Mëchö tsëchö këkarpis Testïgom kantsik
1. Yakuta ashir chaq warmita Jesus parlapanqampita, ¿imatataq yachakuntsik?
1 Karuta purishqa karmi Jesusqa utishqa y yakunashqa këkarqan. Tsëmi qateqninkuna mikïta ranteq ëwayanqanyaq, Samaria markaman yëkunachö hamëkarqan. Manam tsë markaman yachatsikoqtsu ëwëkarqan, antis Galilea markachö yachatsikunanrëkurmi tsëpa pasëkarqan. Tsënö karpis, yakuta ashir chäreq warmitaqa parlapärerqanmi (Juan 4:5-14). ¿Imanir? Imëpis ‘rasumpacagta parlag Jehoväpa cumplïdu testïgun’ karmi (Apo. 3:14, NTCN). Noqantsikpis Jesus ruranqanta qatita munarqa, mëchö tsëchö këkarpis Jehoväpa testïgonmi kanantsik (1 Ped. 2:21).
2. ¿Imakunatataq puritsishwan mëchö tsëchöpis yachatsikunapaq?
2 Wananqëkikunata puritsi: Mëchö tsëchö këkarpis yachatsikunantsikrëkurmi, publicacionnintsikkuna imëpis puritsinantsik. Trabajadorkunata, gasolina rantikoqkunata o tsë hunaqchö pikunatapis haqipuyänampaqmi, wakin wawqikuna panikunaqa tratädokunata puritsiyan (Ecl. 11:6). Lädonchö hamakoqkunata yachatsinanrëkurmi, imëpis viajaq pani takshalla Bibliata y Yachatsikun librota puritsin.
3. ¿Imanöraq nunakunata parlapar qallashwan?
3 Parlapar qallë: Mëchö tsëchö këkarpis yachatsikunapaqqa, Bibliapita parlapäkurllana qallanantsik manam precisantsu. Jesusqa manam Mesias kanqanta willakurllanatsu yaku asheq warmita parlapar qallarqan, antis yakuta upunampaq mañakoqnöllam yacharatserqan, tsënöpam warmipis tapukur qallëkorqan (Juan 4:7-9). Tsënöllam huk panipis fiestapaq tapuyaptin imanö yachatsikunampaqpis pensashqa. “Jehoväpa testïgonmi kä, tsëmi fiestakunata celebränatsu” ninampa rantinmi, “mananam fiestakunata celebrëta munänatsu” nin. Y imanir tsënö nenqanta tapuyaptinmi, paniqa Bibliapita yacharatsin.
4. ¿Imanirtaq Mateo 28:18-20 texto yanapashunki alli yachatsikunëkipaq?
4 Jesus Patsachö yachatsikushqana karpis, mandamanqantsikta wiyakur yachatsikushqa yanapëkämantsikmi (Mat. 28:18-20). Tsëmi pëta qatirnin, mëchö tsëchö këkarpis Diosnintsik awnimanqantsikta nunakunata yachatsinantsik (Heb. 10:23).