¿Imanirtaq yachatsikuntsik?

¿Imanirtaq wayin wayin ëwantsik y munaq kaqkunata Bibliapita yachatsintsik? ¿Alli shonquyoq nunakuna kawëman apakoq nänita tariyänampaq yanapanantsik precisaptinllatsuraq? (Mat. 7:14.) Tsërëkur yachatsikunqantsikqa puntachömi qateqnin listachö këkan, pero manam más precisaq kaqtsu. Tsëqa, qateqninchö imanir yachatsikunqantsikpaq parlaq 12 musyatsikïkunapita, ¿mëqan kaqtaq más precisaq?

1. Nunakuna salvakuyänampaq (Juan 17:3).

2. Mana alli nunakunata ushakëpita willanantsikpaq (Eze. 3:18, 19).

3. Biblia willakunqan cumplikänampaq (Mat. 24:14).

4. Dios alli kaqllata ruranqan musyakänampaq. Mana allikunata Jehová ushakätsiptinqa, manam pipis ninqatsu mana alli rurëkunata dejanampaq mana willayanqanta (Hech. 17:30, 31; 1 Tim. 2:3, 4).

5. Noqantsiknöpis Jesuspa yawarninwan rantishqa nuna mayintsikkuna Diospa kaqpita yachakuyänampaq (Rom. 1:14, 15).

6. Mana alli nunakunapa kawëninkunapita culpable mana kanantsikpaq (Hech. 20:26, 27).

7. Kikintsikpa salvacionnintsikta tarinantsikpaq (Eze. 3:19; Rom. 10:9, 10, NTCN).

8. Nuna mayintsikkunata kuyanqantsikta rikätsikunantsikpaq (Mat. 22:39).

9. Jehoväta y Tsurin Jesusta wiyakunqantsikta rikätsikunantsikpaq (Mat. 28:19, 20).

10. Tsënö Jehoväta adorarnin (Heb. 13:15).

11. Kuyanqantsikta Diosta rikätsinantsikpaq (1 Juan 5:3).

12. Jehoväpa jutin alläpa respëtowan alabashqa kanampaq (Isa. 43:10-12; Mat. 6:9).

Awmi, manam tsërëkurllatsu Diospitaqa yachatsikuntsik. Jina yachatsikunqantsikqa yanapamantsik markäkïnintsikchö o yärakuynintsikchö más sinchi kanantsikpaq y Diospa minkan kanantsikpaqmi (1 Cor. 3:9). Pero llapampitapis más precisaq kaqqa 12 kaqchö ninqanmi. Nunakuna wiyakuyaptin o mana wiyakuyaptimpis yachatsikunqantsikqa yanapakun Jehoväpa jutin alläpa respëtowan alabashqa kanampaqmi. Jinamampis, burlapaqnin Satanasta Jehová contestanampaqmi tsëta ruranqantsikqa yanapakun (Pro. 27:11). Tsëmi alläpa precisan Diospa alli willakïninta imëpis musyatsikïkänantsik (Hech. 5:42).