Rikätsikushun agradecido kanqantsikta
17 de abrilmi Jesuspa Wanïnin Yarpë kanqa
1. ¿Salmista imanö sientekunqantaq noqantsikpaqpis alläpa alli Jesuspa Wanïnin Yarpë hunaqchö?
1 Jehová Dios tukïnöpa yanapanqanta y llakipanqanta agradecikurmi salmistaqa kënö nirqan: “¿Imataraq qoshaq Jehová Diosta tukï allikunata qomanqampita?” (Sal. 116:12). Kanan tiempo cristiänokunanäqa masran Jehová Diosta agradecikuyänan. Salmista qellqanqampita pachak watakuna pasarishqanchömi Jehová Diosqa llapan nunakunata huk shumaq qarëta qorqan, y tsëqa karqan salvamänapaq Jesus wanunqanmi. Tsëmi, kë 17 de abril Jesuspa Wanïninta Yarpänapaq tukïnöpa alistakurnin, alläpa agradecido kanqantsikta rikätsikunantsik (Col. 3:15).
2. ¿Imanirtaq alläpa agradecikushwan Jesus noqantsikrëkur wanunqampita?
2 ¿Ima bendicionkunatataq chaskintsik Jesus wanunqampita? Jesus noqantsikpaq wanunqampitam ‘jutsantsiccunapita perdonashqa’ kantsik (Col. 1:13, 14). Tsëmi yanapamantsik Jehová Diosta limpio shonquntsikwan adoranapaq (Heb. 9:13, 14). Jehová Dioswanqa tukïtam parlëta puëdentsik mañakunqantsik hora (Heb. 4:14-16). ¡Jesuspa Wanïninman markäkoqkunaqa wiñeypaqmi kawakuyanqa! (Juan 3:16.)
3. ¿Imanötaq Jehová Diosta alläpa agradecikunqantsikta rikätsishwan Jesus noqantsikrëkur wanunqampita?
3 Rikätsikushun agradecikunqantsikta. Agradecikunqantsikta rikätsikunapaqqa, tsë semana leinapaq textokunatapis llapantam leishwan, y Jesus wanunqan imanö yanapamanqantsikmanmi yarpachakunantsik. Hina 1 de febrero de 2011 kaq La Atalaya revistachö “¿Está usted listo para el día más importante del año?” nishqan tëmapis yanaparamäshunmi. Mañakunqantsikchöpis Jehová Diostaqa nishwanmi Jesuspa wanïnimpita alläpa agradecido këkanqantsikta (1 Tes. 5:17, 18). Y agradecikunqantsiktaqa rikätsikushun, Jesus ninqanta wiyakurnin Wanïnin Yarpë reunionchö këkarninmi (1 Cor. 11:24, 25). Hina Jehová Diospa alläpa hatun kuyakïnintaqa rikätsikushun, pï më nunakunata invitamurninmi (Isa. 55:1-3).
4. ¿Imanötaq Jesuspa Wanïnin Yarpëta rikashwan?
4 Jehoväta sirveq cristiänokunapaqqa, Jesuspa Wanïninta Yarpänapaq ëllukanqantsikqa wakin reunionnintsikkunapitapis, ¡más precisaq kaqmi! Tsëmi Jesuspa Wanïnin Yarpë këllachöna këkaptinqa, noqantsikpis salmistanö nishun: “Jehová Diosta alabë almallä, tukï alli ruranqankunata ama qonqëtsu” (Sal. 103:2).