¿Imanötaq Jehoväpa rikënimpaq këkä?
1. ¿Imachötaq Bibliaqa juk espëju cuenta?
1 ¿Ëka kutitaq rikäkunki espëjuchö? Cäsi llapantsikmi cada junaq rikäkuntsik, porqui tsëmi yanapamantsik shumaq altsapashqa purinapaq. Bibliataqa igualatsita puëdintsik juk espëjutawanmi. Leyinqantsikqa yanapamantsik imanö nuna kanqantsikta musyanapaqmi (1 Sam. 16:7; Sant. 1:22-24). Diospa Palabranqa ‘puëdinmi pensëkunata y shonqupa munëninkunata musyatsikïta’ (Heb. 4:12, NM). Llapan junaqkuna Bibliata leyinqantsik y tsëman yarpachakunqantsikqa, yanapamäshun mas alli yachatsikoq kanapaq y imachö pishipëkanqantsikta musyanapaqmi. ¿Imanirtaq tsëta nintsik? (Sal. 1:1-3.)
2. ¿Imanötaq Biblia yanapamashwan imanö këkanqantsikta musyanapaq?
2 Bibliata utilisë juk espëjutanö. Jehoväta mana jaqita sirweqkunapaq Biblia willakunqanmi, yanapamantsik Jehoväpa rikënimpaq imanö nuna kë precisanqanta musyanapaq. Tantiyarinapaq, rey Davidqa Diosllapaq kanqantam rikätsikurqan (1 Sam. 17:45, 46). Profëta Isaïasnam wiyakïta mana munaq nunankunata valorwan yachatsikurqan (Is. 6:8, 9). Teytanta alläpa kuyarninmi Jesusqa Diospita yachatsikïtaqa kallpata qoqnintanö y kushitseqnintanö rikarqan, y manam utitseqnintanötsu (Juan 4:34). Punta cristiänukunaqa llapan shonqunkunawanmi yachatsikuyarqan, Jehoväman markäkuyarqan y decidiyarqan imëpis tsënö rurayänampaqmi (Hëch. 5:41, 42; 2 Cor. 4:1; 2 Tim. 4:17). Tsëkunaman yarpachakunqantsikmi yanapamäshun imanö këkanqantsikta musyanapaq y Diospa kaqchö mas alli yanapanakunapaq.
3. ¿Imanirtaq raslla cambiukunata ruranantsik?
3 Pishipanqëkikunachö kallpachakï. Espëjuchö rikäkunqantsikqa, manam imapaqpis sirwinmantsu rikapäkurir ëwakurnin imanöpis kanqantsikta qonqarishqaqa. Jehovätam yanapakïninta mañakushwan imanö këkanqantsikta rikänapaq y cambiukunata rurar kallpachakunapaqpis (Sal. 139:23, 24; Lüc. 11:13). Kë mundu ushakänampaq ichikllana pishiptinmi kawënintsik peligruchö këkan, tsëmi raslla cambiukunata ruranantsik (1 Cor. 7:29; 1 Tim. 4:16).
4. ¿Imataq pasakun juk nuna espëjuchö rikäkurir imanö këkanqanta altsakuriptin?
4 Imanö nuna kanqantsikmi masqa precisan, janapa imanö kanqantsikpitapis (1 Pëd. 3:3, 4). ¿Imataq pasakun juk nuna espëjuchö rikäkurir imanö këkanqanta altsakuriptin? Tsë nunaqa “manam wiyarir qonqareq nunanötsu, sinöqa ley ninqanta ruraqmi, tsëta rurarqa kushishqam kanqa” (Sant. 1:25, NM). Awmi tsënö karqa, Diospa kushishqa sirweqninkunam kashun y Jehoväpa ‘alli quenintam juc espeju cuenta nunacunata ricatsishun’ (2 Cor. 3:18).