Jacobga y Esaunmi buenoyarca

Jehová Dios Isaac y Abrahanda cuidashca shinalladi, Jacobdash cuidasha nishmi shuj promesada rrurrarca. Jacobga Harán nishca ladobimi causangabu saquirirca. Shinalladi chaibi cazarashmi ashca huahuagunada charish rico tucurca.

Tiempo pasashca jipa, Jehová Dios Jacobdaga cashnami nirca: “Canbu yayamama charishca allpamun vueltai”. Jacobga Taita Diosda cazushmi paibu tucui familiaun vueltai callarinajurca. Pero ña rrinacujujpimi paida sirvij jarigunaga cashna nirca: “Canbu huauqui Esaumi 400 jarigunada apamush ñucunchigunaun tuparingabu shamujun”. Jacobga paibu familiada Esaú llaquichi pudishcada yuyashmi ashcada mancharirca. Chaimundami Jehová Diosda cashna mañarca: “Ñuca huauquimunda salvahuai”. Shinalladi chai caya funchami, Jacobga paibu huauqui Esaumun: ashca llamagunada, chitagunada, huagragunada, camellogunada y burrogunada convidallun cacharca.

Shinalladi chai tutami Jacobga sapa gajush, shuj angelda rricurca. Angelga Jacobhunmi funchayanagama peliarca. Pero Jacob tsugrishca gashash peliashmi catirca. Angelga cashnami nirca: “Ñucaga ñami rrina gani, cacharibai”. Pero Jacobga contestarca: “Na, ñucada bendicianagamami na cacharisha”.

Chaimi angelga Jacobda bendiciarca. Y chashna bendiciajpimi Jacobga paibu huauqui Esaumunda, Jehová Dios cuidana gashcadaga crirca.

Chai tutamundami Jacobga, Esaú y 400 jariguna caruda shamujujta rricurca. Esaun tuparingabumi Jacobga tucuigunamunda ñaupash rrirca y Jacobga paibu huauquibu ñaupujpi chayashaga, 7 vueltagamami cumurirca. Shinalladi Esauga callpash rrishmi paibu huauqui Jacobdaga ugllarirca. Ishquindipura ashcada huacashca jipami buenoyanajurca. Jacob paibu huauqui Esaun buenoyashcada Jehová Dios rricushaga, ¿imashinashi sintirishca ganga?

Chai jipa Esauga paibu huasimunmi vueltarca, y Jacobga pai rrijushca ladomunmi rrirca. Jacobga 12 huahuagunadami charirca, paigunaga: Rubén, Simeón, Leví, Judá, Dan, Neftalí, Gad, Aser, Isacar, Zabulón, José y Benjaminmi garca. Huaquin huataguna jipa, Jehová Diosga Jacobbu churigunamunda, Joseda agllash paida sirvijgunada salvana gashcadami huillarca, ¿imashina? Respuestadaga catij leccionbimi yachashun.