Murunqantsik winanampaq parqushun
1. ¿Imanirtaq Diospita yachakïkaqkunaman parqoq cuenta kutinantsik?
1 Murunqantsik winanampaqqa alläpam precisan parqunantsik. Hina tsënöllam ruranantsik territoriontsikchö nunakunata Diospita rasumpa kaqta yachatsirnimpis (1 Cor. 3:6). Tsëmi wiyakïta munaqkunaman watukaq kutinantsik, tsënöpa Diospa Palabranta yakutanö pëkunapaq apanantsikpaq. Tsëqa huk alli watsiyoq o matsuyog plantanömi alli winayanqa y wayuyanqapis.
2. ¿Imatataq rurashwan wayiyoqkuna kutinata munayänampaq?
2 Huk tapukïta haqi. Yachatsikunëkipaq preparakurninqa, yarpakachänëkim huknin semänapaq huk tapukïta haqinëkipaq kaqman. Manaraq parlar usharninmi huk tapukïta ruranëki, y huknin semana tsë tapukïpita parlariyänëkipaqmi awnirinëki. Wakinkunataqa Yachatsikun libropa tapukïninkunata rurëmi alläpa yanapashqa, tsënöpam estudio biblicotapis qallayashqa.
3. Pillapis yachakïta munaptinqa, ¿imakunatataq registroman qellqankiman?
3 Huk registrota apë. Punta visïtallachömi qellqanëki shutinta, mëchö täranqanta, parlayanqëki hunaqta, visitanqëki hörata, imapita parlapanqëkita y mëqan publicacionta haqipunqëkitapis. Hina itsa precisanqa ima religionpita kanqanta, familiayoq kanqanta y imapita parlëta munanqanta qellqanëkipis. Tsë llapanta qellqanqëkim watukaq kutiptiki yanapashunki. Y manam qellqëta qonqanëkitsu imë kutinëkipaq kaqta y ima tapukïta haqinqëkitapis.
4. ¿Imanirtaq kutishwan yachakïta munaqkunaman?
4 Ama haqitsu. Nunakuna ‘alli willaquita chasquiyashqantam diabluqa pasepa qonqaratsïta’ tïranqa (Mar. 4:14, 15). Tsëmi nunakunapa wayinman kutirnin mana tarirninqa, ama haqirïkïtsu. Itsa huk cartata apatsinkiman o imallamampis qellqëkur wayinchö haqirinkiman. Huk precursöram estudio biblicota qallarqan huk warmiwan wayin punkuchö, pero kutirnin mana tarirnam huk cartata apatsirqan. Tsëpita wayinchö taririptinnam tsë warmi agradecirqan cartata apatsinqampita. Diospa yachatsikïninta huk murushqa mikïtanö parqushqaqa, “imeca espigacho quima chunca (30) granucunapayan, joqta chuncapayan (60) y pachacpayan (100) wayïcoq” cuentatam rikäshun (Mar. 4:20).