¿Imëtaq kutishwan yachakïta munaqkunaman?
1. ¿Imanötaq nunakunata yanapantsik Jesuspa qateqnin tikrayänampaq?
1 Jehoväpa Gobiernompita yachakïta munaqkunaman kutirmi, Jesuspa qateqnin kayänampaq nunakunata yanapantsik (Mat. 28:19, 20). Yachakï munaqkunaman kutinapaqqa tiempontsikpita y yachakï munaq nunapa tiemponpitam kanqa, pero manam alläpa unëqa pasanantsu. ¿Imanir?
2, 3. ¿Imanirtaq yachakï munaqkunaman raslla kutinantsik?
2 ¿Imanirtaq raslla kutinantsik? Jesuspa ‘alli willaquininqa’ më tsëmannam chärishqa y kë mana alli tiempokunapa ushakënimpis yëkëkämunnam (Mat. 24:14; 1 Ped. 4:7). Tsënö kaptimpis yachakï munaqkunapaqqa ‘salbaqui junaq’ kanraqmi. Tsëmi ‘Diospa palabranta willapäcunantsic’ alläpa precisan y tsëtaqa rurantsik yachakï munaqkunaman ras kutirmi (2 Cor. 6:1, 2; 2 Tim. 4:2).
3 Nunakunapa shonqunman muroq cuenta Diospa yachatsikïninta churanqantsiktam Satanasqa imëkanöpa ushakätsita tïran (Mar. 4:14, 15). Familiankuna, trabajaq mayinkuna, pikunapis tukïta niyaptinmi wakin nunakunaqa Bibliapita yachakïta munayannatsu. Tsënö mana pasanampaqmi ras kutirnin Diospita yachatsinantsik. Ama qonqëtsu, mana unëllata kutiptikeqa yachatsinqëkita yarparëkanqaran, tsëqa manam ajatsu o sasatsu kanqa yapë parlapänëkipaq.
4. ¿Imatataq ruranantsik parlapanqantsik nunaman yapë yachatseq kutinapaq?
4 Imë hunaq y imë hora kutinëkipaq kaqta willë: Punta visïtallachömi ninëki imë hunaq y imë hora kutinëkipaq kaqtapis, y kutirnin yachatsinëkipaqmi imallatapis tapurinëki. Y yachakï munaqpa más tiempon kapuptenqa, warëninlla o huk ishkë hunaqllata kutirinëkipaq nirinkimanmi. Wakin hunaqkuna trabajaq ewkuptin semana ushëchö tariptikeqa, itsa shamoq semana ushëkuna kutinëkita munanqa. Imam sïqa, registro nishqanmanmi alli apuntanëki, tsënöpa awnikonqëkinölla kutinëkipaq (Mat. 5:37).
5. ¿Imanirtaq Jesus nimanqantsiknö yachakï munaqkunam raslla kutinantsik?
5 Yachakï munaqkunaman ras kutinantsikqa alläpam precisan. ¿Imanir? Kë mundo ushakänampaq ‘ichikllana’ pishiptinmi, tsëmi alli rikänantsik imë hora y imë hunaqpis yachakï munaqman ras kutinapaq (1 Cor. 7:29, QKW). Diospa Gobiernompita yachakï munaqman ras kutirqa, itsa más nunakunata yanaparishun.