Tapukïkuna kaq

◼ ¿Bibliapa mëqan musyatsikïninkunataq rikätsikun yachatsikïchö o reunionchö këkar celularta imanö utilizänapaq?

“Llapampaqmi churashqa tiempu kan.” (Ecl. 3:1.) Celularkunaqa yanapamantsik mensäjita qellqanapaq o piwampis jinan hora parlarinapaqmi. Tsënö kaptimpis, cristiänukunapaqqa kanmi mas precisaq tiempu telëfununkunapitapis. Tantiarinapaq, reunionnintsikkunachöqa Jehovätam adorantsik, yachatsikïninkunatam chaskintsik y juknintsik juknintsikmi animanakuntsik (Deut. 31:12; Sal. 22:22; Rom. 1:11, 12). Kënö reunionkunachö këkarqa, ¿celularnintsikta upiratsita y yarqurir-raq mensäjita leyita puëdishwantsuraq? Pipis urgenti qayamänata shuyararnin upiratsita mana puëdirninqa, mana büllata ruraqllamanmi churarishwan.

‘Alli willaquita willacunäntsikrëkurmi’ imëkatapis ruranantsik (1 Cor. 9:23). Höraqa allim kanman yachatsikïkar celularta utilicëqa. Itsa, grüputa rikaq wawqiqa qayarinman celularpa juk territoriukunachö yachatsikïkaqkunata. O quiza juk publicadorpa estudiantin o revisïtan karuchö yachaptin, manaraq watukaq ëwar puntataqa qayarinmanraq. Tsënö kaptimpis, yachatsikïkanqantsik hora celularnintsik pantaratsimänapitam cuidakushwan (2 Cor. 6:3). Jinamampis, wakin publicadorkuna yachatsikïkayaptin shuyëkarqa manam allitsu kanman celularpa amiguntsikwan parlëkanqantsik o mensäjita qellqëkanqantsikqa. Tsëpa rantinqa yachatsikïman y wakin yanaqintsikkunamanmi atentu këkashwan.

Respetakoq kashun (1 Cor. 10:24; Filip. 2:4). Mëchö yachatsikïkäyanqanta willamänapaq pitapis celularpa qayarinantsik kaptinllaqa, manam mana precisaqpaqqa churashwantsu yachatsikunapaq reunionman tempränu chëta. Tardi chashqaqa itsa grüpuchö kaqkunata yapëraq asignayanqa. Awmi, imallapis pasakuptinmi höraqa tardi chärishwan. Peru hörachö chëta procurashqaqa Jehoväta, grüputa dirigeq wawqita y cristiänu mayintsikkunata respetanqantsiktam rikätsikushun.