Diospa Palabranqa alläpa poderyoqmi

1. ¿Imataq tïtulun kanqa 2014 sirwina wata juk junaq kaq asamblëapa?

¹ Nunakuna imëkata rurayanqankunaqa manam Bibliapa poderninwan igualantsu. ¿Imanir? Porqui Bibliallam pensënintsikkunata cambiëta puëdin Dios munanqannö imatapis ruranapaq. Peru ¿Diospa Palabranqa alläpa poderyoqku? ¿Imanötaq alli provechashwan? ¿Imanötaq wakinkunata yanapanarëkur mas alli utilisashwan? Kë tapukïkunapa respuestantaqa yachakushun 2014 sirwina wata juk junaq kaq asamblëachömi. Kë asamblëapa tïtulunqa “Diospa Palabranqa alläpa poderyoqmi” ninmi, y jorqakämushqa Hebrëus 4:12 textupitam.

2. ¿Ima tapukïkunapitataq yachatsikayämunqa?

² Precisaq tapukïkuna. Yachatsikayämunqanta wiyarnin qateqnin kaq tapukïkunapa respuestanta qellqë.

• ¿Imanirtaq Jehoväpa Palabranman markäkushwan (yärakushwan)? (Sal. 29:4.)

• ¿Imanötaq kawënintsikchö Diospa Palabran poderyoq kanqanta musyashwan? (Sal. 34:8.)

• ¿Imanötaq yachatsikunqantsikchö alli provechashwan Diospa Palabrampa yanapakïninta? (2 Tim. 3:16, 17.)

• ¿Imanötaq Satanaspa engäñunkunaman ishkïpita cuidakushwan? (1 Juan 5:19.)

• Jövin, ¿imaraq yanapashunki Diosta sirwinqëkichö ruranqëkikuna imëpis allilla yarqupushunëkipaq? (Jer. 17:7.)

• ¿Imaraq kallpannaq këkashqapis mas alli kallpayoqta tikratsimäshun? (2 Cor. 12:10.)

• ¿Imanötaq imëpis kallpachakur sïguikashwan mana alli costumbrintsikkunata y pensënintsikkunata jaqinapaq, y tsënöpa alli cristiänu tikranapaq? (Efes. 4:23.)

3. Yachatsikayämunqanta wiyakurnimpis, ¿imakunata rurartaq mas kushikïta tarishwan?

³ Kë asamblëachö yachatsikayämunqankunata wiyakushqaqa atska yanapakïkunatam tarishun. Kë asamblëachöqa, ishkë junaq kaq y jatun kaq asamblëachönöllam juk congregacionpita cristiänu mayintsikkunawan reqinakushun y shumaq pasarishun (Sal. 133:1-3; 2 Cor. 6:11-13). Tsëmi, unë kaq y mushoq kaq amïguntsikkunawan parlanapaq tiemputa rakinantsik. Congregacionkunata y watukakoqkunata rikaq o betelpita visitakoq discursante shamuptinqa, allim kanman pëman y warminman witirir saludarinqantsikqa. Tsëkuna y maskunarëkurmi alläpa kushishqa juk junaq kaq asamblëata shuyäkïkantsik.