Unëna yachatsikoq publicadorkunapita yachakushun

Unëna yachatsikoq publicadorkunaqa juk bendicionmi kayan. Wakinkunaqa atska tiempupanam Jehoväta sirwiyan. Wakinkunanam tsëraq alli yachatsikoq tikrayashqa. Llapankunam cuentata qokuyashqa kë ushanan junaqkunachöqa Jesucristu congregacionta pushëkanqanta y yachatsikïta mas mirëkätsinqanta (Mat. 28:19, 20). Atska tiempupana yachatsikurmi rikäyashqa imëka mana allikunata pasayanqanchö Jehovä yanapashqanta (2 Cor. 4:7, NM). Pëkunataqa yachakuyanqampitam wakinkunata yachatsita gustayan y noqantsikpis pëkunapita yachakïta puëdintsikmi (Sal. 71:18). ¿Imanötaq tsëta rurashwan?

Yachatsikunqantsik höra. Mushoq yachatsikoqkunaqa wanayan unëna yachatsikoqkuna yachatsiyänantam. Y tsëtaqa yachakuyanqa imanö yachatsikuyanqanta rikarmi. (Rikäri 2015 wata 15 febrëru Täpakoq revistachö “¿Imanötaq yachatsikïnintsikchö imëpis kushishqalla kashwan?” neq yachatsikïpa kima kaq pärrafunchö “Mushoq publicadorkunata yanapë” nishqanta.) ¿Imatataq yachakurqunki unëna yachatsikoq publicadorkunawan yachatsikurnin?

¿Manatsuraq qamwan yachatsikoq yarquyänampaq mëqanllatapis invitarinkiman? Unëna yachatsikoq publicador qeshyaptinqa, ¿imanirtaq wayinman apankitsu Bibliapita yachëkätsinqëkita tsëchö yachakuriyänëkipaq? Yachatsikur usharirna, unëna yachatsikoq publicadorta imata pensanqanta tapuri y ima consëjullatapis mañakuri.

Pëkunawan tiemputa jorqë. Tsë publicadorkunata mas alli reqinëkipaq kallpachakï. Diosta Adorana Hörata ruranqëkiman invitë y Jehoväta imanö reqinqanta, imanö bendicinqanta, Testïgu kanqampita congregacion imanö winanqanta y Jehoväta sirwinqanchö ima allikuna pasanqampita willakaramunampaq tapuri. Tsë publicador qeshyaptinqa, allichi kanman wayinchö Diosta Adorana Hörata rurayaptikiqa.

Pëkuna imëkata rurëta manana puëdiyanqanta entiendi. Noqantsiknöllam unëna yachatsikoqkunapis tukï rurëta yachayan (Rom. 12:6-8). Wakinkunaqa edänam kayan, tsërëkurmi alläpaqa yanapamënintsikta puëdiyannatsu. Tsënö kaptimpis, pëkuna yachëpa rurayanqanta y mana jaqipa Jehoväta sirwiyanqantaqa musyantsikmi.