Diospa Palabranqa allim yachatsikunapaq
1. ¿Imataq tïtulun kanqa 2014 sirwina wata ishkë junaq kaq asamblëapa y ima tapukïpa respuestantataq yachakushun?
1 Jehovämi llapampitapis ‘Alläpa Alli Yachatsimaqnintsikqa’ (Is. 30:20, 21). Pëmi yachatsimantsik mas precisaq kaq libruwan: Palabran Bibliawan. ¿Imanötaq yachatsikïninkuna yanapamashwan cuerpuntsik cuidëchö, pensënintsikchö, imanö sientikunqantsikchö y Diospa kaqchö? Kë tapukïpa respuestantaqa yachakushun 2014 sirwina wata ishkë junaq kaq asamblëachömi, kë asamblëapa tïtulunqa “Diospa Palabranqa allim yachatsikunapaq” ninmi, y jorqakämushqa 2 Timoteu 3:16 textupitam.
2. ¿Ima tapukïkunataq yanapamäshun asamblëapa precisaq yachatsikïninkunata musyanapaq?
2 Asamblëapa precisaq yachatsikïninkuna. Qateqnin kaq tapukïkunam yanapamäshun precisaq yachatsikïninkunata musyanapaq:
• ¿Imanötaq Diospa yachatsikïnin kawënintsikchö yanapamantsik? (Is. 48:17, 18.)
• Llapan tiempuntsikwan Jehoväta sirwinarëkur imatapis alli patsätsirninqa, ¿imapitataq següru këkashwan? (Mal. 3:10.)
• ¿Imanötaq chaskishwan “jucläya mana alli yachatsicuycunata”? (Heb. 13:9, NTCN.)
• ¿Imanötaq qatishwan Jesus imanö ‘yachatsicunqanta’? (Mat. 7:28, 29.)
• Congregacionchö yachatsikoqkunaqa, ¿imanirtaq puntata kikinkunaraq yachakuyanman? (Rom. 2:21.)
• ¿Imapaqtaq alli Diospa Palabran? (2 Tim. 3:16.)
• Nacionkunata Dios ‘cerniptinqa’, ¿imaraq nunakunata pasanqa? (Ageu 2:6, 7.)
• ¿Imanötaq Jehovä noqantsikman markäkamun (yärakamun)? (Efes. 5:1)
• ¿Imanirtaq kallpachakushwan Jehoväpa yachatsikïninchö imëpis këkänapaq? (Lüc. 13:24.)
3. ¿Imanirtaq alläpa precisan kë asamblëachö llapan yachatsikayämunqanta shumaq wiyakunantsik?
3 Kë asamblëapa tïtulumpaq jorqakämushqa textupa qepan kaq versïculukunachömi, rikätsikun ushanan junaqkuna imanö kanampaq kaqta. Tsë tiempukunapaq parlarmi Pablu kënö nir qellqarqan: “Mana alli ruraqcunaran y engañacoqcunaran mas peor mana allimanqa ishquiyanqa, quiquincunapis engañadu carnin” (2 Tim. 3:13). Engañashqa këta mana munarqa, alläpam precisan Diosta wiyakunantsik y yachatsimanqantsiknölla ruranantsik. Tsëmi, llapan puëdinqantsikta rurashun llapan yachatsikayämunqanta shumaq wiyakunapaq.