¿Listoku këkantsik mëchö tsëchöpis yachatsikunapaq?
1. Unë cristiänokuna mëchö tsëchöpis yachatsikuyanqanta willakarayämi.
1 Mëchö tsëchöpis Diospita yachatsikonqantsikqa allipaqmi kanqa. Tsënö yachatsikï alli kanqantam Bibliapis willakun (Juan 4:7-15). ¿Imataraq rurashwan mëchö tsëchöpis yachatsikunapaq?
2. Alli vestikonqantsik y altsakonqantsik, ¿imanötaq pillatapis Diospita yacharatsinapaq yanapamashwan?
2 Vestikonqantsik y altsakonqantsik: Vestikonqantsik mana allinö kaptenqa, itsa mëchö tsëchöpis yachatsikïta penqakushun, pero imëpis cristiänonö vestikurqa pï mëtapis Diospita yachatsishunmi (1 Tim. 2:9, 10). Shumaq y limpio vestikushqata rikämarnintsikqa, itsa pillapis imanir tsënö purenqantsikta musyëta munarinman. Huk wawqiwan warminmi junto viajayarqan musulmán religionpita nunawan. Tsëmi shumaq vestikushqata rikar, cristiänoku kayanki nir nunaqa tapurerqan, y tsënöpam kima hora parlayarqan.
3. ¿Jesus ruranqannö pillatapis parlapashqankiku?
3 Parlapar qallanapaq: Jacob ruranqan pözochö samaritana warmitaqa yakuta mañakoqnöllam Jesus parlapar qallarqan. Tsënöllam noqantsikpis Diospita yachatsikunapaqqa, imapitapis parlapärishwan o imallatapis tapurishwan. Höraqa itsa më tsëchöpis Diospita parlapäkita mantsashwan, pero Jehoväman markäkorqa o yärakurqa “mana ichicllapis mantsacurishpa[m]” nunakunata parlapäshun (1 Tes. 2:2).
4. ¿Imanöraq alistakushwan mëchö tsëchö këkarpis yachatsikunapaq?
4 Pï mëtapis parlapëta tïrashun: Wakin publicadorkunaqa pï mëtapis Diospita parlapëta yachakuyashqam. Qampis tsënö rurankimanmi. Puntataqa mëchö kanëkipaq kaqman pensari, tsëpitana pikunawan tinkunëkipaq kaqman pensari. Hina yachatsikunëkipaq publicacionkunata y taksha Bibliatapis puritsi. Nunakuna imanö kayanqanta y imata rurëkäyanqantapis alli rikärir, yanapëta tïrë. Tsëkunata rurarqa, Diospita yachatsikunëkipaq listonam këkanki (Fili. 1:12-14; 1 Ped. 3:15).
5. ¿Imanirtaq mëchö tsëchö këkarpis yachatsikushwan?
5 Diosta y nuna mayintsikta kuyarqa mëchö tsëchöpis yachatsikunapaq listom këkäshun (Mat. 22:37-39). Y Diospita yachatsikunantsik alläpa precisaptinmi, mëchö tsëchö këkarpis yachatsikïta haqinantsiktsu. Ushakë tiempo chämunampaqqa ichikllanam pishin, tsëmi Diospa Gobiernompita llapan nunakunata yachatsinapaq listo këkänantsik (Rom. 10:13, 14; 2 Tim. 4:2).