¿Imanöraq Diosta agradecikushwan hatun qarënimpita?
1. ¿Imapitataq Jehoväta alläpa agradecikuntsik?
1 Jehová imëkata qaramanqantsikpitapis más hatun kaq qarëninqa, salvamänantsikrëkur kuyashqa Tsurinta qonqanmi (Sant. 1:17). Atska bendicionkunatam chaskintsik noqantsikrëkur Jesus wanunqampita, y hukqa hutsantsikpita perdon chaskinqantsikmi (Efe. 1:7). ¡Alläpam tsëta agradecikuntsik! Tsënöpam Jesuspa Wanïnin Yarpë witsan tsë qarëman más yarpachakuntsik.
2. Noqantsikrëkur Jesus wanunqampita más agradecido kanapaq, ¿imatataq familiantsikwan rurashwan?
2 Más agradecikushun. Kë wataqa Jesuspa Wanïnin Yarpë kanqa 30 de marzom. Tsëmi más agradecido kanantsikrëkur, Jesuspa Wanïnin Yarpë manaraq chämuptin Familiachö Diosta Adoranantsik Hunaq, salvamanqantsikpita parlaq tëmakunapita más yachakurishwan. Y tsë semana leinapaq textokunatapis llapantam leishwan. Hina Jesus wanunqan imanö yanapamanqantsikmanmi yarpachakunantsik, y pë wanunampaq haqinqampita Jehoväta, kawënintsikta, wakinkunata y shamoq tiempokunata imanö rikanqantsikmampis llapantsikmi yarpachakunantsik. Hinamampis, ¿imanirtaq yachakïkantsiknatsu Jesuspa Wanïnin Yarpëchö cantana 8 y 109 mushoq canticonkunata? (Sal. 77:12.)
3. ¿Imanötaq agradecikunqantsikta rikätsikushwan?
3 ¿Imanötaq agradecikunqantsikta rikätsikushwan? Tsë qarëpita alläpa agradecikurmi, Jehoväpita y Tsurinta kuyamarnintsik kachamunqampita nunakuna parlapëta haqintsiktsu (Sal. 145:2-7). Tsëmi wakinkunaqa marzopita mayo killakunayaq familiachö mëqanllapis precursor auxiliar kanampaq churakäyan. Y tsëta mana puëderqa, ¿manatsuraq “tyemputa alleq probechar” más yachatsikoq yarqunkiman? (Efe. 5:16, QKW.) Hina tsë qarëpita agradecikurmi Jesuspa Wanïnin Yarpëman nunakuna shayämunampaq imëkanöpa yanapakunantsik (Apo. 22:17). Kananllapitana pikunata invitanëkipaq kaqtapis qellqë: invitankimanmi yachakï munaqkunata, Bibliapita yachakïkaqkunata, kastëkikunata, trabajaq mayikikunata y vecïnïkikunatapis. Nïkurna Jesuspa Wanïnin Yarpëpaq especial campäñachö invitakurnin alli yanapakï.
4. ¿Imatataq ruranantsik Jesuspa Wanïnin Yarpë witsanchö?
4 Cada wata Jesuspa Wanïnin Yarpë witsanqa yanapamantsik llapan nunakunarëkur Jehová ruranqampita más agradecikunapaqmi. Tsëmi “mana musyeypa Kristupa kapoqninkuna[pi]ta” y noqantsikrëkur wanunqampita agradecikunqantsikta más rikätsikunapaq tsë witsankunachö kallpachakunantsik (Efe. 3:8).