Jesus wanunqampita, ¿agradecikushuntsuraq?

1. ¿Imata rikätsikunapaqtaq Jesus Wanunqanta Yarpëqa yanapamantsik?

¹ Jehoväqa alläpa kuyakoqmi, tsëmi tsë kuyakïpita agradecikoq këta yachakunapaq y rikätsikunapaq Jesus Wanunqanta Yarpëqa yanapamantsik, kë wataqa kanqa 14 de abrilmi. Lücas 17:​11-​18 textum rikätsikun Jehoväwan Jesus agradecikoq këta imanö rikäyanqanta. Jesusqa chunkaqtam leprösukunata kachakätsirqan, peru jukllëllam kutïkur agradecikurqan. ¡Imanö mana agradecikoqmi wakinqa kayarqan! Shamoq tiempuchöqa, Jesus wanunqanqa yanapakunqa, imëka qeshyakuna ushakänampaq y mana wanushpa kawëta tarinapaqmi. Llapan junaqkunam Jehoväpa bendicionninkunapita agradecikushun. Peru ¿imanötaq shamoq semänakunachö agradecikoq kanqantsikta rikätsikushwan?

2. ¿Imataq yanapamäshun Jesus Wanunqampita mas agradecikunapaq?

² Agradecikoq këta yachakushun. Jesus wanunqanman yarpachakunqantsikmi yanapamantsik agradecikoq kanantsikpaq. Tsëmi Jesus Wanunqanta Yarpë semänachö akrashqa textukunata leyinantsik, tsë textukunaqa këkan calendariuchö y Llapan junaqkuna Bibliapita yachakunapaq follëtuchömi. Familiëkïwan juntu leyiriyänëkipaq patsätsiyë. Tsëmi yanapamäshun mas agradecikoq kanantsikpaq. Jina tsënöpam alli portakïtapis procurashun (2 Cor. 5:​14, 15; 1 Juan 4:11).

3. Jesus Wanunqanta Yarpë witsanchöqa, ¿imakunata rurartaq rikätsikushun alläpa agradecikoq kanqantsikta?

³ Agradecikunqantsikta rikätsikushun. Rurënintsikwanmi agradecikoq kanqantsiktaqa rikätsikuntsik (Col. 3:​15). Leprapita kachakashqa nunaqa Jesustam ashirqan agradecikunampaq. Y tsëpitapis llapan nunakunatachi (runakunatachi) willarqan imanö kachakanqanta (Lüc. 6:45). Agradecikunqantsikta rikätsikushun Jesus Wanunqanta Yarpë witsankunachö alleq invitakurnin, precursor auxiliarnö sirwirnin o llapan puëdinqantsikmannö yachatsikurnin. Jina agradecikunqantsikta rikätsikushun, tsë paqaschöqa shamoqkunata shumaq chaskirnin y tapukïninkunachö yanaparninmi.

4. ¿Imatataq ruranantsik tsëpita llakikur mana këkänapaq?

⁴ ¿Kë watallanatsuraq Jesus Wanunqanta yarpärishun? (1 Cor. 11:26.) Manam musyantsiktsu. Peru musyantsikmi, watachö juk kutilla kanqanta y tsë pasariptinqa mananam agradecikoq kanqantsikta rikätsikïta puëdishunnatsu. Tsëmi, ¡alleq provechanantsik! Parlanqantsik y shonquntsikchö yarpachakunqantsik salvamaqnintsik Jehoväpaqnö katsun (Sal. 19:14).