Jesus Wanunqanta Yarpëpaq kushishqa alistakushun
1. Jesus Wanunqanta Yarpë witsanqa, ¿imanötaq sientikuntsik?
1 Jesus Wanunqanta Yarpëqa kanqa martes 26 de marzom, salvamänapaq Dios tsurinta kachamunqanman pensarmi alläpa kushikuntsik (Is. 61:10). Kanampita kushi kushilla shuyashqaqa listom këkäshun tsë reunionpaq. Rikärishun imanir.
2. ¿Imanö shonquwantaq alistakushwan Jesus Wanunqanta Yarpëpaq?
2 Tsë junaqpaq alistakushun. Señorpa Cënan reunionqa sencïllollam, pero alläpa precisaqmi. Llapan alli yarqunanrëkurmi kananllapitana alli alistakunantsik (Prov. 21:5). Precisanmi imë hora y mëchö kanampaq kaqta patsätsinan, tsënöpa tsë local limpio y listo këkänampaq. Tantawan vïnotaqa alistëkänantsiknam. Jina discursamoqpis allim preparakunan, acomodadorkuna y vïnotawan tantata puritseqkunapis musyayänannam imata rurayänampaq kaqta. Salvamänantsikrëkur wanunqampita agradecikurmi shumaq alistakushwan kë alläpa precisaq reunionpaq (1 Ped. 1:8, 9).
3. ¿Imanötaq Señorpa Cënampaq shonquntsikta alistashwan?
3 Shonquntsikta alistashun. Shonquntsikta alistanantsikpis precisanmi (Esd. 7:10). Tsëta rurarllam entiendishun tsë reunión alläpa precisanqanta. Tsërëkurmi tiempota jorqashwan Jesus Wanunqanta Yarpëpaq textokunapita yachakunapaq, y manaraq wanurnin ruranqankunaman yarpachakunapaq. Jesus noqantsikrëkur ruranqankunaman yarpachakunqantsikmi yanapamäshun pë ruranqanta qatinapaq (Gal. 2:20).
4. Salvamänantsikrëkur Jesus wanunqan bendicionkunapita, ¿mëqantaq más kushitsishunki?
4 Jesucristu wanunqanqa yanapakushqa Jehovälla Autoridadyoq kanqanta rikätsikunampaq, jutsapita y wanïpita libramänapaq, Dioswan alli amigo kanapaq y mana wanushpa kawakunapaqmi (Col. 1:21, 22; 1 Juan 2:2). Jinamampis, noqantsikrëkur wanunqanman yarpachakunqantsikmi yanapamäshun Jehovällata sirwinapaq awninqantsikta cumplinapaq, y Jesus ruranqannölla ruranapaq (Mat. 16:24). Pasëpa segürom këkantsik Jesus Wanunqanta Yarpëpaq alistakunqantsik y tsëman ëwanqantsikqa shonquntsikta kushitsinampaq kaqta.