¿Congregacionchö carguyoq kanëkipaq sinchikïkankiku?
1. 1 Timoteu 3:1 textu ninqan consëjutaqa, ¿imëpita patsëtaq ollqukuna rurëta puëdiyan?
1 1 Timoteu 3:1, (NM) textum nin: “Ima karguyoqpis kanampaq pï nunapis kallpachakïkarqa, alli rurëtam munëkan”. Biblia kënö ninqanqa jövinkunatam alläpa animan congregacionchö cargukunata chaskiyänanrëkur sinchikuyänampaq. ¿Tsëpaqqa poqushqa nunaraqku (runaräku) kanëki? Manam. Jövinllaraq këkar tsëkunata ruranqëkiqa alläpa allim kanqan. Kananllapitanam yachakïkankiman y yachakunqëkinölla rurëkankiman siervu ministerialnö yanapakunëkipaq (1 Tim. 3:10). ¿Bautisakurqunkinaku? Rikärishun congregacionchö imanö mas yanapakïta puëdinqëkita.
2. Wakinkunata yanapë munë shonqïkipita kanampaq, ¿imatataq rurankiman, y imatataq wakinkunarëkur rurankiman?
2 Yanapakï munëniki imëpis këkätsun. Manam reqishqa o precisaq këta munarllaqa congregacionchö tsë cargukunata ashinkimantsu, sinöqa wakin cristiänukunata yanapanëkirëkurmi tsë ‘alli rurëta munankiman’. Tsëpaqqa, shonqïkipitam tsë yanapakï munë yurinan, y Jesus ruranqankunaman yarpachakunqëkim tsë munëyoq kanëkipaq yanapashunki (Mat. 20:28; Juan 4:6, 7; 13:4, 5). Wakinta yanapëta munë shonqïkichö mana kaptinqa, Jehoväta mañakï (1 Cor. 10:24). Qeshyëkaq y edäyashqa cristiänu mayintsikkunata, ¿imallachöpis yanaparinkimantsuraq? Itsa Diospita Yachatsikuna Wayichö yanapakurinkiman pitsapakïchö, jardinkuna altsëchö o juk imapis altsapakïchö. Yachatsikunapaq Diospa Escuëlanchö pipis mana puëdimushqa kaptinqa, ¿reempläsun yëkurinëkipaq listu këkanqëkita anciänukunata willarinkimantsuraq? Wakinkunata sirwi alläpa kushikïpaq kanqantam rikärinki (Hëch. 20:35).
3. ¿Imataq mas precisan congregacionchö yanapakunëkipaq y imanötaq tsëtaqa lograshwan?
3 Jehoväpa kaqchömi mas poqunëki. Imatapis yachaq y musyaq kanqëkipitapis Jehoväpa kaqchö poqu kanqëkim masqa precisan. Tsënö nunaqa, Jehovänö y Jesusnö pensëtam procuran (1 Cor. 2:15, 16). ‘Santu espïrituyoq’ kanqantam rurëninkuna rikätsikun (Gäl. 5:22, 23). Diospa Gobiernuntam puntaman churan y mana dejëpam yachatsikoqpis yarqun (Mat. 6:33). Jehoväpa kaqchö poqu kanëkipaqqa, tiempïkitam patsätsinëki japallëki Bibliata cada junaq leyinëkipaq, cada killa yarqamoq Täpakoq y ¡Despertad! revistakunata leyinëkipaq, reunionkunapaq preparakunëkipaq y mana faltëta ëwanëkipaq (Sal. 1:1, 2; Heb. 10:24, 25). Jövinllaraq amïgun Timoteuta consejarninmi Pablu kënö nirqan: ‘Alli alkäbu kë yachatsikïnikipita’ (1 Tim. 4:15, 16, NM). Tsëmi, Yachatsikunapaq Diospa Escuëlampaq y wayin wayin yachatsikoq yarqunëkipaq alli preparakunëki. Imatapis ruranqëkipita masqa Diospita yachatsikunqëki masqa katsun. Kallpachaki precursor kanëkipaq, Betelchö sirwinëkipaq o Soltërukuna Bibliapita Yachakuyänampaq Escuëlaman ëwanëkipaq. Jehoväpa kaqchö mas sinchikunqëkim ‘jöbincunapa lluta rurënincunapita’ tsapäshunki (2 Tim. 2:22).
4. ¿Imanirtaq precisan llapanchö wiyakoq y markäkïpaq kë?
4 Llapanchö wiyakoq y markäkïpaq (yärakuypaq) kë. Punta cristiänukunapa tiempunchömi alläpa mallaqë tiempu karqan. Tsëmi mikïta rakiyänampaqqa ‘alli reqiyanqan’, llapanchö wiyakoq y markäkïpaq nunakunata apostulkuna akrayarqan. Kë nunakuna rurëninkunata alli cumpliyänampaq kaqman markäkurmi apostulkunaqa juk mas precisaq rurëkunata rurayarqan (Hëch. 6:1-4). ¿Imatataq kë yachatsishunki? Ima carguta chaskirnimpis llapan puëdinqëkimannö cumplita tïrë. Noë ruranqanta qati, pëqa arcata ruranampaq Jehovä llapan ninqantam chipyëpa cumplirqan (Gen. 6:22). Llapanchö wiyakoq këqa Jehoväpaq alläpa valoryoqmi y rikätsikun pëpa kaqchö poqu kanqantsiktam (1 Cor. 4:2; “Jövinkunata yachatsishun” neq recuadruta leyiri).
5. ¿Imanirtaq ollqu kaq jövinkunaqa mas kallpachakuyanman congregacionchö mas cargukunata chaskiyänampaq?
5 Jehovä unëna willakunqannömi, pëpa markanman mas nunakuna (runakuna) yëkïkäyämun (Is. 60:22). Cada watam 250.000 nunakunanö bautisakuyan. Jehoväpa markan mas miraptinmi, Diospa kaqchö poqu y congregacionchö imëka rurëta yachaq ollqukunata wanantsik. Imëpitapis masmi Jehoväpa markanchöqa mas ruranapaq kan (1 Cor. 15:58). Tsëmi jövinkuna congregacionchö mas carguta chaskita munarninqa alli kaq rurëta munëkäyan.
[2 kaq päginachö ninqan]
Jehoväpa markan mas miraptinmi, Diospa kaqchö poqu y congregacionchö imëka rurëta yachaq ollqukunata wanantsik
[3 kaq päginachö recuadru]
Jövinkunata yachatsishun
Alli portakoq jövinkunataqa, imatapis rurayänampaq anciänukuna niyanqan y yachatsiyanqanqa alläpam yanapanqa. Congregacionkunata watukaq anciänum willakun, juk publicadorwan parlayänampaq y yanapanampaq pëwan puntaman ëwëkur täkuriyanqanta. Tsëpitanash rikärinaq lädunkunachö juk wamrallaraq jövin shëkanqanta, tsënash tapurinaq, “¿noqawanku parlëta munanki?” nir. Kë wamrallaraq jövinqa ninaq, reunion ushariptin tsë sitiuta pitsanampaq pë encargädu kanqantash. Teytankunaqa ëwakuyänampaq listunash këkäyänaq, peru tsë jövinqa encargayanqanta manaraq cumplirqa manash ëwakïta munarqantsu. Tsënash watukakoq anciänuqa kushishqa witikurinaq. Tsëpitaqa kënömi willakurqan: “Tsë congregacionchö anciänukunaqa altantum këkäyaq Diospa kaqchö sinchikoq jövinkunata yachatsiyänampaq, tsëmi imallatapis rurayänampaq encargayaq. Tsënöpam, tsë congregacionta imëpis watukaptïqa, anciänukuna niyämaq mëqan jövin siervu ministerialpaqnö alli këkanqanta”.