Septiembre

Jehová Diosca Jesusmanca gentecunapaj tucui llaquicunata tucuchichunmi achca poderta cushca. Achca llaquicunataca gentecunaca mana tucuchinata valinchijchu. Pero Jesusca milagrocunata rurashpami tucui llaquicunata tucuchi tucushcata ricuchirca. Caipi yuyashunchij. Gentecunaca juchayujcuna cashcamantami ungurinchij, huañunchij. Pero Jesusca juchacunamanta quishpichishpa jucha illaj tucuchunmi ayudai tucun (Mateo 9:​1-6; Romanos 5:​12, 18, 19). Paica tucui laya ungushcacunatami jambirca, huañushcacunatapishmi causachirca (Mateo 4:23; Juan 11:​43, 44). Shinallataj jatun acapanacunata jarcangapaj, millai demoniocunatapish tucuchingapajmi achca poderta charin (Marcos 4:​37-39; Lucas 8:2). ¿Jehová Dios achca poderta Jesusman cushcamantaca manachu dimastij contento sintirinchij? Diospaj Gobierno achca bendicioncunata apamunatami tucui shunguhuan cri tucunchij. Jesús achca milagrocunata rurashpaca Diospaj Gobiernopi mandacushpa cai tucui Allpaman achca bendicioncunata apamunatami ricuchirca. w23.04 págs. 3, 4 párrs. 5-7

Cambaj congregacionpica achca publicadorcunachari tiyan. Chaimantachari mana tanto comentariocunata cui tucungui. Maipica maquita mana alzashpa comentariocunata mana cunatachari decidishcangui. Pero ama saquirichu. Tandanacuicunapajca mana shuj comentariollatachu allichina cangui. Ashtahuan comentariocunata allichishpaca punta parrafocunapi mana comentai valishpapish, catij parrafocunapimi comentai tucungui. Huillaj revistapaj shuj yachaita estudiacushpapish cada parrafopaj yuyaicunatami alli intindina cangui. Chai yuyaicunata yuyarishpami yachaipi imallata yachachishcata intindina cangui. Chashnami chꞌican chꞌican parrafocunapaj alli comentai tucungui. Shinallataj sinchi yuyaicunata intindichingapajmi comentariocunata allichi tucungui. Chai sinchi yuyaicunamanta comentana horaspica huaquincunallami maquita alzancuna. Shinapish ¿mana shuj comentariota cushpaca imatataj rurai tucungui? Manaraj tandanacui callarijpica tandanacuita pushaj huauquimanca maijan parrafopi quiquin comentasha nishcatami huillai tucungui. w23.04 págs. 21, 22 párrs. 9, 10

Joseca siempremi Jehová Diosta cazuj carca. Chaimantami alli cusa tucurca. Por ejemplo, Jehová Diosca quimsa cutinmi paipaj familiata ima shina cuidanata nirca. Joseca mana jahualla cajpipish chai ratomi Jehová Diospaj mandashcacunata cazurca (Mateo 1:20; 2:​13-15, 19-21). Joseca Jehová Diosta tucuipi cazushcamantami Mariataca alli cuidai tucurca. Chaita ricushpami Mariaca Josetaca ashtahuan cꞌuyarca, respetarcapish. Cusacunapish José shinami familiata cuidangapajca Bibliapi nishcacunata pajtachina can. Bibliata estudiacushpaca huaquin cambiocunata rurana cashcatachari cuentata cunguichij. Chai cambiocunata rurajpica huarmica ashtahuanmi cꞌuyanga. Ashtahuancarin matrimonio ucupica cushillami causanguichij. Vanuatu llajtapi causaj shuj panica 20 huatacunatami cazada can. Paica: “Ñuca cusa Jehovapaj ayudata mashcajpi, paipaj mandashcacunata cazujpica paitaca ashtahuanmi respetani. Shinallataj pai ima decisionta japijpipish tranquila, cushillami sintirini” nircami. w23.05 pág. 21 párr. 5

Israelman tigraj judiocunaca Diospaj ñaupajpica jucha illaj pueblomi cana carca (Deuteronomio 7:6). Pero, ¿Babiloniamanta llujshij judiocunaca ñachu tucuita alli ruracurca? Mana. Paicunaca Diospaj ñaupajpi alli ricuringapajmi huaquin cambiocunata rurana carcacuna. Babiloniapi causaj judiocunaca casi tucuicunami chaipi huacharishcacuna carca. Chaimantami huaquincunaca Babiloniocuna shina causajcuna, yuyajcuna carca. Por ejemplo, huaquin judiocunaca Israelman tigrashca qꞌuipaca Diosta mana sirvij huarmicunahuanmi cazararcacuna. Chai huarmicunahuan charishca huahuacunaca hebreo shimitaca mana parlajcunachu carca. Nehemiasca chaita yachaj chayashpaca achcatami sustarirca (Deuteronomio 6:​6, 7; Nehemías 13:​23, 24). Chai punllacunapajca Diospaj Shimica casi tucuimi hebreo rimaillapi quillcashca carca. Chaimantami cai huahuacunaca Diosmantaca mana yachai tucurcacuna (Esdras 10:​3, 44). Shinashpaca chai judiocunaca achca cambiocunatami rurana carca. Pero Israelpi causacushcamantami chai cambiocunata ruranaca ashtahuan jahualla carca. Chaipica Diostaca ñami asha asha adorai callaricushcarcacuna (Nehemías 8:​8, 9). w23.05 pág. 15 párrs. 6, 7

Metacunata pajtachisha nijpipish jarcaicunami ricuri tucun. Por ejemplo, ima atraso japijpichari shuj metata pajtachingapajca ña mana tiempota charishun (Eclesiastés 9:11). Shinallataj problemacunamantami huaquinpica llaquilla sintirishun (Proverbios 24:10). Ashtahuanpish imapi pandarishcamantachari huaquin metacunataca ña mana pajtachi tucushun (Romanos 7:23). Huaquinpicarin shaicushca cashcamantami metacunataca ña mana pajtachinata munashun (Mateo 26:43). Pero ¿jarcaicuna ricurijpipish metacunata pajtachingapajca imatataj rurana canchij? Jarcaicuna ricurijpipish ñaupajman cati. Bibliapi nishca shinaca achca jarcaicunata, llaquicunatami charishun. Shinallataj Bibliapica, jarcaicuna ricurijpipish metacunata pajtachi tucushcatami huillan. Ñucanchijpish jarcaicuna ricurijpipish ñaupajmanmi catina canchij. Chashnami Jehová Diosta tucui shunguhuan cꞌuyashcata ricuchishun. Ñucanchij metacunata pajtachingapaj sinchita esforzarijta ricushpaca Yayitu Jehová Diosca cushillami sintiringa. w23.05 págs. 30, 31 párrs. 14, 15

Jovenmantapacha precursor shina sirvishpaca chꞌican chꞌican huauqui panicunahuan trabajanatami yachangui. Shinallataj minishtirishcallahuan causanata, cullquita alli yuyashpa gastanatami yachangui (Filipenses 4:​11-13). Manaraj precursor regular cashpaca precursor auxiliar shinami sirvi tucungui. Chashnami precursor regular shina sirvingapaj allichiringui. Precursor regular shina sirvishpaca Jehová Diostaca ashtahuanmi sirvi tucungui. Por ejemplo, Tandanacuna Huasicunata shayachishpa, mana cashpaca Betelpimi sirvi tucungui. Diosta sirvij huauquicunaca congregacionta pushajcuna tucungapajmi esforzarina can. Chashnami huauqui panicunataca ayudai tucungacuna. Bibliapi nishca shinaca congregacionta pushaj tucungapaj esforzarinaca allimi can (1 Timoteo 3:1). Shuj huauquica anciano shina manaraj sirvishpaca puntapica siervo ministerial cangapajmi requisitocunata pajtachina can. Siervo ministerialcunaca chꞌican chꞌican ruraicunapimi ancianocunata ayudancuna. Pero ancianocunapish, siervo ministerialcunapishmi mana jatun tucushpa huauqui panicunata ayudancuna. Paicunahuan huillanaman llujshingapajpishmi esforzarincuna. w23.12 págs. 27, 28 párrs. 14-16

Mandaj Josiasca jovenraj cashpami Jehová Diospajman cꞌuchuyai callarirca. Paica Jehová Diosta alli rijsinata, pai munashca shina causanatami munarca. Pero chai punllacunapica achca gentecunami yanga dioscunata adorajcuna carca. Chaimantami Josiaspajca Jehová Diosllata adoranaca sinchi cashcanga. Pero paica imata mana manchashpami tucuicuna Jehová Diosllata adorachun ayudarca. Chaimi manaraj 20 huatacunata charishpaca Judapi tiyaj yanga dioscunata, paicunata adorangapaj altarcunata chingachi callarirca (2 Crónicas 34:​1, 2). Canpish Josías shinami huahuamantapacha Jehová Diosta sirvi tucungui. Chaipajca Jehová Diospajman cꞌuchuyangapaj, pai ima shina cashcata yachangapajmi esforzarina cangui. Chaita rurashpami Jehová Diosman mingarinata munangui. ¿Jehová Diosman mingarishpaca ima shinataj sintiringui? Lukeca 14 huatacunata charishpami bautizarirca. Paica: “Bautizarishpaca Jehová Diosta ñuca causaipi punta lugarpi churana cashcata, paita cushichingapaj tucuita rurana cashcatami intindircani” nircami (Marcos 12:30). Canpish chaita rurashpaca achca bendicioncunatami chasquingui. w23.09 pág. 11 párrs. 12, 13

Apóstol Pablo Tesalonicapi caj huauqui panicunaman punta cartata cachajpica chai congregacionca recienllami tiyai callarishcarca. Chai congregacionta pushaj ancianocunapishmi asha experienciallata charishcangacuna. Chaimi huaquinpica pandarishcangacuna. Pero paicuna pandarijpipish huauqui panicunaca respetashpami catina carcacuna. Gran tribulación ñalla callaricujpica central mundialpi, sucursalpi caj huauquicuna cushca instruccioncunataca manachari chasqui tucushun. Chai punllacunapica ñucanchij congregacionta pushaj ancianocunata cazunaca ashtahuan minishtirishcami canga. Pero chai punllacunapi paicunata tucuipi cazungapajca cunanmantami cazunata, respetanata yachana canchij. Paicuna pandarishcacunallataca mana ricunachu canchij. Ashtahuanpish Jehová Dios paipaj Churita utilizashpa ancianocunata pushacushcatami yuyarina canchij. Ima shinami cascoca uma ama ima tucuchun ayudan, quishpichishca canata shuyanapishmi ñucanchij yuyaicunata cuidan. Chai esperanzata charishcamantami cai millai mundopi tucui imalla tiyashcacunataca imapaj mana valishcata shina ricunchij (Filipenses 3:8). Shinallataj chai esperanzami tranquilo, cushilla sintirichun ayudan. w23.06 págs. 11, 12 párrs. 11, 12

Huainayanapi urmachij tentacioncuna ricurijpi o ñapish pornografiacuna ricurijpica, ¿imatataj rurana canchij? ¿Huainayanamantaca imamantataj caruyana canchij? Proverbios libropica chꞌahuanyashca, yuyai illaj huarmica, ‘shuhuashca yacuca mishquimari’ ninmi (Proverbios. 9:17). Chai shuhuashca yacuca ¿imatataj ricuchin? Bibliapica, cusandij huarmindij chayarinacunaca ‘yacunaita parachij yacu shinami can’ ninmi (Proverbios 5:​15-18). Caipi nishca shinaca cazarashca cusa huarmica chayarinacushpami cushicuncuna. Pero Proverbios libropica ‘shuhuashca yacumanta’ parlashpaca huainayajcunamantami parlacun. Huainayajcunaca pacalla shuhuaj shinami casi siempre pacalla mapa ruraicunata rurancuna. Paicunapaj ruraicunata pi mana ricushcata yuyashpami mishqui yacuta ubyaj shina cushilla sintirincuna. Pero pandaricuncunami. Jehová Diosmi tucuita ricucun. Paimantaca pi mana burlari tucunchu. Paipaj ñaupajpi mana alli ricurishpaca jayaj yacuta ubyaj shinami llaqui causaita charishun (1 Corintios 6:​9, 10). w23.06 págs. 22, 23 párrs. 7-9

Bautizarishca qꞌuipaca quillacuna, huatacuna pasajpica Jehová Diosta ña mana tucui shunguhuan mañacushcata, paimanta huillacushpapish ña mana cushilla sintirishcatachari cuentata cungui. Pero chashna sintirishpaca Jehová Dios espíritu santota canman ña mana cucushcataca mana yuyanachu cangui. Juchayujcuna cashcamantami huaquinpica Diosmanta yachashpa catinataca ña mana tanto munanchij. Chaipica apóstol Pablopimi yuyana canchij. Paica Jesuspaj ejemplota catingapajmi sinchita esforzarij carca. Shinapish huaquinpica Jehová Diosta sirvishpa catina munaitaca mana tanto charishpapish chaita rurashpa catingapajmi esforzarishpa catirca. Shinashpaca ¿Jehová Diosta sirvina munaita charishpallachu paita sirvishpa catina cangui? Mana. Ashtahuanpish Jehová Diosta sirvina munaita mana charishpapish paita sirvishpa catingapajmi esforzarishpa catina cangui. Chaita rurangapaj esforzarijpica cambaj shungupica Jehová Diosta sirvina munaica ashtahuanmi mirashpa catinga (1 Corintios 9:16). w24.03 págs. 11, 12 párrs. 12, 13

¿Huauqui panicunata cꞌuyashcataca ima shinataj ricuchinchij? Paicunataca allimi chasquina canchij. Ashtahuan rijsingapajpishmi tiempota surcuna canchij (2 Corintios 6:​11-13). Congregacioncunapica chꞌican chꞌican huauqui panicunami tiyan. ¿Tucuicunahuan alli apanacungapaj, paicunata cꞌuyangapajpish imatataj rurana canchij? Paicunapaj alli cualidadcunatami ricuna canchij. Jatun llaqui punllacunapica huauqui panicunata cꞌuyanaca ashtahuan minishtirishcami canga. ¿Chai punllacunapi Jehová Dios ñucanchijta cuidachunca imatataj rurana canchij? Israelitacunapi yuyashunchij. Babilonia llajtata llaquichicujpica quishpiringapajca Jehová Dios nishcatami cazuna carcacuna. Paica: “Ñuca agllashcacunalla richij, cancunapaj huasiman yaicurichij. Pai alli tucungacama punguta huichcarishpa pungu huashapi ashacama miticuichij” nishpami mandarca (Isaías 26:20). Ñucanchijcunapish jatun llaqui punllacunapica cashna laya mandashcacunatachari cazuna tucushun. w23.07 págs. 6, 7 párrs. 14-16

Tucuicunami intindijcuna, respetajcuna cashcata ricuna can. Intindijcuna cashcata yachangapajca cashna nishpa tapuri: “¿Shujtajcunaca ñucata intindij cashcatachu yuyan? ¿Shujtajcuna munashca shina alli cajpica paicuna munashcatachu ñucapish rurani?”. Shujtajcunata intindingapaj mana esforzarishpaca Jehová Diospaj, Jesuspaj ejemplota mana caticushcatami ricuchishun. Ñucanchij causaipi cambiocuna tiyajpica huaquin jarcaicunahuanmi chꞌimbapurashun. Por ejemplo, ungüicunamanta, cullquimanta o gobiernocunapaj culpamantami causaipica llaquicunata chari tucunchij (Eclesiastés 9:11). Mana cashpaca shujtaj asignacionta cujpichari ashata preocuparishun. Pero ñucanchij causaipi cambiocuna tiyajpica cai chuscu yuyaicunatami pajtachina canchij: 1) ñaupa shina ña mana rurai tucushcata intindi, 2) ñaupajman cati, 3) allicunallapi yuyai y 4) shujtajcunata ayudai. w23.07 págs. 21, 22 párrs. 7, 8

Daniel joven cajpica babiloniocunaca prezu shinami caru llajtaman aparcacuna. Danielca shuj rijsishca familiamantami shamurca. Shinallataj paica ima mana ungushca, alli ñahuiyujmi carca. Chaita ricushpaca babiloniocunaca sorprendidosmi saquirircacuna (1 Samuel 16:7). Chaimantami paitaca Nabucodonosorpaj mandana huasipi sirvichun agllarcacuna (Daniel 1:​3, 4, 6). Jehová Diosca Danieltaca paita tucui shunguhuan sirvishcamantami cꞌuyarca. Chaimantami Noepish, Jobpish paita tucui shunguhuan sirvishcata parlashpaca Danielmantapish parlarca. Chai punllacunapi Danielca 20 o menos huatacunallatami charishcanga (Génesis 5:32; 6:​9, 10; Job 42:​16, 17; Ezequiel 14:14). Danielca huañungacamami Jehová Diosta sirvirca. Chaimantami Jehová Diosca paita cꞌuyanataca manataj saquirca (Daniel 10:​11, 19). w23.08 pág. 2 párrs. 1, 2

¿Shuj huasita randinata o mana randinataca ima shinataj decidingui? Seguramente chaiman chayashpaca canlla ladocunata, ucuman yaicushpa cada ucucuna ima shina cashcatami ricungui. Bibliata liyicushpa, estudiacushpaca chaillatatajmi rurana canchij. Bibliata apurado, jahua jahualla liyishpaca punta yachachishcacunallatami intindishun (Hebreos 5:12). Chaipaj randica chai huasita alli rijsicuj layami Bibliapi nishcacunata alli rijsingapaj, alli intindingapaj esforzarina canchij. Chaipajca shuj versopi imalla nishcacuna shujtaj versocunata alli intindingapaj ima shina ayudashcatami ricuna canchij. Ñucanchij crishcacuna imacunalla cashcata yachanaca allimi can. Pero chaicunapi imamanta crishcatapishmi alli intindina canchij. Bibliapi imalla nishcacunata alli intindingapajca jahualla yachaicunallataca mana estudianachu canchij. Ashtahuanpish sinchi yachaicunatapishmi estudiana canchij. Apóstol Pabloca Jesusta catijcunatami chaita rurachun animarca. Paica: ‘Chaita rurashpaca mana llulla yachaicunataca anchota, largota, jahuata, ucujtami alli intindi tucunguichij. Chashnami crishcapi sapiyashca shina, cimiento jahuapi alli huasichishca shina canguichij’ nircami (Efesios 3:​14-19). Ñucanchijpish chaitami rurana canchij. w23.10 págs. 18, 19 párrs. 1-3

Bibliapica Diosta sirvijcuna ima shina pacienciata charishcatami parlan. Paicunamanta yachangapaj tiempota surcushunchij. Por ejemplo, David jovenraj cajpimi Jehová Diosca mandaj cachun churarca. Pero mandaj cangapajca achca huatacunatami shuyana carca. Simeón, Anapish Mesías shamungacamaca Jehová Diostaca achca huatacunatami sirvircacuna (Lucas 2:​25, 36-38). Paicunamanta estudiacushpaca, “¿paicunaca pacienciata charingapajca imatataj rurarcacuna? ¿Pacienciata charishcamantaca ima bendicioncunatataj chasquircacuna? ¿Paicunamantaca imatataj yachai tucuni?” nishpa tapurishunchij. Pero Bibliapica mana pacienciata charijcunamantapishmi parlan. Paicunamantapishmi estudiana canchij (1 Samuel 13:​8-14). Pacienciata mana charijcunamanta estudiacushpaca, “¿paicunaca imamantataj mana pacienciata charircacuna? ¿Pacienciata mana charishcamantaca ima llaquicunallatataj charircacuna?” nishpa tapurishunchij. w23.08 pág. 25 párr. 15

Apóstol Pedroca Jehová Diostami tucui shunguhuan cꞌuyarca. Chaimantami pandarishpapish Diosmantaca manataj caruyarca. Por ejemplo, Jesús yachachishcacunata discipulocuna mana intindijpi Pedro imata rurashcata ricushun (Juan 6:68). Achcacuna Jesús yachachishcacunata mana intindishpaca chaicuna imata nisha nishcata tapunapaj randica Jesusmantami caruyarcacuna. Pero Pedroca chaitaca mana rurarcachu. Paica tucuicunapaj ñaupajpimi Jesustaca “canllami huiñai causaita cuj shimicunataca yachachingui” nirca. Jesusca paita prezu japi horasca Pedropish, caishuj discipulocunapish paita saquinatami yacharca. Pero Pedro paita cꞌuyashpa catinatami seguro carca (Lucas 22:​31, 32). Jesusca runacuna allita ruranata munashpapish ‘aichaca shaicurijlla’ cashcatami yacharca (Marcos 14:38). Caita yachashcamantami Jesusca Pedro paita negajpipish paipi confiashpa catirca. Chaimantami causarishca qꞌuipaca shuj cutinca Pedrollaman ricurishca yuyachin (Marcos 16:7; Lucas 24:34; 1 Corintios 15:5). Chaita rurashpami Jesusca Pedrotaca achcata animarca. w23.09 pág. 22 párrs. 9, 10

Cai versopi nishca shinaca Jehová Diosca paipi feta charijcunapaj juchacunatami perdonan. Paicuna pandarishcacunataca mana yuyaricunllachu (Salmo 32:​1, 2). Chaimantami paicunataca cashcata rurajta shina, ima juchachina illajta shina ricun. Jehová Dios Abrahanta, Davidta, shujtajcunatapish cashcata rurajcunata shina ricujpipish paicunaca juchayujcuna cashpami catircacuna. Pero paicuna sinchi feta charishcamantami Jehová Diosca ima juchachina illajta shina paicunataca ricurca. Ashtahuanpish millaita rurajcunahuan paicunata chꞌimbapurajpica paicunaca jucha illajcuna shinami carcacuna (Efesios 2:12). Shinashpaca Apóstol Pabloca Romanos libropica Jehová Diospaj amigocuna cangapaj sinchi feta charina cashcatami intindichirca. Chaimanta Abrahán shina, David shina sinchi feta charingapaj esforzarishunchij. w23.12 pág. 3 párrs. 6, 7

¿Ñucanchijcunaca Jehová Diosmanca ima shinataj sacrificiocunata cui tucunchij? Diospaj obra ñaupajman catichunmi ñucanchij tiempohuan, fuerzahuan, imalla charishcacunahuan apoyana canchij. Jehová Diosta tucui shunguhuan sirvingapaj esforzarishpaca paita adorana oportunidadta charishcamanta agradicishcatami ricuchishun. Apóstol Pabloca hebreocunaman cachashca cartapaj tucuri partepica imacunallapi ocuparina cashcatami nirca (Hebreos 10:​22-25). Por ejemplo, paica Diospaj punlla quichquiyamucushcamanta Jehová Diosta mañanata, ñucanchij esperanzamanta shujtajcunaman huillanata, huauqui panicunahuan tandanacunata, animanacunata manataj saquina cashcatami nirca. Shinallataj Apocalipsis libropaj tucuri capitulocunapica Jehová Diospaj angelca Diosta adorachunmi animan. Paica ishqui cutincuna chaita nishpami chaita rurana importante cashcata ricuchirca (Apocalipsis 19:10; 22:9). Diospaj huasi ima cashcata, paita adorana valishca cashcataca alajatami yachashcanchij. ¡Chaitaca amataj cungarishunchij! w23.10 pág. 29 párrs. 17, 18

Tucuicunami cai punllapaj versopi nishcata cazungapaj esforzarisha ninchij. Caipica: “Caishuj chaishuj cꞌuyanacushpa catishunchij” ninmi. Shinapish tucuri punllacunamanta parlacushpa Jesús imata nishcatami yuyarina canchij. Paica: “Achca gentecunapaj cꞌuyaica chiriyangami” nircami (Mateo 24:12). Jesusca chaita nishpaca casi tucui paita catijcuna paicunapura ña mana cꞌuyanacunataca mana nisha nircachu. Shinapish ¿imamantataj cuidadota charina canchij? Huauqui panicunata cꞌuyashpa catingapaj mana esforzarishpaca Diosta mana sirvijcuna shina cashcatami ricuchishun. Cunanca cai catij tapuitami cutichigrinchij: ¿Huauqui panicunata shungumanta cꞌuyajcuna cashcataca ima shinataj yachai tucunchij? Huauqui panicunata shungumanta cꞌuyajcuna cashcata yachangapajca huaquin problemacuna ricurijpi cada uno imata rurajcuna cashcatami ricuna canchij (2 Corintios 8:8). Por ejemplo, apóstol Pedroca: “Tucuimanta yallica shungumanta caishuj chaishuj cꞌuyaita ricuchinacuichij. Cꞌuyaita charijca achca juchacunata perdonangapajmi listo can” nircami (1 Pedro 4:8). Shinashpaca huauqui panicuna pandarijpi o ñucanchijta llaquichijpimi paicunata de verdad cꞌuyashcata ricuchinaca sinchi canga. w23.11 págs. 10, 11 párrs. 12, 13

Ñucanchijca tucui huauqui panicunata cꞌuyangapajmi esforzarina canchij. Mana tucui huauqui panicunata cꞌuyashcata ricuchishpaca Jesuspaj yachachishcacunata mana pajtachicushcatami ricuchishun. Tal vez maijan huauqui panicunahuanca ashtahuanmi apanacushun. Jesuspish maijan discipulocunahuanca ashtahuanmi apanacuj carca (Juan 13:23; 20:2). Pero apóstol Pedro nishca shinaca familia ucupi shina tucui huauqui panicunata cꞌuyashcata ricuchingapajmi esforzarina canchij (1 Pedro 2:17). Pedroca “caishuj chaishuj shungumanta ashtahuan cꞌuyanacuichij” nircami (1 Pedro 1:22). Shinashpaca huaquin huauqui panicunata cꞌuyashcata ricuchina mana jahualla cajpipish paicunata ashtahuan cꞌuyangapajmi esforzarina canchij. Por ejemplo, maijan huauqui o pani ñucanchijta llaquichijpica ¿imatataj ruranchijman? Tal vez paicunata cꞌuyashcata ricuchinapaj randica ñucanchijpishmi paicunata llaquichinata munashun. Pero chaita rurajpica Jehová Diosca mana cushicungachu. Jesusca chaitami Pedromanca yachachirca (Juan 18:​10, 11). Chaimi Pedroca, “mana allita rurajpipish ama mana allita rurashpa tigrachichijchu. Rimajpipish ama chashnallataj tigrachichijchu. Ashtahuanpish allicunata rurashpa tigrachichij” nishpa quillcarca (1 Pedro 3:9). Shinaca huauqui panicunata ashtahuan cꞌuyangapajmi esforzarina canchij. w23.09 págs. 28, 29 párrs. 9-11

Huahuacunaca ratomi huiñancuna ¿nachu? Pero espiritualmente huiñashpa catinaca mana chashnachu can (1 Corintios 13:11; Hebreos 6:1). Espiritualmente huiñashpa catingapajca Jehová Dioshuanmi alli apanacuna canchij. Shinallataj Diospaj espirituta chasquishpa alli cualidadcunata charingapaj, alli trabajajcuna cangapaj, qꞌuipa punllacunapi shujtaj ruraicunata alli pajtachingapajmi esforzarina canchij (Proverbios 1:5). Jehová Diosca cꞌaritapish huarmitapishmi rurarca (Génesis 1:27). Cꞌaripaj cuerpopish, huarmipaj cuerpopish chꞌicanmi can. Shinallataj Jehová Diosca cꞌaritapish, huarmitapish cada uno chꞌican chꞌican ruraicunata pajtachichunmi rurarca. Pero chai ruraicunata alli pajtachichunmi Jehová Diosca cada unoman chꞌican chꞌican cualidadcunata curca (Génesis 2:18). w23.12 pág. 18 párrs. 1, 2

¿Jesusca shujtaj gentecunapish paipaj Yayapaj shutita nichunchu munarca? Ari. Chai punllacunapica panda religionta pushajcunaca ‘Diospaj shuti yallitaj jucha illaj cashcamantami mana nina canchij’ nishpami yuyashcangacuna. Pero Diospaj Shimipica chaitaca mana yachachinchu. Chaimantami Jesusca chai costumbretaca mana catirca. Ashtahuanpish paica paipaj Yayapaj shutitami jatunyachishpa catirca. Por ejemplo, demoniocuna japishca runata Jesús jambijpica chaipi causaj gentecunaca achcata mancharishpami Jesustaca chaimanta richun mañarcacuna (Marcos 5:​16, 17). Pero Jesusca chai gentecuna Yaya Diospaj shutita yachachunmi munarca. Chaimantami manaraj rishpa pai jambishca runamanca ‘Jehová Dios canmanta imata rurashcata gentecunaman huillagri’ nirca (Marcos 5:19). Jesusca ñucanchijcunapish tucui gentecunaman Diospaj shutita yachachichunmi munan (Mateo 24:14; 28:20). Chaita rurajpica Jesusca cushillami sintiringa. w24.02 págs. 10, 11 párr. 10

Tucuri punllacunapi causacushcamantami ashtahuan llaquicunata charishun. Pero ñucanchij huauqui panicunahuan Jehová Diosta tandalla sirvicushcamantami cushilla causanchij (Salmo 133:1). Jehová Diospaj ayudahuanmi familia ucupipish cushilla causai tucunchij (Efesios 5:33–6:1). Shinallataj pai ñucanchijta ayudashcamantami ñucanchij llaquicunata chꞌimbapurashpa cushilla causai tucushcanchij. Tucuicunami Jehová Diosta tucui shunguhuan sirvishpa catingapaj esforzarishpa catina canchij. Shinapish huaquinpica chaita ruranaca mana jahuallachu canga. ¿Imamanta? Shujtajcuna paicunapaj rimashcacunahuan, rurashcacunahuan llaquichijpica achcatami llaquiri tucunchij. Mana cashpaca ñucanchij pandarishcacunallamantatajmi desanimari tucunchij. Chaillapitaj chaillapitaj pandarishpacarin ashtahuanmi llaquirishun. Chaimantami ñucanchij huauqui panicuna llaquichijpipish, ñucanchij cusa huarmi mana alli tratajpipish, ñucanchij pandarishcacunamanta llaquilla sintirishpapish Jehová Diosta sirvishpa catingapaj esforzarina canchij. w24.03 pág. 14 párrs. 1, 2

Huaquincunaca Escuela para Evangelizadores del Reinomanmi rishcacuna. Mana cashpaca shujtaj llajtacunapi, shujtaj ladocunapimi huillanaman rishcacuna. ¿Canpish chaita rurai tucunguichu? Diosta sirvijcunaca paimanta ashtahuan huillangapajmi imata ruranata mashcana canchij (Hechos 16:9). Pero cai rato chaita mana rurai tucushpaca Jehová Diospaj mana valishca cashcataca mana yuyanachu cangui. Paica can mana rurai pudishcata rurachunca mana munanchu. Ashtahuanpish tucuimanta yallica llaquicunata ahuantashpa catichunmi munan (Mateo 10:22). Yayitu Diosca tucui can rurai pudishcata ruracujta ricushpaca cushillami sintirin. Ashtahuantajca Jehová Diosta tucui shunguhuan sirvishpa catingapaj esforzarishpaca Jesustapish caticushcatami ricuchingui (Salmo 26:1). w24.03 págs. 10, 11 párr. 11

Yayitu Jehová Diosca ‘cancunapaj juchacunamanta shungumanta arrepintirijpica ñucaca perdonashami’ ninmi (Salmo 86:5). Shinashpaca shungumanta arrepintirishca cashpaca Jehová Dios canta perdonashcatami tucui shunguhuan crina cangui. Jehová Dios ñucanchij mana rurai pudishcata rurachun mana obligaj cashcatami yuyarina canchij. Paica ñucanchij rurai tucushcallata rurachunmi mañan. Chaimi ñucanchij esfuerzocuna uchilla o jatun cajpipish Jehová Diospajca achca valishca can. Shinallataj ñaupa tiempopi Jehová Diosta tucui shunguhuan sirvijcunapimi yuyana canchij. Por ejemplo, apóstol Pabloca achca huatacunatami caru ladocunaman rishpa achca congregacioncuna tiyachun ayudarca. Shinapish paipaj causaipi cambiocuna tiyashcamantami ñaupa shinaca ña mana huillai tucurca. Pero ¿ña mana ñaupa shina rurai tucushcamantaca Jehová Diosca pꞌiñarircachu? Mana. Ashtahuanpish Pablo pai rurai pudishcallata rurangapaj esforzarishpa catijpimi Jehová Diosca paita bendiciashpa catirca (Hechos 28:​30, 31). ¿Caimantaca imatataj yachanchij? Ñucanchijpish ñaupa shinaca Jehová Diostaca ña manachari sirvi tucushun. Pero Jehová Diosca ñucanchij rurai pudishcallata rurashpa catichunmi mañan. w24.03 pág. 27 párrs. 7, 9

Jesusca cai Allpapi cashpaca ocupado cashpapish siempremi Jehová Diosta mañangapaj tiempota llujchij carca (Marcos 6:​31, 45, 46). Paica utca jatarishpami pi mana causan chulunlla ladoman rishpa Diosta mañaj carca. Shuj cutincarin shuj jatun decisionta japingapajca tucui tutami mañashpa pacarirca (Lucas 6:​12, 13). Shinallataj huañungapaj ashalla horascuna faltajpica paiman mingashcacunata alli pajtachingapajmi Jehová Diostaca cutin cutin mañarca (Mateo 26:​39, 42, 44). Chashnami paita catijcunamanca alli ejemplota curca. Ocupado cashpapish Jesús shinami Jehová Diosta mañangapaj tiempota surcuna canchij. Paica Diosta mañangapajca utcami jatarij carca. O mana cashpaca tutacamami mañashpa saquirij carca. Ñucanchijpish chashnallatajmi rurai tucunchij. Chashnami Jehová Diosta mañana valishca cashcata ricuchishun. w23.05 pág. 3 párrs. 4, 5

Cai punllapaj versopica hebreo rimaipica Jehová Dios ungidocunaman cꞌuyaita ricuchishcata ningapajca Jehová Diospaj cꞌuyaica shuj jatun yacu shina cashcatami nin. Shinashpaca Jehová Diosca ungidocunataca achcatami cꞌuyan. Paicunaca chaitaca allimi yachancuna (Judas 1). Ungido huauqui panicunaca apóstol Juan shinami sintirincuna. Paica: “¡Ricuichij, Diospaj huahuacunami canguichij nishpami Yayaca ñucanchijmanca achca cꞌuyaita ricuchishca!” nircami (1 Juan 3:1). Shinapish ¿Jehová Diosca ungidocunallatachu cꞌuyan? Mana. Paica tucui paita sirvijcunatami cꞌuyan. Jehová Diosca chꞌican chꞌican ruraicunata rurashpami ñucanchijta cꞌuyashcata ricuchishca. Pero tucuimanta yallica paipaj Churita cushpami ñucanchijta achcata cꞌuyashcata ricuchishca (Juan 3:16; Romanos 5:8). w24.01 pág. 28 párrs. 9, 10

Cai punllapaj versopi ricushca shinaca, ¿Davidca jatun llaquicunata apacushpaca manchaita ama charingapajca imatataj rurarca? Paica Jehová Dios shamuj punllacunapi imata ruranatami yuyarca. Shinallataj Jehová Dios pai agllashca tiempopi paita ayudanatami seguro carca. Diosca Davidmanca Israel llajtata mandaj tucunatami huillashca carca (1 Samuel 16:​1, 13). Davidca Jehová Dios paipaj nishcacunata pajtachij cashcatami seguro carca. ¿Jehová Diosca paita sirvijcuna cunan punllacunapi llaquicuna illaj causana cashcatachu huillashca? Mana. Paica chaitaca mana huillashcachu. Pero cunan punllacunapi llaquicunata apana cajpipish Jehová Diosca paraisopi tucui llaquicunata anchuchinatami huillashca (Isaías 25:​7-9). Paica huañushcacunata cutin causachingapaj, ñucanchijta jambingapaj, tucui ñucanchij contracunata tucuchingapajmi poderta charin (1 Juan 4:4). w24.01 pág. 6 párrs. 12, 13

Jehová Diosman mingarishpa imamanta bautizarishcata yuyarishunchij. Jehová Diosta sirvingapajmi chaita rurarcanchij. Shinallataj verdadta yachacushcata seguro cangapaj imata rurashcatami yuyarina canchij. Jehová Diosmanta yachai callarishpaca shuj cꞌuyaj yaya cashcatami intindircanchij. Chaimantami paita cꞌuyai callarircanchij. Paipi tucui shunguhuan cri callarishpaca ñucanchij juchacunamantami arrepintirircanchij. Shinallataj pai millashca ruraicunata ruranata saquishpami pai munashca shina causai callarircanchij. Jehová Dios ñucanchij juchacunata perdonashcata ricushpaca cushilla, tranquilomi sintirircanchij (Salmo 32:2). Shinallataj tandanacuicunamanmi ri callarircanchij, shujtaj gentecunamanpishmi paimanta huillai callarircanchij. Cunanca Jehová Diosman mingarishpa bautizarishcamantami huiñai causaita apaj ñanpi puricunchij. Chai ñanpimi purishpa catina canchij (Mateo 7:​13, 14). Alli yuyaiyujcuna, intindijcuna cashcatami ricuchina canchij. w23.07 págs. 17-19 párrs. 14, 19

“Jehová Diosllatami sirvigrini” nishpa ari nishcata yuyarishpaca tentacioncunapi ama urmangapajmi fuerzasta charishun. Por ejemplo, ¿ñucanchij ari nishcata yuyaipi charishpaca cazarashca cꞌarihuan o huarmihuan yangamanta asirishpa, pugllarishpachu purishun? ¡Mana! Jehová Diosman mingarishpaca chaitapish mana ruranatami ari nircanchij. Shinallataj mana alli munaicuna, yuyaicuna ñucanchij shungupi sapiyachunca mana saquinachu canchij. Chaita rurashpaca mana alli munaicunamanta caruyanaca ashtahuan jahuallami canga. Chashnami ‘millaicunapaj ñanmanta’ anchurishcata ricuchishun (Proverbios 4:​14, 15). Jesustami yuyarina canchij. Paica Jehová Diosta tucuipi cazungapajmi esforzarirca. Ñucanchijpish Jehová Diosman mingarishca cashcamantami tentacioncuna ricurijpica chaicunamantaca rato caruyana canchij (Mateo 4:10; Juan 8:29). Llaquicunata, tentacioncunata ahuantashpami Jesusta tucui shunguhuan catisha nishcata ricuchishun. Jehovami Jesuspaj ejemplota catichun ñucanchijtaca ayudasha nin. w24.03 págs. 9, 10 párrs. 8-10