Huk idiömata nunakuna parlayaptin
1. Territoriontsikchö yachatsikurnin, ¿imanirtaq shumaq yanapanakïta wanantsik?
1 Hinantin Patsapa yachatsikonqantsikchömi huk idioma parlaq nunakunata tarintsik, y pëkunapis Reinopita yachakïta munayanmi. Tsëmi, huk idiömachö Diospita yachatsiyänampaq wakin sucursalkunaqa, patsätsiyashqa grüpokunata y congregacionkunata. Täranqëkipa tukï idioma parlaq nunakuna kayaptenqa, itsa atska congregacionkuna tsë territoriollapa yachatsikuyan. Congregacionkuna, ¿imanötaq yanapanakuyanman shumaq yachatsikuyänampaq? (1 Cor. 14:33.)
2. Wayin wayin yachatsikurnin, ¿imanötaq yanapashwan huk idiömachö parlaq congregacionta o grüpota?
2 Alli yanapanakï: Cällekunapa o mëchöpis yachatsikïkarqa, llapan nunakunatam yachatsinantsik, y parlanqan idiomachömi publicacionninkunapis qonantsik. Wayin wayin ëwashqa, y territoriochö huk idiömapapis yachatsikuyaptenqa, parlanqantsik idiömata parlaq nunakunallatam ashinantsik. Huk territoriollachö atska congregacionkuna yachatsikorqa, registrokunatam alli apuntashqata katsiyänan, y yachatsikïta rikaq ancianokunapuram alleq parlayänan, llapankuna shumaq yachatsikuyänampaq (Pro. 11:14). Tsënö kaptimpis, wayin wayin ëwanqancho huk wawqi o pani huk idiömata parlaq nunata tariptenqa, y täranqampa, tsë idiömachö yachatsikoq congregación mana kaptenqa, imëkanöpis yachatsinanmi wiyakïta munaptenqa.
3. ¿Imataraq rurashwan tsë territoriollachö huk idiömata parlaq wawqi panikunawan tarinakorqa?
3 Hukllëllam yachatsikïnintsikqa: Huk hunaq ishkë congregación tsë territoriollachö yachatsikorqa, ¿imataraq rurayanman? Ima idiömata parlarpis kuyakïnintsiktam rikätsikunantsik, y puntataqa tsë territoriochö nunakunapaqmi yarpänantsik (Juan 13:34, 35). Wakin kaqkuna mëpa ëwayänantapis, yachatsikïta dirigeqkunam shumaq rikäyänan (Sant. 3:17, 18).
4. ¿Ima textotaq kanan witsanchö cumplikëkan?
4 Diospa yachatsikïninta tukï idioma parlaq nunakuna yachakuyänampaq kaqtaqa, Biblia willakorqannam (Apo. 14:6, 7). Llapantsik shumaq parlëkur yachatsikurnenqa, manam kanqan wayillamantsu chäshun, y tukï idiömata parlëkäyaptimpis llapan nunakunamanmi alli noticiakunata chätsishun (Efe. 4:16).