Alleq kallpachakushun willapäkïnintsikcho
1 Cristianokunata Diospa nänincho puriyänampaq apóstol Pablo willaparmi, hina këtawan nerqan: “Más alleq rurëkäyë” (1 Tes. 4:1). ¿Këqa ima ninantaq? Kë ninanqa, imanöpapis kallpachakïkashwanmi Diospaq rurënintsikta, y ‘willapäkïnintsikta más alleq ruranapaq’ (2 Tim. 4:5).
2 ¿Imanir-raq alli kaqta rurashwan? Kamakoq Yayata alli servita munëmi, yanapamantsik más alleq ruranapaq. Espiritual kaqcho winanapaq y imanöpapis willapäkïnintsikta alliyätsinapaqmi yanapamantsik. Diosta alli servinapaqqa, huk horariotam ruranantsik Bibliata librokunatawan leinapaq, willapäkïtam puntaman churanantsik, reunionkunamanmi ëwanantsik y këkunataqa rurantsik Diosnintsikta kuyarmi (Sal. 1:1, 2; Fili. 4:6; Heb. 10:24, 25).
3 Hina allim yachakushwan kuyakoq këta, y imëkanöpapis kallpachakïta. Tsëpaqqa, Diostam mañakushwan Jesús ruranqanman yarpakachänapaq (Mat. 20:28). Pëqa alläpam kushikorqan nunakunata willaparnin (Hech. 20:35). Noqantsikpis Jesusno kaqllam nunakunata willapashwan mëcho tsëchö këkarpis, tsënöpa willapäkïnintsikta miratsinapaq (Isa. 6:8).
4 Teyta mamakuna rurayanqan: Ichik wambrapis munanmanmi Diosta servita y alleq willapäkïta, tsëpaqqa teyta mamakunam yachatsiyanman. Wambrakunaqa rikäyan familiancho kaqkuna willapäkuyänanrëkur rurayanqantam. Huk wawqi, wambrallaraq këkar abueliton congregacionpaq uryaptinmi imëpis yanapaq. Tsënö kushikïwan uryanqanta rikarmi, pëpis munarqan yanapëta wawqi panikunata. Kananqa siervo ministerialmi.
5 Wawqikuna: “Superintendente kanampaq pï nunapis kallpachakïkarqa, alli rurëtam munëkan.” (1 Tim. 3:1.) Kënöpam Jehová ollqukunata willapan anciano o siervo ministerial këman chäyänampaq, tsëpaqqa Biblia nenqannömi kallpachakuyanman. Y manam alli yachaqraqtsu kayanman; këpaqqa Reinotam puntaman churayanman y alleq kushishqam willapäkuyanman (Mat. 6:33; 2 Tim. 4:5). Hinamampis wakinkuna yachakuyänampaqmi allita rurayanman.
6 Hinantin Patsachömi wanantsik uryaqkunata: Jehovaqa rasmi ëllikätsin espiritual kaq cosëchata (Isa. 60:22). Tsëmi Jesuspa qateqninkunaqa willapäkïcho alleq kallpachakuyänan. Hinantin Patsapita informem willakun pasaq watachö 248.327 bautizakuyanqanta: tsë ninanqa ¡huk hunaqllachömi bautizakuyashqa 680 nunakunapitapis más! Tsëmi imanöpapis kallpachakïkäshun willapäkïnintsikta alleq ruranapaq.