Mëchö tsëchö këkarpis yachatsikïtaqa, ¡qampis puëdenkim!
1. a) ¿Imataq mëchö tsëchö këkarpis yachatsikï? b) ¿Mëqëkikunataq Jehoväpita yachakuyashqanki mëchö këkaqtapis parlapayäshunqëkipita?
1 ¿Ëkaqtaq congregacionnikichö Diospita rasumpa kaqta yachakuyashqa, mëchö këkaqtapis yachatsiyanqampita? Musyarirqa itsa mantsakärinki. ¿Imataq mëchö tsëchö këkarpis yachatsikïqa? Tsëqa escuëlachö, trabäjochö, rantipakoq ëwar, kastantsikkunata o vecïnontsikkunata watukar, viajarnin y mëchö tsëchö këkarpis Diospita parlanqantsikmi. Huk congregacionchömi, ishkë pachakpitapis más bautizakushqa Testïgokunapita, casi pullan kaq mëchöpis këkaqta parlapäyanqampita Diosta reqiyarqan, tsëmi rikätsikun, tsënö yachatsikï alläpa alli kanqanta.
2. ¿Pikunataq mëchö tsëchö këkarpis Diospita yachatsikuyarqan?
2 Punta cristiänokunapis mëchö tsëchö këkäyanqanchömi Diospita yachatsikuyarqan. Jesuspis Samaria markapa pasëkarmi Jacob ruranqan pösopita yaku horqaq warmita yacharatsirqan (Juan 4:6-26). Etiopía nación gobiernopaq trabajaq nuna Isaías librota leir ëwëkaqta rikärirmi, “¿tse leyenqequita cäyinquicu?” nishllapa Felipi parlapar qallarqan (Hech. 8:26-38). Pablupis, Filïposchö carcelarëkarmi cárcel täpaqta Diospita yacharatsirqan (Hech. 16:23-34). Más qepatapis huk wayichö carcelarëkarmi, Pabluqa “chasquerqan llapan watucaqnin chaqcunata”, y tsëchömi “yachatserqan Diospa mandaquininpaq y Teyta Jesucristupaq” (Hech. 28:30, 31). Pëkunapis tsënö yachatsikushqa këkäyaptinqa, mantsakoq këkarpis tsënö rurëta puëdenkim. ¿Imanö?
3. ¿Imatataq rurashwan mëchö tsëchöpis mana mantsakurlla yachatsikunapaq?
3 ¿Imanötaq parlapar qallankiman? Mana reqinqantsik nunakunata parlapëqa casi llapantsikpaqpis sasaraqmi. Hasta reqinakunqantsikkuna kaptimpis, mantsakuntsikraqmi Diospita parlapëta. Pero Jehová alli kanqanman, tukïta yachatsimanqantsikkunaman y nunakuna ankupëpaq kawëkäyanqanman pensëmi yanapamäshun Diospita yachatsikunapaq (Jon. 4:11; Sal. 40:5; Mat. 13:52). Hinamampis, mana mantsashpa nunakunata parlapänapaqqa Jehovätam mañakunantsik (1 Tes. 2:2). Galaad escuëlachö estudiashqa wawqim kënö nin: “Diosman mañakunqanmi imëpis yanapamashqa nunakuna parlapëta mana mantsakunäpaq”. Mantsakurninqa, qampis Diosman shonqïkichö mañakuri yanapashunëkipaq (Neh. 2:4).
4. ¿Imanötaq yachatsikur qallashwan, y imanirtaq tsënö rurashwan?
4 Mëchö tsëchöpis yachatsikurqa manam Bibliapita parlaparllana o huk textota leipurllanatsu parlapar qallanantsik. Antis huk cösaskunapita parlapaqnöllam Diospita parlapëman chärishwan. Atskaq wawqikuna y panikunam niyan tsënö rurarqa, mana mantsakurna yachatsikuyanqanta. Pero nunakuna mana munayaptinqa ama masqa yachatsita tïrënatsu. Shumaqlla witikuri y huk nunakunatana parlapëta tïrë.
5. ¿Imanötaq huk pani mëchö tsëchö këkarpis yachatsikun?
5 Parlakïta mantsapakoq panim, rantipakoq ëwar pitapis parlapänampaqqa kushi kushilla nawinta rikan. Pëtapis kushi kushilla rikäyaptinqa, imallapitapis parlapärinmi. Y alli shonquyoqtanö rikarqa, manam mantsakunnatsu y shumaqmi maslla parlakuriyan. Parlapanqantam shumaq wiyan tsënöpa imapita yachakïta wananqanmannö yachatsinampaq. Tsënö rurarmi atskaq nunakunata publicacionkunata haqipushqa y Bibliapita yachatsikurpis qallashqam.
6. ¿Imanöraq mëchö tsëchö këkarpis yachatsikur qallashwan?
6 Mana alläpa mantsapakunapaq. ¿Imanötaq parlapäkur qallashwan? Yarpë: Jesuspis yakuta mañakoqnöllam pözochö warmita parlapar qallarqan (Juan 4:7). Tsëqa itsa shumaq saludarinqantsik o imallapitapis tapurinqantsik yanaparamäshun mana alläpa mantsakurlla parlapärinapaq. Tsënö más parlapar parlaparqa itsa muroq cuenta Bibliapita yachatsikïta shonqunman chäratsinkiman (Ecl. 11:6). Imallapitapis shumaq parlapäriyanqan y tsëpita más musyëta munar nunata tapukuyanqanmi, wakinkunataqa alli yachatsikuyänampaq yanapashqa. Itsa hospitalchö doctorta shuyarëkarqa qampis kënö ninkiman: “¡Imanö kushishqaraq tikrarishaq llapan qeshyakuna ushakäriptin!”.
7. Nunakuna imanö këkäyanqantapis rikanqantsik, ¿imanötaq yanapamantsik mëchö tsëchö këkarpis yachatsikunapaq?
7 Nunakuna imanö këkäyanqanta, imata rurëkäyanqanta y imata wanëkäyanqanta rikëpis yanapakunmi. Pipapis wambrankuna shumaq portakoqta rikarqa, kushikurmi kënö tapurishwan: “¿Imanötaq wambrëkikunata yachatsinki alli portakuyänampaq?”. Huk cristiänam, trabajaq mayinkuna imatapis parlayanqanta alli wiyan y nïkurnam tsë parlëkäyanqampita yachatsikoq publicacionninkuna qorin. Huk kutim trabajaq mayin casakunampaq parlëkaqta wiyarqan, tsënam imanö alistakunampaq yachatsikoq ¡Despertad! revistan apapurqan. Tsënö ruranqampitam Bibliapita parlëman más chäyarqan.
8. ¿Imanötaq publicacionkunawan nunakunata parlapar qallashwan?
8 Nunakuna rikëkämashqa publicacionkunata leipis yanapamäshunmi pitapis parlapar qallanapaq. Huk wawqim, nunakuna musyëta munayanqan tëmakunapita parlaq Täpakoq o ¡Despertad! revistakunata pï më rikäyanqanchö lein. Y pipis leikanqanta rikapaqnö kaptinqa, tsë höram tapurin o revista imapaq yachatsikunqampitam parlapärin. Tsënö ruranqanmi imëpis yanapan pitapis parlapänampaq y Diospita yacharatsinampaq. Hina pï më rikänanman publicacionkunata churëpis yanapakunmi, tsëqa itsa trabajaq o estudiaq mayintsikkuna imallapitapis tapuramashwan.
9, 10. a) ¿Imanötaq mëchö tsëchö këkarpis tukïnöpa yachatsikushwan? b) ¿Imanötaq qam rurashqanki?
9 Pï mëta parlapëtam tïranantsik. Yachatsikunantsik alläpa precisaptinmi, mëchö tsëchö këkarpis yachatsikïta mana kaqpaqqa churanantsiktsu. Antis kikintsikmi shumaq rikänantsik nunakunata mëchöpis Diospita parlapänapaqqa. Puntallapitana pensë pillawampis tinkunëkiman, y imanöpis shumaq parlapar qallanëkipaq kaqman. Y Bibliata imëpis puritsi, hina munaq kaqkunata haqipunëkipaqwan publicacionkunata apë (1 Ped. 3:15).
10 Atskaq publicadorkunam mëchö tsëchöpis këkar tukïnöpa nunakunata yachatsiyashqa. Këta rikärishun, mana lluta yëkupäyänan edificiochö täraq panim, shumaq dibüjoyoq rompecabeza nishqanta armaq pï mëpis pasayänan o hamakuyänan sitiochö. Y shumaq hirkayoq y shumaq wëtakunayoq dibüjokunata kuyar nunakuna witipäyaptinnam, “patsata y sieluta mushoqtana” Diosnintsik ruramunampaq kaqta yacharatseq (Apo. 21:1-4). ¿Imanöyantaq qampis mëchö tsëchö këkar yachatsikunkiman?
11. ¿Imatataq ruranantsik mëchö tsëchö këkarpis parlapanqantsik nunakuna más yachakïta munayaptinqa?
11 Imëkanöpis yanapë yachakïta munayaptinqa. Parlapaptiki shumaq wiyashuptikiqa manam tsëllachötsu haqirinëki. Allichi kënö nirinkiman: “Alläpam kushikö shumaq parlarinqantsikpita. Y, ¿mëchötaq tareqman yapëpis más parlakurinapaq?”. Wakin wawqikuna y panikunaqa wayimpa direccionninta y telëfonompa nümerontam qoyan y nïkurnam, “alläpa shumaqmi parlakurirquntsik. Y parlanqantsikpita más musyëta munarqa, këchömi tarimanki” niyan. Watukëta mana puëdeqnö karqa Sírvase visitar (S-43) nishqan formulariota qellqarkur congrecionpa secretarionta ras entregëkï, pënam mëchöpis yachanqan marka congregacionman apatsinqa.
12. a) ¿Informashwantsuraq mëchö tsëchö këkarpis yachatsikunqantsik tiempota? b) ¿Tsënö yachatsikï allitsuraq kashqa? (Rikäri “Mëchö tsëchö këkarpis yachatsikïqa nunakunata yanapanmi” neq recuadrota.)
12 Mëchö tsëchö këkarpis yachatsikunqantsik tiempotaqa informanantsikmi. Huk o ishkë minütollapis Diospita parlapäkunqantsikpitaqa mana qonqellatam apuntanantsik. Cada publicador hunaqchö 5 minütosllapis Diospita yachatsikuyaptinqa, ¡killachö 17 millonpitapis más höram informakanman!
13. ¿Imataq yanapamantsik mëchö tsëchö këkarpis nuna mayintsikta yachatsinapaq?
13 Diosta y nuna mayintsikta kuyarmi mëchö tsëchö këkarpis yachatsikuntsik (Mat. 22:37-39). Jehová imanö kanqanta kuyar y Patsapaq ruramunampaq kaqkunapita alläpa agradecikurmi “llapan hanampa këkaq rasumpa kaq alli gobiernompita” willakuntsik (Sal. 145:7, 10-12). Nuna mayintsikta yanapëta munarmi, tiempo kanqanyaqqa mëchö tsëchö këkarpis Diospa alli willakïninta yachatsikunantsik (Rom. 10:13, 14). Alli preparakïkur o pillapis wiyaramänantsikman pensarqa, mëchö tsëchö këkarpis llapantsikmi yachatsikushun... y piraq musyan, tsënö rurarqa, itsa Diospa rasumpa kaq yachatsikïninta reqinampaq pillatapis yanaparishwan.
[4 kaq päginachö ninqan]
Mana alläpa sasa kanampaqqa, pï kanqëkita willarir parlapëta tïrë
[5 kaq päginachö ninqan]
Atskaq publicadorkunam mëchö tsëchö këkarpis tukïnöpa yachatsikuyan
[5 kaq päginachö recuadru]
Nunakunata parlapar qallanapaq yanapakïkuna
◼ Parlapäkur qallanëkipaq Jehoväta mañakï
◼ Alli shonquyoq nunakunata ashi y ama apurado këkaqkunataqa
◼ Parlaparqa kushi kushilla rikë y gustanampaqnö kaqta parlapë
◼ Parlamuptin shumaq wiyë
[6 kaq päginachö recuadru]
Mëchö tsëchö këkarpis yachatsikïqa nunakunata yanapanmi
• Huk wawqim, tallerchö cärronta altsayäpunanta shuyarëkar, tsëchö këkaqkunata Diospita parlaparqan y discursopita yachakunapaq reunionpaq invitacionninkuna haqipurqan. Tsëpita huk wata pasariptinnam, mana reqinqan wawqi asambleachö alläpa kushishqa saludarirqan. ¡Tallerchö pasaq wata invitacionnin haqipunqan nunam kanaq! Pëqa invitado kashqa karninmi discurso wiyakoq ëwanaq. Y Bibliapita yachatsiyänampaqmi mañakunaq. Y kananqa warminwan ishkanmi bautizakushqana kayan.
• Mëchö tsëchö këkarpis Diospita parlapäkur tariyanqan panipam, escuëlachö kiman wambrankunapita reqinqan nunakuna territorion cuenta. Tsëmi yanapan vecinonkunata, escuëlachö reqinqankunata y wambrampa reunionninman ëwaq teyta mamakunata parlapänampaq. Diospita yachatsikur qallanampaqqa, wambrankunata shumaq wätanampaq Biblia imanö yanapanqanllapitam parlapärin y nïkurnam Diospitana parlapärin. Tsënö parlapäkur qallaptinqa manam sasanatsu Bibliapita más parlapänampaq. Tsënö ruranqanwanmi chunka ishkë nunakunata bautizakuyanqanyaq yanapashqa.
• Huk panipa wayinman segurokuna rantikoq nuna chäriptinmi, paniqa Diospita parlapärirqan. Manana qeshyar, imëpis kushishqa y imëyaqpis kawakïta munankiku nirmi tapurirqan. Y nunam awmi nirqan, y ima següropaq parlëkanqantapis musyëtam munarqan. Tsënam paniqa Patsapaq Dios awnikunqanta rikäratsirqan. Y publicacionkunatapis chaskikurqanmi y tsë tardellam llapanta leir usharirqan. Tsëpitaqa Bibliata estudianampaqmi churakarqan, llapan reunionkunaman ewarmi qallëkurqan y nïkurnam Bautizakurirqan.
• Huk pani avionchö viajëkarmi, lädonchö këkaq warmita parlaparqan y Diospita yacharatsirqan. Avionpita bajarirnam paniqa wayimpa direccionninta, telëfonompa nümeronta warmita haqipïkurqan, y yapëchö Jehoväpa testïgonkuna wayinman chäyaptinqa, Bibliapita yachatseqnin kutiyänampaq mañakunampaqmi nirqan. Y tsë waräninllam ishkaq testïgokuna wayinman qayakuriyarqan. Tsë warmiqa Bibliata estudiarmi qallëkurqan y Diospa kaqtapis rasllam yachakurirqan, nïkurmi bautizakurirqan y tsëpita ichik tiempollachönam kimaqta Bibliapita estudiatsirnin qallëkurqan.
• Tsatsakunata cuidayänan wayichö pachak watayoq manana rikëta puëdeq wawqim, “Diospa Gobiernontam wanantsik” nin imëpis. Tsënöpam enfermërakuna y wakin tsatsakuna imapaq parlëkanqantapis tapuyan, tsënöpanam Diospa Gobiernon ima kanqantapis yacharatsin. Huk kutim, tsëchö trabajaq warmi paraïsochö imata ruranampaq kaqta tsë wawqita tapurirqan. Y kënömi contestarqan: “Manam wiskunatsu kashaq, yapëmi purishaq y ruëdayoq sillätapis kayëkushaqmi”. Wisku karmi tsë atiendeqninta mañakoq revistan leipunampaq. Huk kutim tsë awkin wawqipa wambran watukaqnin charqan, y tsë wambrantam tsëchö trabajaq warmi revistakunata wayimpa apakunampaq mañakurqan. Huk enfermëranam kënö nirqan: “Kananqa llapäkunapis ‘Diospa Gobiernontam wanantsik’ nirllanam puriyä”.
• Huk pani restaurantechö atendeyänampaq shuyarëkarmi, huk grupo nunakuna gobiernopaq parlëkaqta wiyarirqan. Nunakunapa tukï problëmankunata gobierno mana altsëta puëdenqanta huknin kaq parlaptinmi, “kanantämi yacharatsishaq” nir paniqa pensarirqan. Shonqunllachö mañakurirmi, tsë nunakunaman witirirqan. Puntata shutinta willakurirmi Diospa Gobiernon llapan nunakunapa problëmankunata altsarinampaq kaqta yacharatsirqan y nïkurmi follëtonkuna qorqan. Tsënö parlëkäyaptinmi restaurantepa dueñon witirirqan. Y qarqurinampaq kaqtam paniqa pensarqan, pero parlayanqantam dueñoqa wiyashqa kanaq y pëtapis follëtota haqipunantam munarqan. Hina tsëllamannam nawin junta weqinwan huk empleädapis witirqan, pëpis parlayanqanta wiyashqa karnin. Pëqa puntata Bibliata estudiashqash kanaq y kananqa yapë estudiëtanam munëkänaq.