Diosman witi
Diospa más hatun kuyakïnin
ABRAHANQA Diosta alläpam kuyarqan, y awkinllana këkaptin yurenqan tsurin Isaactapis kuyarqanmi. Huk kutim, Isaac 25 watayoqnöna këkaptin, alläpa sasa pruëbaman Abrahan charqan: Diosmi wambranta sacrificiochö qoykunampaq nerqan. Tsënö karpis, wanutsinanna këkaptinmi, huk angelwan Dios micharqan Isaacta mana wanutsinampaq. ¿Kë Génesis 22:1-18 textochö nenqan imallachöpis yanapamantsiktsuraq? Awmi, këchömi Jehová rikätsikorqan alläpa kuyamarnintsik tsëpita ruranampaq kaqta.
Qallanan kaq versïculochömi kënö nin: “Abrahantam pruëbaman rasumpa kaq Dios churarqan”. Abrahanqa paqwë Jehoväman markäkoq o yärakoqmi karqan, tsëtam sacrificiota rurar rikätsikunan karqan. Jehovämi kënö nerqan: “Wambrëkita pusharillë, kuyanqëki hapallan wambrëki Isaacta, y [...] noqam rikätsishqëki mëqan hirkatapis tsëchö kayashqa ofrendatanö qaramänëkipaq” (versículo 2). Diosqa, pruëbachö mana tsarakonqantsikyaqqa manam haqimäshuntsu, y ruranampaq kaqman markäkurmi o yärakurmi Abrahantaqa tsëta mañarqan (1 Corintios 10:13).
Kë fiel nunaqa Dios nenqannöllam rurarqan. Biblia nenqannöpis “tsaqa tsaqallam shärikurerqan y ashnunta karunapakorqan y ishkë sirveqnintawan tsurin Isaacta nerqan ëwayänampaq; hina yamtata tseqtarqan ofrendapaq. Tsëpitanam viajar qallëkorqan” (versículo 3). Imata ruranampaq kaqtapis mana ni pita willar imachi Abrahan ewkorqan.
Kima hunaq ëwëkarqa, mëraq yarpachakorqan ima ruraq ëwëkanqantapis. Tsënö karpis, Diosllata wiyakunampaqmi churakashqa karqan. Ëwëkanqan hirkata rikärirnam, Jehoväman alläpa markäkonqanta rikätsikorqan sirveqninkunata kënö nir: “Këllachö këkäyë [...], noqawan wambraqa taqë washatam adoraq ëwarita munayä, tsëpitanam këllaman kutirayämushaq”. Ima ofrendata ruranampaq kaqtapis wambran Isaac tapuriptinmi, “Diosmi üshata churamonqa” nerqan teytan (5 y 8 versïculokuna). Abrahanqa kawëkaq wambranwan kutimïtam shuyararqan. ¿Imanötaq tsëta musyantsik? Hebreus 11:19 textochömi kënö nin: ‘Abrahamqa musyarqanmi Diosnintsic poderyoq carnin [Isaacta] cawaritsimunanta’.
Hirkachö këkarnam, Abrahan ‘wambranta wanutsinampaq cuchillota tsaririptin’ huk ángel micharqan. Tsënam Dios huk üshata jachaman awrikäratserqan, “wambrampa rantin” Abrahan sacrificänampaq (10 a 13 versïculokuna). Diospa rikëninchöqa, Isaac sacrificashqa cuentam karqan (Hebreus 11:17). Huk estudiösom kënö nin: “Isaacta sacrificänampaq Abrahan listo këkanqanqa, imëka rasumpa sacrificashqa cuentanö karninmi Diospaqqa alläpa valoryoq karqan”.
Jehová shuyaranqannöllam Abrahanqa rurarqan. Y Diosqa bendecirqanmi: pëwan conträtota rurayanqantam yapë nerqan, y llapan nación nunakuna bendicionta chaskiyänampaqpis nerqanmi (15 a 18 versïculokuna).
Abrahan ruranampaq kaqta michëkarpis, kikin Diosmi sacrificiota rurarqan. Abrahan sacrificiota ruranampaq listo këkanqanmi rikätsikorqan, Jehová hutsantsikpita salvamänantsikrëkur hapallan wambranta qonampaq kaqta (Juan 3:16). Alläpa kuyakoq kanqantam Diosqa rikätsikorqan Tsurin Jesusta sacrificar. ¿Y noqantsikqa? ¿Diosta kushitsinantsikrëkur imakunata ruranapaqtaq listo këkantsik?