Diospa munëninta nunakuna rurayätsun
1. ¿Imataq 2011 wata septiembre killachö qallaq huk hunaq kaq asambleapa tëman, y imanirtaq alläpa precisan tsë tëmapita yachakunantsik?
1 Munënimpitam Jehoväqa nunakunata kamamarqantsik (Apo. 4:11). Tsëmi shumaq y kushishqa kawakunapaqqa, Jehoväpa ima munënin kanqanta yachakunantsik y pë munanqanta ruranantsik. Tsëta ruranan manam fäciltsu, antis sasaran, musyanqantsiknöpis, “quiquintsic pensashqantsicno etsantsiccunapa mana alli munenincunata” o ‘Diosta mana cäsucoq nunacuna’ rurayanqanta mana ruranapaqmi sinchi kallpachakunantsik (Efe. 2:3; 1 Ped. 4:3; 2 Ped. 2:10). Jehová mana yanapamashqaqa, rasllam ishkirishwan “diablupa munenincho” kawakïman (2 Tim. 2:26). Tsëmi 2011 wata septiembre killachö qallaq huk hunaq kaq asambleaqa yanapamäshun, padrenuestrochö kima kaq mañakï ninqanta ruranapaq (Mat. 6:9, 10). Y tëmanqa, “Diospa munëninta nunakuna rurayätsun” ninqam.
2. ¿Ima tapukïkunapa respuestantataq yachakushun huk hunaq kaq asambleachö?
2 ¿Ima tapukïkunatataq contestayämunqa? Asamblea hunaq shumaq wiyakï kë tapukïkunapa respuestankunata yachatsikayämuptin: Diospa Palabranta wiyakurnin, ¿ima masta ruranantsiktaq precisan? ¿Imanötaq Diospa voluntadninta imëpis käyikïta o mayayta tïrashwan? ¿Imanirtaq tukïläya nunakunata yanapanapaq listo këkashwan? ¿Imatataq rurashwan shumaq y alli kawakunapaq? Jövenkuna, ¿imatataq Jehoväta rikätsiyänëki? ¿Ima bendicionkunatataq chaskintsik Jehoväpa munëninta ruranqantsikpita? ¿Imanirtaq alläpa precisan cristiano mayintsikkunata kallpata y valorta qonantsik?
3. ¿Imanötaq alli provechashwan huk hunaq kaq asambleata?
3 Llapan puëdenqëkita rurë asambleaman ëwanëkipaq y yachatsikayämunqanta wiyanëkipaq. Itsa invitayämunqan discursanteqa Betel wayipita wawqi o watukakoq superintendente kanqa. Tsëmi asamblea manaraq qallaptin o ushariptimpis, pëwan o casado kaptinqa warminwan shumaq parlakuriyänëkipaq niriyaq. Wiyakuyanqëkita mana qonqariyänëkipaqqa, wayikikunaman chärir familiëkiwan parlariyë tsë hunaq yachakuyanqëkikunata (Sant. 1:25). Llapëki parlakuriyë Diospa voluntadninta alli rurayänëkipaq imakunachö más kallpachakuyänëkipaq kaqta.
4. ¿Imanirtaq alläpa precisan Jehoväpa kaqta kawënintsikchö puntaman churanantsik?
4 Diospa munëninta rurëta mana munar, kikinkunapa munëninkunallata rurakoq nunakunata Jehová ushakätsimunampaqqa ichikllanam pishin (1 Juan 2:17). Tsëmi, ¡Jehoväta alläpa agradecikuntsik tsë shumaq yachatsikïkunata alistamunqampita! Tsë yachatsikïkunam yanapamäshun Jehoväpa munëninta kawënintsikchö imëpis puntaman churanapaq.