 13 a 16 päginanchö yachatsikonqanmi, ‘wiyacurnin alli cäyicuyänëquipaq’ yanapayäshunki (Luc. 8:18).
3. ¿Imataraq rurashwan asambleachö wiyakonqantsikta mana qonqëkunapaq?
3 Yachakonqantsiknöllam ruranantsik: Asamblea ushariptenqa pï mëtam wiyantsik “¡yachatsikayämonqanqa alläpa allim këkushqa!” neqta. Awmi, Jehoväpa bendicionnin karmi, asambleaqa imëpis yanapamantsik (Pro. 10:22). Pero yachakonqantsik yanapamänapaqqa, wiyakonqantsikmanmi yarpachakunantsik y manam qonqanantsiktsu (Luc. 8:15). ¿Imanirtaq wayikiman cärrochö kutirnin familiëkiwan o ëwëkäyanqëki kaqkunawan shumaq parlariyankitsu? Diospa kaqchö masta rurayänëkipaq y alli yachatsikuyänëkipaq yanapayäshonqëkita parlariyë. Tsëqa llapan yachakuyanqëkikunata manam qonqëkuyankitsu (Sant. 1:25).
4. ¿Imanirtaq alläpa shumaq kanqa shamoq huk hunaqlla asambleantsik?
4 Alli qarëta chaskerqa alläpam kushikuntsik, wanëkanqantsikta qarëkamashqanäqa masran kushikïkuntsik. Tsëmi shamoq huk hunaqlla kaq asambleachö Jehová qaramänantsikpaq kaqta alläpa kushishqa shuyarantsik. Tsëchö wiyakonqantsik imëkachö yanapamänapaq kaqtam musyantsik. Wanëkanqantsikmannömi Teytantsik Jehoväqa, kushi kushi purinapaq kallpata qomäshun y mandamanqantsiknö yachatsikunapaq yachatsimäshun (2 Tim. 4:2; Sant. 1:17).