Alli yachatsikoq kë: yachakïta munaqkunapa jutinkunata apuntë

“Alli alkäbu kë rurënikipita y yachatsikïnikipitapis.” (1 Tim. 4:16, NM.) Atska watapana o tsëllaraq Diospita yachatsikoq kashqapis, Timoteuta Pablu consejanqanmi mas alli yachatsikoq kanantsikpaq yanapamantsik. Tsërëkurmi, Diospita Yachatsikunapaq kaqchö “Alli yachatsikoq kë” neq mushoq yachatsikï yarqamunqa. Cada yachatsikïmi imachö mas alliyänapaq kaqta y imanö ruranapaq kaqta rikätsimäshun. Tsëmi cada killachö tsë yachatsikï ninqannö ruranapaq kallpachakunantsik. Jina Diospa Gobiernumpita Yachatsikunapaq reunionchömi imanö yanapamanqantsikta parlakurita puëdishun. Kananqa yachakïta munaqkunachö rikanqantsikta registru höjaman alli apuntanapaqmi yachakurishun.

¿Imanirtaq alläpa precisan? Noqantsikqa nunakunata yachatsinapaqmi carguta chaskirquntsik. Peru tsëta cumplinapaqqa, yachakïta munaq nunakunamanmi kutinantsik y imëka murunqantsikta parqoq cuentam rasumpa kaqpita yachatsinantsik (Mat. 28:19, 20; 1 Cor. 3:6-9). Yachakïta munaq nunakunaman kutirninqa, yarpachakuyanqampitam parlapänantsik y puntata parlapanqantsikta yanapanampaqmi mastana yachatsinantsik. Tsëmi precisan pipis mas yachakïta munaptinqa juk registru höjaman apuntanantsik.