Octubre

¿Jehová Diosta, shujtajcunata cazunaca cambajca sinchichu ricurin? Davidpajpish Jehová Diosta cazunaca huaquinpica sinchimi ricurirca. Chaimantami Jehová Diostaca: “Cambaj espirituhuan cazuna yuyaita cuhuangui” nishpa mañarca (Salmo 51:​12, Biblia en Quichua Chimborazo, 1989). Davidca Jehová Diostaca achcatami cꞌuyarca. Pero paipaj mandashcacunata cazunaca maipica sinchimi ricurirca. Ñucanchijpajpish maipica sinchimi ricuri tucun. ¿Imamanta? Puntapica, juchayujcuna huacharishcamanta. Ishquipica, Diablo pai shina Jehová Diosta ama cazuchun pandachisha nishcamanta (2 Corintios 11:3). Quimsapica, Diosta mana cazuj gentecunapurapi causacushcamanta. Paicunapaj yuyaicunataca Diablomi mandacun (Efesios 2:2). Pero, ¿juchayujcuna cashpapish, Diablopish paita sirvijcunapish ñucanchijta pandachisha nijpipish imatataj rurana canchij? Jehová Diosta, pai churashca pushajcunata cazungapajmi esforzarina canchij. w23.10 pág. 6 párr. 1

¿Jesús rurashca milagromantaca imatataj yachai tucunchij? Humildes cana cashcatami yachai tucunchij. Jesusca alli vinota rurashpapish, imata alli rurashpapish mana nunca jatunyarircachu. Paica siempre humilde cashpami Jehová Diosta jatunyachij carca (Juan 5:​19, 30; 8:28). Ñucanchijpish Jesús shinami humildes cana canchij. Yayitu Diosta sirvishpa imata alli pajtachishpapish mana jatun tucunachu canchij. Chaipaj randica Jehová Diosta sirvishcamantami cushiyarina canchij (Jeremías 9:​23, 24). Paita siempre jatunyachinatapishmi mashcana canchij. Jehová Dios ayudajllapi imatapish pajtachi tucushcatami ñucanchij yuyaipi charina canchij (1 Corintios 1:​26-31). Humildes cashpaca ima allita rurashcata shujtajcuna yachachunca mana nunca mashcashunchu. Chaipaj randica Jehová Dios ñucanchij allita rurashcata valichijta yuyarishpami cushilla sintirishun (Mateo 6:​2-4-ta ricui; Hebreos 13:16). Jesús shina humildadta ricuchijpica Jehová Diosca dimastijmi cushiyaringa (1 Pedro 5:6). w23.04 págs. 4, 5 párrs. 9, 11, 12

Dios yuyaita cujpimi apóstol Pabloca ñucanchijllapi mana yuyashpa shujtajcunapaj alli canata mashcachun consejarca. ¿Caitaca ima shinataj tandanacuicunapi pajtachi tucunchij? Shujtajcunapish comentariocunata cusha nishcatami yuyarina canchij. Chaita yuyarishpami paicunapish comentachun saquina canchij. Caita intindingapajca shuj ejemplota ricushun. Por ejemplo, cambaj amigocunahuan parlacushpaca mana canlla tucui tiempota parlashpa catinata munanguichu ¿nachu? Ashtahuanpish canca paicunapish parlachunmi munangui. Pero can paicuna parlachun mana saquijpica llaquiringacunami. Chashnallatajmi ñucanchij tandanacuicunapipish pasan. Huauqui panicuna achca comentariocunata cuchunmi munanchij. Paicunata comentachun saquijpi, paicunapaj crishcacunamanta parlachun saquijpica achcatami animaringacuna (1 Corintios 10:24). Ñucanchij comentariocunaca ashalla shimicunapimi cana can. Chashna rurajpica shujtaj huauqui panicunapish comentariocunata cuchunmi tiempota cushun. Shinallataj ashalla shimicunapi comentashpapish mana achca yuyaicunamantachu parlana canchij. Parrafopi ricurij tucui yuyaicunamanta can parlajpica shujtajcunaca comentariocunata mana cui valingachu. w23.04 págs. 22, 23 párrs. 11-13

Ñucanchij causaipi cambiocuna tiyajpipish, Diosmanta huillashpa catingapajmi esforzarishpa catina canchij. Chaimantami chꞌican chꞌican crishcacunata charij, chꞌican chꞌican culturacunata charij gentecunaman huillana canchij. Chaimantami paicunata intindingapaj esforzarina canchij. Tucui laya gentecunaman alli huillangapajca apóstol Pablopaj ejemplotami catina canchij. Jesusca ‘Pabloca shujtaj llajta gentecunapaj cachashca apostolmi can’ nircami (Romanos 11:13). Chaimantami Pabloca judiocunaman, griegocunaman, estudiashcacunaman, pobrecunaman, autoridadcunaman, mandajcunaman huillana carca. Paica tucui laya gentecunata ayudangapajmi ‘tucui imalla rurai tucushcata rurarca’ (1 Corintios 9:​19-22). Shinallataj Pabloca gentecunapaj culturata, crishcacunata intindingapajmi esforzarirca. Chaimi cada unoman alli huillai tucurca. Ñucanchijpish tucui laya gentecunaman alli huillangapajca cada unoman ima shina huillanatami alli yuyana canchij. w23.07 pág. 23 párrs. 11, 12

Manso shungu cajcunaca manchaisiquicunaca mana canchu. Ashtahuanpish paicunaca imata mana manchaj, sinchicunami can. Chaimantami paicunaca shujtajcuna pꞌiñachisha nijpipish jarcarinata yachancuna. Manso shungu canaca ‘Diospaj espíritu pꞌucuchishca granomi’ (Gálatas 5:​22, 23). Ñaupa griego rimaipi shuj urcu caballota mansoyachishcata ningapajca, ‘chai caballoca manso shungumi can’ nijcunami carca. Shinashpaca chai caballo sinchi cashpapish mansomi carca. ¿Ñucanchijpish sinchi cashpapish ima shinataj manso shungu cai tucunchij? Ñucanchijllaca chaitaca mana rurai tucushunchu. Ashtahuanpish Jehová Dios espíritu santota cushpa ayudachunmi minishtinchij. Esforzarishpaca tucuicunami manso shungu cai tucunchij. Por ejemplo, huaquin huauqui panicunaca Diosmanta huillacujpi gentecuna pꞌiñachisha nijpica manso shungu cashcatami ricuchishcacuna. Chashnami shujtaj gentecunaca testigo de Jehovacuna mana utca pꞌiñarij, manso shungu cashcata cuentata cushcacuna (2 Timoteo 2:​24, 25). w23.09 pág. 15 párr. 3

Apóstol Juanca muscuipi shinami jahua pachapi 24 ancianocuna Jehová Diosta alabacushcata ricurca. Paicunaca paitaca: “Canmi jatunyachishca canatapish, alli nishca canatapish chasquina cangui” nishpami jatunyachicurcacuna (Apocalipsis 4:​10, 11). ¿Angelcunaca imamantataj Jehová Diosta jatunyachincuna? Paihuan jahua pachapi cashcamantami paitaca alli rijsincuna. Shinallataj , paicunaca Jehová Dios cꞌuyaj, llaquij cashcataca allimi yachancuna. Chaimantami paitaca jatunyachincuna (Job 38:​4-7). Ñucanchijpish Jehová Diosta mañacushpaca paitami jatunyachina canchij. Por ejemplo, imamanta paita cꞌuyashcatami nina canchij. Shinallataj, Bibliata liyicushpaca Jehová Dios ima cualidadcunallata charishcatami mashcana canchij (Job 37:23; Romanos 11:33). Chai qꞌuipaca Jehová Diosta mañacushpaca chai cualidadcunata charishcamantami jatunyachina canchij. Jehová Dios ñucanchijta o shujtaj huauqui panicunata ayudashcamantapishmi jatunyachina canchij (1 Samuel 2:​1, 2). w23.05 págs. 3, 4 párrs. 6, 7

Babilonia jatun puebloca 1919 huatapimi Diospaj pueblota mandanata saquirca. Chai huatallapitajmi “alli cazuj, alli yuyaiyuj” nishca sirvijca tiyai callarirca. Paipaj ayudahuanmi alli shungu gentecunaca ‘Jucha illaj Ñanpi’ puri callarishcacuna (Mateo 24:​45-47; Isaías 35:8). Achcacuna Jucha illaj Ñanta allichishpa ayudashcamantami chai ñanpi puri callarijcunaca Diosmanta, paipaj munaimanta jahualla yachai tucurcacuna (Proverbios 4:18). Shinallataj paicunaca Diospaj ñaupajpi alli ricuringapajmi cambiocunata rurarcacuna. Jehová Diosca rato cambiachunca mana shuyarcachu. Ashtahuanpish paipaj sirvijcuna cambiocunata rurachunmi asha asha yachachishca. Shamuj punllacunapi Jehová Dios munashca shina tucuita rurashpaca cushillami causashun. Ñancuna alli cachunca cuidashpa, allichishpami catina can. Chashna layallatajmi 1919 huatamantaca ‘Jucha illaj Ñanta’ allichishpa catishcacuna. Chashnami achca gentecuna Babilonia jatun pueblomanta llujshi tucushca. w23.05 págs. 17, 19 párrs. 15, 16

Cuerpo Gobernantepi caj huauquicunaca paicunapaj comitecunapi ayudaj huauquicunamanmi alli pushajcuna cachun ayudacushcacuna. Cai ayudaj huauquicunaca chꞌican chꞌican ruraicunata pajtachishpami achcata ayudacuncuna. Paicunaca Jesuspaj ovejitacunata ñaupajman pushangapajmi allichirishca can. Jatun llaqui punllacuna tucuricujpi tucui ungidocuna jahua pachaman apashca cajpipish cai Allpapi saquirij Diosta alli sirvijcunaca paitami tucui shunguhuan sirvishpa catingacuna. Cai yuyaita intindinaca achca valishcami can. Jesús paipaj ovejacunata ñaupajman pushacushcamantami paicunaca Jehová Diosta sirvishpa catingacuna. Chai punllacunapica achca llajtacunami shuj yuyailla tucushpa paicunataca llaquichisha ningacuna. Bibliapica cai llajtacunataca Magog llajtamanta Gog ninmi (Ezequiel 38:​18-20). Pero chai llajtacuna Diospaj pueblota achcata llaquichisha nijpipish mana pudingacunachu. Jehovami paicunataca quishpichinga. Diosta sirvijcunaca paitami sirvishpa catingacuna. Apóstol Juanca muscuipi shinami Jesuspaj shujtaj ovejacunata ricurca. Paicunaca ‘mana yupaipaj yallitaj achcacunami’ carca. Juanca paicuna “jatun llaquimanta” quishpiricujtami ricurca. Shinashpaca Jesuspaj shujtaj ovejacunaca quishpiringacunami (Apocalipsis 7:​9, 14). w24.02 págs. 5, 6 párrs. 13, 14

¿Jehová Dios paipaj espíritu santota cuchunca imatataj rurana canchij? Paitami mañana canchij. Bibliatapishmi estudiana canchij. Paipaj organización nishcacunatapishmi cazuna canchij. Caicunata rurajpimi Diosca espíritu santota cushpa alli cualidadcunata charichun ayudanga (Gálatas 5:​22, 23). Chuya causaita, chuya yuyaicunata charingapajmi esforzarina canchij. Mapa yuyaicuna shungupi sapiyachun saquishpaca juchapimi urmai tucunchij. Chashnami espíritu santota ña mana charishcata ricuchishun (1 Tesalonicenses 4:​7, 8). Shinallataj apóstol Pabloca: “Dios huillachishca shimicunata ama yangapi churaichijchu” nircami (1 Tesalonicenses 5:20). ¿Jehová Dios paipaj espíritu santota cushpa “huillachishca shimicunaca” imacunallataj can? Por ejemplo, paica paipaj punlla ñalla chayamugrishcatami huillashca. Chaimantami Diospaj punlla shamuchun achca tiempo illashcataca mana yuyana canchij. Chaipaj randica Diospaj punlla quichquiyamucushcatami yuyaipi charina canchij. Ashtahuancarin ‘Jehová Diosta tucui shunguhuan adoracushcatami ruraicunahuan ricuchina canchij’ (2 Pedro 3:​11, 12). w23.06 págs. 12, 13 párrs. 13, 14

Computadorapi, telefonopi ñapish pornografiacuna ricurijpica mana ricushpachu saquirina canchij. Ratomi caruyana canchij. Chaicunata ama ricushpa saquiringapajca Jehová Dioshuan apanacuna tucuimanta yalli valishca cashcatami yuyarina canchij. Huaquin fotocunaca manachari pornografía laya ricurin. Pero chaicunatapish ricushpaca mana alli yuyaicunata, mana alli munaicunatami chari tucunchij. Ashtahuanpish shungu ucupi huainayashca shinami canga (Mateo 5:​28, 29). Tailandia llajtapi causaj shuj ancianoca: “Huaquin fotocuna mana pornografía laya cajpipish, chaicunata ricujpica ¿Diosca cushicungachu? nishpami yuyarini. Chashna yuyarishcamantami alli decisioncunata japi tucushcani” nircami. Jehová Diosta tucui shunguhuan cꞌuyashpaca mana alli ruraicunamanta caruyanaca ashtahuan jahuallami canga. w23.06 pág. 23 párrs. 12, 13

Isaías libropi ‘cancunapaj huasiman yaicurichij’ nishpaca congregacioncunamantami parlacuj yuyachin. Chai punllacunapi huauqui panicunamanta mana caruyajpica Diosca quishpichingami. Chaimantami paicunataca mana nij tucushpallachu cꞌuyana canchij. Paicunataca shungumantami cꞌuyana canchij. Cꞌuyaita mana ricuchishpaca manachari quishpirishun. ‘Jehová Diospaj jatun punllaca’ tucuicunapajmi llaqui punlla canga (Sofonías 1:​14, 15). Jehová Diosta sirvijcunapishmi llaquicunata charishun. Pero cunanmantapacha allichirishpaca tranquilosmi cashun. Jehová Diospaj ayudahuanmi ima llaquicunatapish ahuantai tucushun. Shinallataj llaquijcuna cashpaca huauqui panicunata tucuipi ayudangapajmi listos cashun. Ashtahuancarin cꞌuyaita ricuchinami tandalla cachun ayudanga. Chaita rurajpica Jehová Diosca Paraíso Allpapimi huiñai causaita cushpa bendicianga. Chaipica llaquicunaca ña mana tiyangachu (Isaías 65:17). w23.07 pág. 7 párrs. 16, 17

Bibliapica Diosta sirvijcunamanta parlashpaca sinchi feta charishcata, imata mana manchajcuna cashcatami nin. Shinapish maijancunaca sinchi feta charishpapish huaquinpica llaquilla, fuerza illajmi sintirircacuna. Por ejemplo, rey Davidca sinchi, imata mana manchajmi carca. Paica ‘jatun urcu shina pi mana cuyuchipaj’ cashcatami yuyaj carca. Chashnapish huaquinpica manchaihuan, fuerza illajmi sintirij carca (Salmo 30:7). Cutin Sansonca Jehová Dios paipaj espíritu santota cushcamantami fuerzasapa carca. Pero Jehová Dios espíritu santota mana cujpi fuerza illaj saquirinataca allimi yacharca (Jueces 14:​5, 6; 16:17). Shinashpaca ñaupa tiempopi Diosta sirvijcunaca Jehová Dios espíritu santota cujllapimi fuerza, animota charircacuna. Apóstol Pabloca Jehová Dios cushca fuerzasta minishtishcatami yacharca (2 Corintios 12:​9, 10). Pabloca ungüicunatami charirca (Gálatas 4:​13, 14). Shinallataj paica allita rurangapajmi esforzarij carca (Romanos 7:​18, 19). Huaquinpicarin huañunata yuyashpami mancharij carca (2 Corintios 1:​8, 9). Chashnapish paica: “Ñucaca imata mana rurai tucui horasmi poderyuj tucuni” nircami. Shinashpaca Pablo fuerza illaj cajpica Jehová Diosmi fuerzasta cuj carca. Chashnami paica poderyuj tucurca. w23.10 pág. 12 párrs. 1, 2

Imapaj mana valij shina sintirishpaca Jehová Dios, paipaj puebloman ñucanchijta pushamushcatami yuyarina canchij (Juan 6:44). Ñucanchijca: “Ñucaca imapaj mana valinichu” nishpachari yuyanchij. Shinapish Jehová Diosca shungu ucupi ñucanchijcuna ima shina cashcataca allimi yachan (2 Crónicas 6:30). Chaimantami Jehová Dios “cantaca achcatami cꞌuyani” nijpica pai nishcataca tucui shunguhuan crina canchij (1 Juan 3:​19, 20). Maijancunaca Jehová Diosta manaraj rijsishpa mana allicunata rurashcamantami yallitaj culpable sintirishpa catinchij (1 Pedro 4:3). Cutin shujtajcunaca Jehová Diosta achca huatacunata alli sirvicushpapish mana alli yuyaicunata, mana alli munaicunata ama charingapajmi esforzarishpa caticuncuna. ¿Canpish chashnachu sintiringui? Chashna sintirishpaca ñaupa tiempopi Jehová Diosta sirvijcunapish maipica chashna sintirijcuna cashcatami yuyarina cangui. Por ejemplo, apóstol Pabloca paipaj pandarishcacunata yuyarishpaca achcatami llaquirij carca (Romanos 7:24). Paica paipaj juchacunamanta arrepintirishpami bautizarishca carca. Chashnapish “ñucaca tucui apostolcunamanta último apostolmi cani”. “Tucui juchayujcunamantaca ñucami ashtahuan juchayuj cani” nishpami huaquinpica llaquirij carca (1 Corintios 15:9; 1 Timoteo 1:15). w24.03 pág. 27 párrs. 5, 6

Mandaj Jehoás shina llaquicunata ama charingapajca Jehová Diosta cꞌuyaj amigocunatami agllana canchij. Paicunami Jehová Diosta sirvichun ayudangacuna. Shinallataj chꞌican chꞌican edadta charijcunahuanmi apanacuna canchij. Jehoasca Jehová Diosta alli sirvicushpaca paita yalli edadta charij Jehoiadahuanmi apanacuj carca. Cunanca cambaj amigocunapi yuyai. ¿Paicunaca Jehová Diospi tucui shunguhuan crichunchu ayudan? Shinallataj ¿paicunaca Jehová Diospaj mandashcacunata cazuchunchu cantaca animan? ¿Jehová Diosmanta, Bibliapi imalla yachashcacunamanta parlanata munancunachu? ¿Jehová Diospaj mandashcacunata cazungapaj esforzarincunachu? ¿Can pandarijpica canta corregingapaj esforzarinchu? ¿O can uyasha nishcallatachu nin? (Proverbios 27:​5, 6, 17). Cambaj amigocuna Jehová Diosta mana cꞌuyajpica paicunahuanca mana apanacunachu cangui. Pero Jehová Diosta cꞌuyajpica paicunahuan alli apanacushpa catingapajmi esforzarina cangui (Proverbios 13:20). w23.09 págs. 9, 10 párrs. 6, 7

Griego rimaipica callari letraca alfa nishcami can. Cutin último letraca omega nishcami can. Shinashpaca Jehová Diosca “ñucami Alfa y Omega cani” nishpaca imata rurai callarishpaca paillataj chaita rurashpa tucuchij cashcatami nisha nirca. Jehová Diosca Adán y Evata rurashca qꞌuipaca gentecunapaj, cai Allpa pachapaj paipaj munai maijan cashcatami nirca. Bibliapica: ‘Achca huahuacunata charishpa, mirarishpa allpapi jundarichij. Cai allpatapish cuidaichij’ ninmi (Génesis 1:28). Shinaca Jehová Diosca paipaj munai maijan cashcata huillashpaca “Alfa” nicuj shinami carca. Adán y Evapaj huahua huahuacunaca mirarishpami cai allpataca jundachina carcacuna. Shinallataj tucui Allpa pachataca Paraisotami rurana carcacuna. Chaicunata rurashpa tucuchijpica Jehová Dios “Omega” nicushca shinami canga. ¿Jehová Dios cai Allpapi, jahua pachapi tucui imalla tiyashcacunata rurashpa tucuchishpaca paipaj munai pajtarinataj cashcata ricuchingapajca imatataj rurarca? Jehová Diosca séptimo punllatami paipaj cachun chꞌicanyachirca. Chaica gentecunapaj, cai Allpapaj Jehová Dios imata munashcaca pajtarinataj cashcatami nisha nin. Chaica séptimo punlla tucurijpimi pajtaringa (Génesis 2:​1-3). w23.11 págs. 5, 6 párrs. 13, 14

Judiocunaca Israelman chayangapajca chuscu quillacunatami viajana carca. Chai ñancunata viajanaca sinchimi carca. Pero Jehová Diosta cꞌuyaj judiocunaca Babiloniapi tucuita saquina cashpapish Israelmanmi tigrasha nircacuna ¿imamanta? Babiloniapica Diosta alli adorajcunaca ashallami tiyarca. Chaipica Yaya Diosta adorangapajca shuj templollapish mana tiyarcachu. Shinallataj Moisesman cushca leypi mandashca shina sacrificiocunata rurashpa Jehová Diosta adorangapajca sacerdotecunapish, altarpish mana tiyarcachu. Chaimantami paicunaca Jehová Diosta alli adorangapaj Jerusalenman tigrasha nircacuna. w23.05 págs. 14, 15 párrs. 3, 4

Cai millai mundopi Jehová Dios munashca shina causanaca mana jahuallachu can (1 Tesalonicenses 4:​3-5, 7, 8). Chaimantami “luzpaj huahuacuna shina causashpa” catingapajca Jehová Dios paipaj espíritu santota cushpa ñucanchijta ayudachun minishtinchij. Jehová Dios paipaj espíritu santota cujpimi cai mundopi tiyaj panda yuyaicunataca mana crishun. Shinallataj espíritu santota chasquishpaca ‘alli shungucuna, cashcata rurajcunami cashun. Ashtahuancarin mana llullapi nishca shinami purishun’ (Efesios 5:9). Jesusca ‘jahua pachapi caj Yayaca paita mañajcunamanca, ¿manachu paipaj espíritu santota cunga?’ nircami (Lucas 11:13). Shinashpaca espíritu santota cuchun Yaya Diosta mañashunchij. Ashtahuanpish espíritu santota chasquingapajca ñucanchij huauqui panicunahuanmi tandanacuicunapi Jehová Diosta jatunyachina canchij (Efesios 5:​19, 20). Espíritu santota chasquishpaca Jehová Dios munashca shina causashpa catingapajmi fuerzasta charishun. w24.03 págs. 23, 24 págs. 13-15

¿Pacienciataca ima shinataj chari tucunchij? Jehová Diostami ashtahuan pacienciata charingapaj ayudachun mañana canchij. Pacienciata charinaca Diospaj espíritu pꞌucuchishca granomi (Gálatas 5:​22, 23). Chaimantami pacienciata, shujtaj cualidadcunata ricuchingapajca Jehová Diospaj ayudata mashcana canchij. Huaquinpica pacienciata ricuchinaca sinchimi canga. Chai ratomi “pacienciata charingapaj ayudahuai” nishpa Jehová Diosta mañana canchij (Lucas 11:13). Shinallataj Jehová Diostaca “can yuyashca shina yuyangapaj ayudahuai” nishpami mañana canchij. Chashna mañajpica Yayitu Diosca pacienciata ricuchichunmi ayudanga. Pero ñucanchijpishmi tucui punllacuna pacienciata ricuchishpa catingapaj esforzarina canchij. Chaita rurashpaca asha ashami pacienciata ricuchi callarishun. Bibliapi tiyaj ejemplocunapishmi ayudan. Bibliapica Jehová Diosta sirvijcuna pacienciata ima shina ricuchishcatami parlan. Chai ejemplocunapi yuyashpami pacienciata charinata yachashun. w23.08 págs. 22, 23 párrs. 10, 11

Jesusca apóstol Pedrotaca, ‘Jehová Diosca cantaca cuidashpami catinga’ nishpami animarca. Shinallataj ña causarishca qꞌuipaca Jesusca shuj milagrota rurashpami Pedrota caishuj apostolcunatapish achca pescadocunata japichun ayudarca (Juan 21:​4-6). Chai milagrota ricushpami Pedroca Jehová Dios paiman tucui imalla minishtishcacunata cunata seguro carca. Shinallataj chai milagrota ricushpami Pedroca Mateo 6:​33-pi Jesús imata nishcata yuyarishcanga. Chaipica Jesusca Diospaj Gobiernota punta lugarpi churashpa catichunmi discipulocunata animarca. Chaita yuyaipi charishpami Pedroca pescadocunata japinallapi ocuparinapaj randica Diospajta ruranapi ashtahuan ocuparirca. Huata 33 Pentecostés fiestapica achca gentecunamanmi tucui shunguhuan huillarca. Chashnami achca gentecunata alli huillaicunata chasquichun ayudarca (Hechos 2:​14, 37-41). Chai qꞌuipaca samaritanocunata, mana judiocunatapish Jesusta catij tucuchunmi ayudarca (Hechos 8:​14-17; 10:​44-48). Caipi ricushca shinaca Pedroca Jehová Diospaj ayudahuanmi tucui laya gentecunata Diospajman cꞌuchuyachun ayudarca. w23.09 págs. 20, 23 párrs. 1, 11

Babiloniocuna Jerusalenta tucuchishca más o menos ishqui huatacuna pasashca qꞌuipami Nabucodonosorca shuj muscuipica shuj jatun estatuata ricurca. Chaimi Danielta, Babiloniapi tiyaj tucui yachaj runacunataca pai imata muscushcata, chai muscui ima nisha nishcata nichun mandarca. Chaita mana rurajpica Nabucodonosorca tucuicunatami huañuchigrirca (Daniel 2:​3-5). Chaita uyashpaca Danielca reytaca chai muscui imata nisha nishcata huillangapajca asha punllacunata shuyachunmi mañarca (Daniel 2:16). Bibliapica chai tiempopi muscuicuna ima nisha nishcata Daniel huillaj cashcataca mana ninchu. Pero Danielca Jehová Diospimi sinchi feta charirca. Chaimi paipaj amigocunataca, ‘Jahua pachapi caj Dios cancunata llaquishpa chai muscui ima cashcata ricuchichun mañaichij’ nirca (Daniel 2:18). Paicuna chashna mañashcamantami Danielca Nabucodonosorpaj muscui ima nisha nishcata huillai tucurca. Chashnami Danielpish, paipaj quimsa amigocunapish huañuimanta quishpirircacuna. w23.08 pág. 3 párr. 4

Pacienciata charishpaca ima shina causanata yuyai. Pacienciata charishpaca shungupi, yuyaipimi tranquilo sintirishun. Congregacionpipish huauqui panicunahuanmi tandalla Jehová Diosta sirvishun. Shinallataj shujtajcuna mana alli tratajpipish mana utca pꞌiñarishpaca congregacionpi pꞌiñanacuicuna ama tiyachunmi ayudashun (Salmo 37:8; Proverbios 14:29). Ashtahuantajca pacienciata charishpaca Jehová Dios shina mana utca pꞌiñarij cashcatami ricuchishun. Pacienciata charinaca valishcami can. Shinapish tucuipi pacienciata ricuchinaca mana jahuallachu canga. Pero Jehová Diosmi pacienciata ricuchishpa catichun ayudanga. Salmo 33:​18-pica: ‘Jehová Diosca paita manchajcunamanta, pai llaquina cashcata shuyajcunamantaca paipaj ñahuita mana anchuchinchu’ ninmi. Chaimanta, Diospaj punllata mana pꞌiñarishpa shuyashpa catishunchij. Pacienciata charinatapish churarishpa catishunchij. w23.08 págs. 22, 25 párrs. 7, 16, 17

Discípulo Santiagoca pobrella cajcunata ladoman saquishpa charijcunallata alli tratashpaca mana sinchi feta charishcata ricuchicushcatami intindichirca (Santiago 2:​1-5, 9). Ashtahuanpish Santiagoca: ‘Maijan huauqui pani imata churanata, micunata minishtijta ricushca jahua imata mana rurashpaca sinchi fetami charini nishpapish cancunapaj ruraicunahuanmi feta mana charishcata ricuchicunguichij’ nircami (Santiago 2:​14-16). Santiagoca feta charishcata ruraicunahuan ricuchina cashcata yachachingapajca Rahabpaj ejemplomantami parlarca (Santiago 2:​25, 26). Rahabca Jehová Dios alli Dios cashcata, israelitacunata ayudacushcatami uyashca carca (Josué 2:​9-11). ¿Paica feta charishcataca ima shinataj ricuchirca? Ishqui israelitacunami Jericó llajta ima shina cashcata pacalla ricunaman rishcacuna carca. Rahabca paicunata ama huañuchichunmi ayudarca. Chaita rurashcamantami Rahabca juchayuj cashcapish, Israelmanta mana cashpapish Abrahán shina Diospaj ñaupajpica cashcata ruraj shina ricurirca. Shinashpaca feta charishcataca ruraicunahuanmi ricuchina canchij. w23.12 págs. 5, 6 párrs. 12, 13

Diosta sirvijcunaca jahualla yachaicunata yachashpallaca mana saquirinachu canchij. Espíritu santopaj ayudahuanca “pi mana yachai tucushca Diospaj yuyaicunatapishmi” intindi tucunchij (1 Corintios 2:​9, 10). Chaimanta sinchi yachaicunata estudiangapaj esforzarishunchij. Chashnami Diospajman ashtahuan cꞌuchuyashun. Por ejemplo, Jehová Dios ñaupa tiempopi paita sirvijcunata cꞌuyaita ricuchishcamanta ñucanchijtapish cꞌuyashcatami yachai tucunchij. Shinallataj ñaupa tiempopi Jehová Dios israelitacuna paita ima shina adorachun munashcata, cunan punllacunapi ñucanchijpish paita ima shina adorana cashcatapishmi yachai tucunchij. Ashtahuanpish Jesús cai Allpapi cashpa maijan profeciacunallata pajtachishcatami yachai tucunchij. ¿Bibliapica ima sinchi yachaicunatataj yachanata munanguiman? Chai temacunamanta ashtahuan yachangapajca Índice de las publicaciones Watch Tower y Guía de estudio para los testigos de Jehová nishca publicacioncunapimi investigai tucungui. Chashnami cambaj feca sinchiyanga. Ashtahuancarin ‘Diosmanta alli yachaitami japingui’ (Proverbios 2:​4, 5). w23.10 págs. 18, 19 párrs. 3-5

Hebreo rimaipica ‘shungumanta cꞌuyanacuichij’ nishpaca shuj mesata shuj telahuan tapacuj shinahuanmi chꞌimbapurarca. Cutin versopaj tucuri partepica apóstol Pedroca: “Cꞌuyaita charijca achca juchacunata perdonangapajmi listo can” nircami. Shinashpaca huauqui panicuna achca cutin pandarijpipish chai pandarishcacunata shuj jatun telahuan tapacushca shinami paicunata perdonangapaj listos cana canchij. Huauqui panicunata perdonanaca huaquinpica sinchimi cai tucun. Pero paicunata shungumanta cꞌuyashpaca perdonai tucushunmi (Colosenses 3:13). Shinallataj shungumanta perdonashpaca Jehová Diostami cushichinchij. w23.11 págs. 11, 12 párrs. 13-15

Mandaj Josiasca 26 huatacunata charishpaca Diospaj huasitami allichi callarirca. Chaita ruracujpica paita sirvijcunaca Jehová Dios Moisesman quillcachishca mandashcacunatami japishcacuna carca. Josías chai mandashcacunapi imalla nishcacunata uyashpaca chai ratomi Diospaj mandashcacunata cazungapaj cambiocunata rurarca (2 Crónicas 34:​14, 19-21). Joven, ¿cada punlla Bibliata liyinata munanguimanchu? ¿Chaita rurangapaj ña esforzaricushpaca ima shinataj sintirishcangui? ¿Can munashca versocunapi ima nishcata ama cungaringapajca imatataj rurai pudingui? Josiasca 39 huatacunata charishpaca Jehová Diospaj ayudata mashcanapaj randi paillapi confiarishpami mana alli decisionta japirca. Chaimantami huañurca (2 Crónicas 35:​20-25). ¿Paimantaca imatataj yachanchij? Mashna huatacunata charishpapish o Jehová Diosta mashna huatacunata sirvicushpapish Jehová Diosmantaca manataj caruyanachu canchij. Ashtahuanpish paipajman cꞌuchuyashpa catingapajca ñucanchijta ayudachunmi mañana canchij. Bibliatapishmi estudiana canchij. Diosta alli sirvij huauqui panicunapaj consejocunatapishmi uyana canchij. Chaita rurashpaca Josías shinaca mana pandarishunchu. Ashtahuanpish cushi causaitami charishun (Santiago 1:25). w23.09 págs. 12, 13 párrs. 15, 16

Bibliapica achca huarmicuna Jehová Diosta cꞌuyashcamanta paita tucui shunguhuan sirvishcatami nin. Chai huarmicunaca 1 Timoteo 3:​11-pi nishca shinami ‘tucuipi jarcarij, Diosta tucuipi cazujcuna carca’. Ñucanchij congregacioncunapipishmi Jehová Diosta alli sirvij panicuna tiyan. Joven panicunaca paicunamantami achcata yachai tucuncuna. Joven panicuna, Jehová Diosta alli sirvij cancuna rijsishca panicunapi yuyaichij. Seguramente paicunamantaca achcatami yachai tucunguichij. Por ejemplo, chai panicunapaj alli cualidadcunapi yuyai. Canpish chai cualidadcunata charingapajca, ¿imatataj rurai tucungui? Espiritualmente sinchi caj huarmicunaca humildesmi cana can. Chashnami Jehová Dioshuan, shujtajcunahuanpish alli apanacungacuna. Shinallataj humilde huarmicunaca congregacionpi, familiapi Jehová Dios churashca pushajcunatami respetancuna (1 Corintios 11:3). w23.12 págs. 18, 19 párrs. 3-5

Jehová Diosca cusacuna quiquin huarmita cꞌuyachun, imalla minishtishcata cuchun, paita cushichichun, espiritualmente sinchi cachun ayudachunmi munan. Yachaisapa cangapaj, huarmita respetangapaj, confianalla cangapajmi esforzarina cangui. Alli yaya casha nishpaca Yaya Diosmantami achcata yachai tucungui (Efesios 6:4). Por ejemplo, Jehová Diosca tucuicunapaj ñaupajpimi paipaj Churi Jesusta achcata cꞌuyashcata, achcata valorashcata nirca (Mateo 3:17). Huahuacunata charishpaca siempremi paicunata cꞌuyashcata ningapaj esforzarina cangui. Shinallataj paicunapaj alli rurashcacunamantami felicitana cangui. Jehová Dios shina alli yaya cangapaj esforzarijpica cambaj huahuacunaca Jehová Diosta alli sirvijcunami tucungacuna. Alli yaya cangapajca cunanmantami allichirina cangui. Chaipajca cambaj familiata, huauqui panicunata cꞌuyaihuan cuidangapaj, paicunata cꞌuyashcata, valorashcata ningapajmi esforzarina cangui (Juan 15:9). w23.12 págs. 28, 29 párrs. 17, 18

Llaquicuna, ungüicunaca Diosta sirvijcunatapishmi japin. Shinallataj huaquin huauqui panicunataca Diosta sirvishcamantami catirashpa llaquichincuna. Cunan punllacunapi tucui ñucanchij llaquicunata anchuchinataca Yayitu Diosca mana nishcachu. Pero tucuipi ñucanchijta ayudanatami nin (Isaías 41:10). Jehová Diospaj ayudahuanmi llaquicunata charishpapish tranquilo cai tucunchij, alli decisioncunatapish japi tucunchij. Jatun llaquicunata apana cashpapish paimantaca manataj caruyashunchu. Jehová Diosca ‘pi mana intindipaj sumaj causaitami’ cusha nin (Filipenses 4:​6, 7). ¿Caica imatataj nisha nin? Jehová Dioshuan alli apanacushcamantami llaquicunata charishpapish tranquilo sintiri tucunchij. ¿Canca llaquilla o sustarishca cashpaca Jehová Diosta tucui shunguhuan mañashca qꞌuipaca, ima shinataj sintirishcangui? Seguramente tranquilomi sintirircangui. Chashna sintirinami ‘Diospaj sumaj causaica’ can. w24.01 págs. 20, 21 párrs. 2, 4

Diosta cꞌuyajcunaca paipaj shutitami shungumanta jatunyachinata munancuna. Rey Davidca Jehová Diosta jatunyachingapaj paipaj shutitapish jatunyachina cashcatami intindirca. Ñucanchijpish Diospaj shutita jatunyachishpaca pai alli Dios cashcata, sumaj cualidadcunata charishcata, tucui pai imalla rurashcacuna sumaj cashcatami ricuchinchij. Davidca Diospaj shuti chuya, ima mapa illaj cashcamantami paitaca tucui shunguhuan jatunyachisha nirca. Levita runacunapishmi Jehová Diosta jatunyachircacuna. Pero paicunaca humilde shunguhuanmi Diospaj shutica ima alabashcamantapish ashtahuan jatun cashcata reconocircacuna (Nehemías 9:5). Levitacuna Jehová Diosta jatunyachijpica paica cushillami sintirirca. w24.02 págs. 9, 10 párr. 6

Shuj metata mana pajtachi tucushcamanta Jehová Diosca pꞌiñarishcami canga nishpaca mana yuyanachu canchij (2 Corintios 8:12). Huaquin metacunata mana pajtachi tucushpaca imapi mejorai tucushcatami yuyai tucungui. Can ña pajtachishca metacunapi yuyai. Bibliapica: ‘Diosca cancuna imata rurashcataca manataj cungaringachu’ ninmi (Hebreos 6:10). Canca ñachari Diospaj amigo cana, publicador cana o bautizarina metata pajtachircangui. Chai metacunata ña pajtachishcataca mana cungarinachu cangui. Ashtahuanpish chai metacunata ña pajtachishcamantami shujtaj metacunatapish pajtachi tucungui. Cambaj metacunataca Jehová Diospaj ayudahuanmi pajtachi tucungui. Can munashca metata pajtachishpaca cushillami sintiringui. Jehová Dios cambaj metata pajtachichun ima shina ayudashcatami ricuna cangui. Chashnami cushilla sintiringui (2 Corintios 4:7). Metacunata pajtachingapaj esforzarishpaca achca bendicioncunatami chasquingui (Gálatas 6:9). w23.05 pág. 31 párrs. 16-18

Jehová Diosca Bibliapimi ñucanchijta valorashcata ricuchin. Bibliapi nishca shinaca Jehová Diosca ishqui cutinmi jahua pachamantaca paipaj Churita achcata cꞌuyashcata, achcata valorashcata nirca (Mateo 3:17; 17:5). ¿Jehová Dios cantapish valorashcata nichunchu munanguiman? Paica jahua pachamanta parlashpa canta valorashcataca mana ningachu. Pero Bibliapimi canta valorashcata ricuchin. Por ejemplo, Bibliapica Jesús paita catijcunata cꞌuyaihuan, alaja shimicunahuan trataj cashcatami nin. Chaita liyishpami Jehová Dios ñucanchijta alaja shimicunahuan tratacushcata sintishun. Jesusca cai allpapi cashpaca tucuipimi paipaj Yaya laya cashcata ricuchirca. Paica paita catijcunataca “cancuna pandarijllacuna cajpipish cancunataca achcatami cꞌuyani” nircami. Bibliapi chaita liyishpaca Jehová Dios ñucanchijtapish “cantaca achcatami cꞌuyani” nicuj shinami canga (Juan 15:​9, 15). Llaquicunata charishpapish Jehová Dios ñucanchijta valorashcataca mana yuyanachu canchij. Ashtahuanpish llaquicuna japijpica Jehová Diosta tucui shunguhuan cꞌuyashcata, paipi confiashcata ricuchingapajmi esforzarina canchij (Santiago 1:12). w24.03 pág. 28 párrs. 10, 11