Israelïtakunata Egiptopita Dios jorqan

EGIPTOCHÖ atska wata israelïtakuna alli kawakuyanqampitam mirëkuyashqa. Israelïtakunata alläpatanö faraón rikarnam esclavo kayänampaq, y ollqu yureq wamrakunata Nilo mayuman jitarkuyänampaq mandakurqan. Pero juk warmim, ollqu wamranta canastaman churëkur yakuchö jatusaq plantakunapa rurinman pakëkunaq. Y faraonpa warmi tsurin tarïkurnam, Moises nir jutiratsir reypa wayinchö wätakurqan.

Moises 40 watayoq këkarnam, israelïtata juk egipcio maqakïkaqta washanqanchö mana alliman jeqarkurqan, tsëmi juk markata qeshpikurqan. 80 watayoq këkaptinnam Egiptoman ëwar israelïtakuna libre yarquyänampaq faraonta mañakunampaq Diosnintsik mandarqan.

Faraón mana munaptinnam, chunka castïgokunawan Egiptota Dios castigarqan. Pero castïgokunata mana chaskiyänampaqmi, puntataqa Moiseswan faraonta willatseq. Pero faraonqa diostukurmi Moiseswan y Jehoväwan más piñakoq.  Y chunka kaq castïgochönam angelninta Dios kacharqan Egiptochö llapan mayor ollqu wamrakunata wanutsinampaq. Y Jehoväta wiyakurnin üshata pishtarir yawarninwan punkunkunata jiruroq llusheqkunallatam Diospa angelninqa wanutseqtsu. Këta imëpis yarpäyänampaqmi israelïtakuna watachö juk kuti Pascuata celebrar qallëkuyarqan.

Faraonqa mayor kaq tsurin wanuriptinran israelïtakuna Moiseswan ëwakuyänanta jaqirirqan. Tsënam tsë markapita ëwakuyänampaq alistapakur qallëkuyarqan. Pero faraonqa ruranqampita pësakurmi soldädonkunawan y guërrapaq cärronkunawan qatiparqan. Y israelïtakuna puka lamarpa kuchunman chärirnam mëpapis ëwëta mana puëdeqnö këkäyarqan. Pero Jehoväqa lamarpa pasayänampaqmi tsaki nänita kicharirqan. Y egipciokuna qepankunata yëkuriyaptinnam, kicharëkaq lamarqa janankunaman jeqarkurqan, y tsëchömi faraónwan llapan soldädonkuna wanuyarqan.

Tsëpitanam israelïtakuna Sinaí jirkamampa täräyarqan, y tsëchömi pëkunawan Jehová juk conträtota rurarqan. Alli kawakuyänampaqmi Jehová israelïtakunata Moisestawan willatsirqan, y imëka mana allikunapita tsapänampaqmi leykunata qorqan. Diosllata sirwiyaptin y mandakunqanta wiyakuyaptinqa yanapanmanmi karqan, y pëkunarëkurmi wakin nacionkuna bendecishqa kayanman karqan.

Pero wakinkunaqa pëman markäkuyanqanta o yärakuyanganta manam rikätsikuyarqantsu. Tsëmi tsunyaqchö 40 wata puriyänampaq Diosnintsik castigarqan. Tsëpitanam Moisesqa Josuëta churarqan israelïtakunata pushanampaq. Y Abrahanta Dios awninqan patsaman israelïtakuna yëkuyänampaq höra chärirqanmi.

(Éxodo, Levítico, Números, Deuteronomio, Salmo 136:10-15 y Hechos 7:17-36 textokunapita jorqakashqam.)