¿Imatataq rikämarnintsik wakinkuna yachakuyan?
1. ¿Imatataq Jesuspita qateqninkuna yachakuyarqan?
1 Noqawan ‘yügüta apayë, i yachakuyë noqapita’ nirqanmi Jesusqa (Mat. 11:29, QKW). Pëqa ninqannöllam imatapis ruraq, tsëmi wakinkuna yachakuyaq. Pensari ruranqanta rikar qateqninkuna yachakuyanqanman. Pëqa ankupäkoq y alläpa kuyakoq nunam karqan (Mat. 8:1-3; Mar. 6:30-34). Hina manam allitukoq nunatsu karqan (Juan 13:2-5). Yachatsikïman yanaqarmi, qateqninkunaqa rikäyarqan mana utishpa Jesus yachatsikunqanta (Luc. 8:1; 21:37, 38). ¿Y yachatsikunqantsikta rikämaqnintsikkuna ima niyantaq?
2. ¿Imapaqtaq nunakunata yanapanqa shumaq vestikonqantsik y alli portakunqantsik?
2 Yachatsinqantsik nunakuna. Shumaq vestikonqantsik, respetakoq kanqantsik y kuyakoq kanqantsikpis nunakunata yanapanmanmi pëkuna tsënölla rurayänampaq (2 Cor. 6:3; Fili. 1:27). Hina kikin Bibliapita yachatsikunqantsikta cuentata qokuyanmi, y parlayämuptin shumaq wiyashqapis kushikuyanmi. Diospita yachatsikushqa nunakuna wiyamänapaqqa, këkunata ruranantsikmi alläpa precisan.
3. ¿Imanötaq yanapashwan wawqintsikkunata y panintsikkunata?
3 Wawqikuna y panikunapis yachakuyanqam. Hina wawqikuna panikuna noqantsikpita yachakuyänampaq kaqman pensari. Diospita alli yachatsikoq kanqantsikta rikämarnintsikqa, wakinkunapis tsënöllam rurayanqa. Imanömi fierro huk fiërrota afilan, tsënöllam yachatsikoq yarqunapaq alli yachakunqantsikqa, “afilaq cuenta” wakinkunata yanapanqa (Pro. 27:17). Yachakï munaqkunapa shutinta, mëchö täranqantapis alli qellqanqantsikta y yachatseq ras kutinqantsikta rikarqa, pëkunapis tsënöllam rurayanqa. Diospa willakïninta alli yachatsikunqantsikta wawqintsikkuna y panintsikkuna rikämarnintsikmi yachakuyanqa (2 Tim. 4:5).
4. ¿Imatataq noqantsikpita wakinkuna yachakïkäyan?
4 Kënömi höraqa tapukunëki, ¿ruranqä y ninqä wakinkunata yanapëkantsuraq? Alli yachatsikoq kanqantsikqa Jehovätam kushitsin, y apóstol Pablunömi kashun, pëmi kënö nirqan: “Imanomi noqapis Jesucristu cawanqanno cawaquita tirecä, tsenolla qamcunapis yachacuyë” (1 Cor. 11:1).