Tukïläya nunakunapaq revistakuna
1. ¿Imanötaq mäkoq mäkoq cumplido sirveq apóstol Pablu ruranqanta qatikan?
1 Apóstol Pablu “tukïläya nunakunata” yanapananrëkur yachatsikunqannöllam, mäkoq mäkoq cumplido sirveqpis tukïläya markapita nunakunaman y tukïnöpa pensaqkunaman Diospa yachatsikïninta chätsin (1 Cor. 9:22, 23, NM). Tsëmi Täpakoq y ¡Despertad! revistakunawan alli yachatsikunantsikpaqqa, alleq musyanantsik imanö nunakunapaq rurakämushqa kanqantapis.
2. ¿Pikunapaqtaq ¡Despertad! revista rurakashqa?
2 ¡Despertad! Kë revistaqa ‘Atenas marcachö’ Pablu yachatsinqan nunakunapaqnömi rurakämushqa (Hech. 17:22). Tsë nunakunaqa manam reqiyaqtsu cristiano yachatsikïkunata, y Bibliapitanäqa manam ni kuchunllatapis musyayaqtsu. Tsaq tsënö nunakunapaqmi ¡Despertad! revistaqa rurakämushqa. Wakinkunaqa manam ni imatapis cristiänokunapita musyayantsu, huk religionpita musyëta munayantsu o Biblia yanapakunqanta cuentata qokuyantsu. Huk Dios rasumpa kanqanta nunakuna musyayänanrëkurmi kë revistaqa rurakämun. Hinamampis, Bibliachö qellqarëkaq yachatsikïkunaman markäkïninkuna más sinchiyänampaq, y Jehoväpa testïgonkuna wakin religionkunapita hukläya kayanqanta musyayänampaqmi yanapakun.
3. ¿Pikunapaqtaq Täpakoq revistaqa rurakashqa?
3 Täpakoq. Pablu “creyicoq” nunakunaman qellqanqannömi, kë revistataqa ‘Diosman y Palabran Bibliaman creikoqkunapaq’ qellqayämun (Hech. 13:14-16). Bibliapa wakin yachatsikïninta reqirpis, manam llapantatsu wakin nunakunaqa reqiyan, pëkunapaqmi kë revistaqa. Pero reunionchö yachakunapaq Täpakoq revistataqa Jehoväpa testïgonkunapaqmi rurayashqa. Unë cristiänokuna Bibliata alleq reqiyaptin y rasumpa kaq yachatsikïta musyayaptinmi, Pablu congregacionkunaman cartakur llapanta willananqa precisarqantsu (1 Cor. 1:1, 2). Hina tsënöllam reunionchö estudianapaq tëmakunataqa qellqayämushqa imapitapis parlëkanqantsikta y yachakunqantsikta musyaqkunapaq.
4. Yachatsikunapaqqa, ¿imanirtaq ishkan revistakunapita alli yachakushwan?
4 Täpakoqtawan ¡Despertad! revistata ishkanta qarakurnimpis, huknin kaqllapitam nunakunataqa parlapantsik. Tsënö karpis, ishkan revistakunapitam alli yachakïta tïrashwan. Tsënöpa wiyakoqkuna wanayanqanmannö mëqanwampis yachatsikunapaq.