YAĈHAKUNA 22
¿Imanutaq wakinkunata Diosmanta parlayta puytinki?
Diospa palabranmanta kusa shumaqta yaĉhakurqa, qamqa ninkiman: “¡Tukuy runakuna kaytaqa yaĉhayta ministiyanllapa!” nir. Arí, tukuy runakuna kaytaqa yaĉhayta ministiyanllapa. Pero, yaĉhakushaykikunata wakinkunata parlanarqa manchakuyanki kanqa. Yaĉhakushunllapa kusala alegre Bibliapi yaĉhakushaykikunataqa wakinkunata parlanaykipaq ama manchakurchu.
1. ¿Imanutaq tukuy aylluykikunata, amigoykikunata ima yaĉhakushaykitaqa parlayta puytinki?
Jesuspa yaĉhachikuqninkunaqa niran: ʻManami nuqakunaqa uyarayta puytinillapachu rikashayllapamanta, uyapashayllapamantaʼ ima nir (Hechos 4:20). Diospa palabrantaqa kusalata munaqllapa, chayrayku tukuyta parlanaqllapa. ¿Chaynuchu qampis sintiyanki? Chaynu katinqa, respetowan amigoykikunata, aylluykikunata ima parlay yaĉhakuyashaykitaqa (liyiy Colosenses 4:6).
Parlaq qallariyta puytinaykipaq
Aylluykiwan parlarqa, kaynu niyta puytinki “Kay semana kay kusa shumaq imata yaĉhakuray” nir.
Uk amigoyki qischakayatin manaqa llakiyatin uk textowan animachiy.
Trabajoykipi imatataq kay semana rurashayki nir tapushutinllapaqa parlayta puytinki imatataq Bibliapiqa yaĉhakushayki, imatataq Jehová Diospa testigonkunapa tantakanan wasiman rir tantakarqa yaĉhakushayki ima nir.
Amigoykikunata rikachiy jw.org internetpi kaqta.
Wakinkunata invitay shamur qampaq pullayki Bibliamanta yaĉhakunanllapapaq manaqa yaĉhachiy imanutaq paykunalla Bibliamanta yaĉhakunarqa mañakuyta puytinanllapapaq jw.org internetpi.
2. ¿Imapaqtaq congregacionpi kaqkunawan yaĉhachikuq lluqshinkiman?
Jesuspa discipulonkunaqa mana riqsishanllapalatachu yaĉhachiqllapa. Bibliaqa nin: Jesusqa ʻchaynu akrarmi, ishkay ishkay kaĉharan paypa naypantaqa, chay tukuy pueblokunaman, lugarkunaman rinanpaq karan chaykunamanʼ (Lucas 10:1). Kaĉharan tukuy runakunata chaypi yaĉhachinanllapapaq, chaynu ruratinllapaqa kusala achka runakuna chay shumaq noticiakunamantaqa uyakuranllapa. Chaynullapis, Jesuspa yaĉhachikuqninkunaqa kusala alegre sintiyaranllapa Diosmanta pulla yaĉhachikurqa (Lucas 10:17). ¿Qampis congregacionpi kaqkunawan yaĉhachikuq lluqshinayankichu?
MAS INTRAKASHUNLLAPA
Rikashunllapa imataq yanapashunqa ama manchakurchu tukuyta parlanaykipaq, kusala alegre Diosmanta shumaq noticiakunata tukuy runakunata parlanaykipaq ima.
3. Jehová Diosmi yanapashunqa
Yaĉhachikuq lluqshinaqkunaqa manchakunllapa runakunaqa piñakunqallapa manaqa paykunamanta malta rimanqallapa manaqa burlakanqallapa ima nir.
Qamqa yaĉhakuyashaykikunata wakinkunata parlanayarqa, ¿manchakunkichu manaqachu mana? ¿Imapaqtaq?
VIDEOTA rikayllapa, chaymantaqa kaykunamanta parlayllapa:
Chay videopi rikashanchik musukunaqa, ¿imatataq ruraranllapa amana manchakunanllapapaqchu?
Liyiyllapa Isaías 41:10, chaymantaqa kaykunamanta parlayllapa:
¿Imapaqtaq Diosta mañankiman yaĉhachikunaykipaq manchakuyarqa?
¿Yaĉhayaraykichu?
Achka Jehová Diospa testigonkuna mana maydiapis yaĉhachikuyta puytishaqchu nir yarpuyaqllapa. Uk runa Sergey shutiqmanta yaĉhakushun, payqa kusalata manchakuyaq wakin runakunawan parlananpaq, chayrayku mana servinichu nir yarpuyaq. Pero, uk día Bibliamanta yaĉhakuq qallariran. Chaymi payqa nin: “Kusalata manchakuyarmapis animakuray tukuy yaĉhakuyashaykunataqa wakinkunata parlanaypaq. Chayta rurarqa kusala alegre nuqaqa sintiray, chaynullapis tukuy Bibliamanta yaĉhakuyashaykunaqa mas shunquyman ĉharan”.
4. Wakinkunata respetay
Wakinkunata yaĉhachinarqa naypaqtaqa yarpuy imatataq willashaq nir, chaymantaqa yarpuypis imanutaq willashaq nir. Liyiyllapa 2 Timoteo 2:24; 1 Pedro 3:15 ima, chaymantaqa kaykunamanta parlayllapa:
Wakinkunawan Bibliamanta parlanarqa, ¿imatataq rurankiman kay textokunapi liyishanchiknu?
Amigoykikuna, aylluykikuna ima qamta mana uyapashunatinqa, ¿imatataq rurankiman? ¿Imatataq ama rurankimanchu?
Bibliamanta yaĉhachirqa “kayta ruray” manaqa “kayta ama ruraychu” nir willanaykimantaqa, ¿imapaqtaq respetowan paykunawanqa parlaypaqllapa?
5. Diosmanta wakinkunata parlarqa kusalata alegriyanchik
Jehová Diosqa Jesusta willaran chay shumaq noticiakunataqa tukuyta parlananpaq. ¿Imanutaq Jesusqa chay trabajotaqa rikaq? Liyiyllapa Juan 4:34, chaymantaqa kaykunamanta parlayllapa:
Allita mikurqa mana qishashunchu, alegre kawsayta puytishun ima. Chaymi, ¿imapaqtaq Jesusqa wakinkunata yaĉhachirqa uk mikuyta mikuq yupay kanchik niran?
¿Ima ninkitaq? ¿Diosmanta yaĉhachikurqa alegre kawsayta puytinkimanchu? ¿Imapaqtaq?
Kaykunatapis rurayta puytinki
Reunionman rirqa, yaĉhakuy imanutaq wakinkunata parlaq qallariyta puytinkiman nir.
Bibliamanta yaĉhachishuqwan parlay naypaqman lluqshir yaĉhakuyta puytinaykipaq. Chaykuna yanapashunqa wakinkunawan parlaytaqa yaĉhakunaykipaq.
Kay libropi “Wakinkunaqa kaynu yarpunllapa”, “Wakinkunaqa kaynu nishunmanllapa” ima niqta rikay wakinkunata allita yaĉhachinaykipaq, allita intrachiyta puytinaykipaq ima.
WAKINKUNAQA KAYNU NISHUNMANLLAPA: “¿Imanutaq kanki? ¿Imatataq rurashayki?”.
Chaynu nishutinllapaqa, ¿imatataq niyta puytinki Bibliamanta yaĉhakuyashaykita parlanaykipaq?
KAYKUNATA YAĈHAKUSHANCHIK
Bibliamanta yaĉhachikurqa kusalata alegriyanchik, chaynullapis mana manchakurchu Bibliamantaqa yaĉhachikuyta puytinchik.
¿Ima ninkitaq?
¿Imapaqtaq wakinkunata Diosmanta parlankiman?
¿Imanutaq wakinkunataqa respetowan parlayta puytinki?
¿Imakunataq yanapashunqa ama manchakurchu wakinkunata parlanaykipaq?
MAS YAĈHAKUNAYKIPAQ
Rikakuy imanutaq uk tarjeta jw.org internetman yaykunanllapapaq chaywan yaĉhachikuyta puytinki nir.
Ideas para presentar la tarjeta de contacto de jw.org (1:43)
Liyiy imakunataq yanapashunqa Bibliamanta wakinkunata yaĉhachiyta puytinaykipaq nir.
“¿Está usted dispuesto a ser pescador de hombres?” (La Atalaya, septiembre de 2020)
Kay videota rikakuy musu katkimapis imataq yanapashunqa ama manchakurchu wakinkunata yaĉhachinaykipaq.
Liyiy aylluykikuna manaraq Jehová Diosta riqsiqkunawan Bibliamanta parlayta puytinaykipaq.
“Cómo llegarles al corazón a familiares no creyentes” (La Atalaya, 15 de marzo de 2014)