Septiembri killachömi Bibliapita mëtsëchö yachatsikur qallashun

Kushishqa kawakushun neq follëtuwanmi septiembri killachö puëdinqantsikmannö llapan nunakunata Bibliapita yachatsinapaq nishun. Tsë killachöqa, precursor auxiliarkuna 30 hörakunapam Diospita yachatsikuyta puëdiyanqa. ¿Imanötan yachatsikushun?

• Parlapar qallanapaq kaq. Nunakuna Diospita yachakuyta munayänampaq Kushishqa kawakushun neq follëtupa ushananchö këkaqwan parlapar qallë, y Bibliapita imanö yachatsikunqantsikta niri. Pipis Diospita yachakuyta munaptin o pasaqkunachö alli wiyakushqa kaqkunata yapë watukë. Capaz Bibliapita yachakuyta munayarqantsu, peru kananqa kë follëtuwan y jukläyana yachatsikushqa yachakuyta yapë munayanqa. Kë follëtutaqa mana täräyanqan wayikunachöqa manam dejashuntsu, ni cartapa apatsishuntsu mana wiyakuyta munaqkunamanqa. Anciänukunata rikaq wawqikunam tsë killachö Diospita mas yachatsikunapaq reunionkunata patsätsiyämunqa.

• Jukläya yachatsikunapaq kaq. Congregacionchö carrïtuwan yachatsikurqa Kushishqa kawakushun neq follëtutam tsëman churayanqa. Juk nuna follëtuta qaranëkita munaptinqa, Bibliapita grätislla yachatsikunqantsikta niri. Y willari imanö Bibliapita yachatsikunqantsikta o juk junaq watukanëkipaq kaqta niri. Diospita yachatsikunqantsikta rikaq anciänum, wakin wawqi panikunata rantikuyanqan sitiukunachö Bibliapita yachatsikur qallayänampaq ninqa. Y mëchöpis Diospita yachatsikurninqa trabajaq mayikikunata o jukkunata Bibliapita yachatsiyänëkipaq niyë.

Jesusmi nirqan, llapan nunakunata yachatsiyë qatimaqnïkuna tikrayänampaq (Mt 28:19, 20). Septiembri killachö Bibliapita mëtsëchö yachatsikur Kushishqa kawakushun neq follëtuwan Jesus mandakunqanta cumplinapaqmi kallpachakushun.