Leyeqkuna tapukuyanqan
¿Imatataq Jehoväqa gobiernukunata pensatsinqa?
Alläpa sufrimientu qallanan witsampaqmi Apocalipsis 17:16, 17 kënö nin: “Chunka waqrakuna y mantsëpaq chukaru animalmi, qellëpaqrëkur jukwan jukwan kakoq warmita chikiyanqa, y imannaqta y qalapächutam dejayanqa. Ëtsantam mikukurkuyanqa, y pëtanam ninawan ushakätsiyanqa. Kikin Teyta Diosmi pensanqanta rurayänampaq, tsë pensëta shonqunkunaman churarqan, awmi, Teyta Diosmi permitirqan pë ninqankuna cumplikanqanyaq, mantsëpaq chukaru animalta autoridäninkunata entregar logrëta munayanqanta rurayänampaq”. Puntataqa entiendirquntsik, llapan mana alli religionkunata ushakätsita munayänampaq gobiernukunata Jehovä pensatsinampaq kaqtam.
Peru kananqa juknöpanam entiendintsik. Apocalipsis libruchö, Diosmi “tsë pensëta shonqunkunaman” churanqa nirqa, manam mana alli religionkunata gobiernukuna ushakätsita munayänampaqtsu parlëkan, sinöqa poderninkunata o autoridäninkunata gobiernukuna ‘chukaru animalta’ entreguëta munayänampaq kaqtam. Peru ¿imanötan tsëqa cumplikanqa? Tsëta entiendinapaq pitsqa tapukuykunata contestarishun.
¿Pikunapaqtan Apocalipsis libruchö parlëkan? 1) “Jukwan jukwan kakoq warmipaqmi” o “puëdeq Babiloniapaqmi”, tsëqa entëru Patsachö mana alli religionkunam kayan. 2) “Mantsëpaq puka color chukaru animalpaqmi”, tsëqa Sociedad de Naciones niyanqanmi, tsëtaqa entëru Patsachö yamë kawakuyta munarmi 1919 watachö patsätsiyarqan, peru kananqa Organizacion de las Naciones Unidas nirmi reqintsik (Apoc. 17:3-5). Y 3) “chunka waqrakunapaqmi”, tsëqa mantsëpaq chukaru animalta yanapaq gobiernukunam kayan.
¿Imanirtan Bibliachö nin mantsëpaq chukaru animalpa jananchö, jukwan jukwan kakoq warmi jamarëkanqanta? Tsënöqa nin chukaru animalta tsë warmi yanapaptinmi y munanqanta ruratsiptinmi.
¿Imaraq pasanqa jukwan jukwan kakoq warmita? ‘Mantsëpaq chukaru animalwan’ ‘chunka waqrakunam’ tsë warmita chikiyanqa, imëka riquëzankunatam qechuyanqa o qochiyanqa y mana allita ruranqankunatam musyatsikuyanqa. Y tsëpitanam tsë warmita ushakätsiyanqa (Apoc. 17:1; 18:8). Tsënömi llapan mana alli religionkuna ushakäyanqa. Peru tsë manaraq pasakuptinmi, Jehovä Diosnintsikqa imëpis mana rurayanqanta gobiernukunata ruratsinqa.
¿Imataraq gobiernukunata Jehovä pensatsinqa? Jehovämi gobiernukunata pensatsinqa, autoridäninkunata mantsëpaq chukaru animalta o Naciönes Unïdasta entregayänampaq (Apoc. 17:13). Peru ¿gobiernukunaqa kikinkuna munarku Naciönes Unïdasta autoridäninkunata entregayanqa? Manam. Diospa palabranmi nin Jehovä pensatsishqa kaptin entregayänampaq kaqta. (Prov. 21:1; igualatsi Isaïas 44:28 textutawan). ¿Y gobiernukunaqa tsë autoridäninkunata ichikllapa ichikllapatsuraq entregayanqa? Manam, tsëpa rantinqa illaqpitam entregayanqa. Gobiernukunapita autoridäta chaskirirnam, Naciönes Unïdasqa llapan mana alli religionkunata chipyëpa ushakätsinqa.
Tsëqa, ¿imaraq shamoq tiempuchö pasakunqa? Manam shuyaränantsiktsu Naciönes Unïdasta, gobiernukuna ichikllapa ichikllapa yanapëkäyanqanta noticiakunachö willakayämunanta. Tsëpa rantinqa, Jehovä pensatsiptinmi gobiernukunaqa autoridäninkunata chukaru animalta illaqpita entregayanqa. Tsë autoridäta entregariyaptinqa, imë höra karpis alläpa sufrimientu qallëkunampaq kaqtam shuyaränantsik. Peru tsëyaqqa, “alkäbu alkäbu këkäshun y imëpis alli juiciuyoq këkäshun”. ¡Ichikllachönam imëka cambiukunapis kanqa! (1 Tes. 5:6).