DIOS MUNANQANNÖ KAWANAPAQ

Tukï idiömata parlaqkunata yachatsinapaq llapantsik yanapanakushun

Juk wawqim warminwan yachatsikïkarnin juk idiömata parlaq nunatawan wamranta tariyashqa

Yurikuyanqampita patsë parlayanqan idiömachö alli willakïkunata wiyarirqa, mas kushishqam nunakuna sientikuyan. Tsëchi hebreu o griëgu idiömata parlëkäyaptimpis, Jehoväqa permitirqan 33 wata Pentecostes fiestachö më tsë nacionkunapita judïukuna, kikinkunapa idiömankunachö alli willakïkunata wiyayänanta (Hch 2:5, 8). Kanampis tukï idiömata parlaq atska congregacionkunam kan, y tsë sitiullachömi llapampis tukï idiömata parlaqkunata yachatsiyan. Tsëqa ¿imataraq rurayanman idiömankunata mana parlaq nunakunata kutin kutin yachatsirnin mana piñatsiyänampaq?

Parlayänanmi (Pr 15:22): Tsë congregacionkunapita yachatsikuyanqanta rikaq anciänukunam, imanö yachatsikuyänampaq kaqta shumaq patsätsiyänan. Cada congregacionpam yachatsikuyänan sitiunkuna kayäpun, itsa tsë sitiukunachö wallkaqlla kayaptinqa munayanqatsu juk idiömata parlaq nunakunata tsëchö ashiyänanta. Peru tsë sitiukuna alläpa jatun kaptin y höra höralla yachatsikoq ëwayaptinqa, itsapis munayanqa llapan wayikunachö yachatsikunantsikta y yachakïta munaq nunakunata tarirqa willarinantsikta (od-S päg. 93 pärr. 37). O itsa munayanqa tsë congregacionchö parlayanqan idiömata parlaqkunata ashir yanapanantsikta, tsënöpa tsë markakunachöpis yachatsikuyänampaq (km-S 7/12 päg. 5, recuadruta). Peru këtam yarpänantsik itsa juk wayillachö tukï idiömata parlayanman. Tsëmi yachatsikunapaq jutinkunata y mëchö täräyanqanta tapukurqa tsëpaq leykuna mandakunqanta cuentaman churanantsik.
Jukninkuna jukninkunam yanapanakuyänan (Ef 4:16): Yachatsikïta rikaq anciänukuna niyanqantam cäsukunantsik. ¿Pillatapis juk idiöma parlaqta yachëkätsinkiku? Tsëqa shonqunman alli willakïkuna mas ras chänampaqqa, idiömanchömi Bibliapita yachakunan. Tsëmi tsë idiömata parlayanqan congregacionchö o juk grüpuchö wawqikunata willarinëki Bibliapita yachatsir sïguiyänampaq.
Alleq preparakushun (Pr 15:28; 16:1): Yachatsikunqëki markakunachö juk idiömata parlaq nunata taririrqa idiömanchö yachatsita tïrë. Tsëpaqqa alleqmi musyanëki yachatsikunqëki sitiukunachö ima idiömakunata parlayanqanta y tsë idiömakunachömi Bibliata y juk videukunata jorqanëki. Jinamampis JW Language nishqantam utilizänëki tukï idiömachö saludakïta yachakunëkipaq.