Noviembre

Can uchilla huahuacunata charishpaca paicuna intindi tucushcata comentachunmi ayudai tucungui. Huaquin tandanacuicunapica sinchi yuyaicunatami yachanchij. Por ejemplo, cazarashcacunapaj problemacunamanta, huainayana mana alli cashcamantapishmi yachanchij. Chai yachaicuna mana huahuacunapaj cajpipish shuj o ishqui parrafocunapi intindirinalla yuyaicunamanta comentachunmi ayudai tucungui. Shinallataj comentariocunata mana siempre cui tucushcatapish huahuacunaman intindichina cangui. Caita intindichijpica, shujtajcunaman comentariota cujpica paicunaca mana llaquilla sintiringacunachu (1 Timoteo 6:18). Tucuicunami Jehová Diosta jatunyachingapaj, huauqui panicunata animangapajpish alli comentariocunata rurai tucunchij (Proverbios 25:11). Huaquinpica ñucanchij causaimantami ashalla shimicunapi parlai tucunchij. Shinapish mana ñucanchijmanta yalli parlanachu canchij (Proverbios 27:2; 2 Corintios 10:18). Chaipaj randica Jehová Diosmanta, paipaj Shimimanta, Diosta sirvijcunamantapishmi ashtahuan parlai tucunchij (Apocalipsis 4:11). w23.04 págs. 24, 25 párrs. 17, 18

Espiritualmente rijcharishca cangapaj, alli yuyaihuan causangapajca cꞌuyaitami charina canchij (Mateo 22:​37-39). Por ejemplo, cꞌuyaita charishpaca jarcaicuna ricurijpipish predicashpa catingapajmi esforzarishun (2 Timoteo 1:​7, 8). Shinallataj Jehová Diosta manaraj rijsijcunata cꞌuyashcata ricuchingapajca maipi cashpapish, telefonopi cayashpa, cartacunata quillcashpa predicangapajmi esforzarina canchij. Gentecuna mana cambiai tucushcataca mana yuyanachu canchij. Ashtahuanpish paicunapaj ñaupa causaita saquishpa Jehová Diosta sirvi tucushcatami mana dudana canchij (Ezequiel 18:​27, 28). Huauqui panicunahuanmi “caishuj chaishuj animanacushpa, sinchiyarinacushpa” catina canchij. Chashnami paicunata cꞌuyashcata ricuchishun (1 Tesalonicenses 5:11). Soldadocunaca macanacuipi cashpaca caishuj chaishujmi ayudanacuncuna. Shuj soldadoca paipaj munaimanta paipaj compañerotaca mana llaquichinmanchu. Ñucanchijpish huauqui panicunataca ñucanchij munaimantaca mana llaquichinchijmanchu. Ñucanchijta llaquichijpipish mana tigra llaquichinchijchu (1 Tesalonicenses 5:​12, 13, 15). w23.06 págs. 10-12 párrs. 6, 10, 11

Jesús ñucanchijmanta huañushcata yuyarishpami ñucanchij feta sinchiyachishun. Jesús huañushcamantami Jehová Diosca pai tucui nishcacunata pajtachi tucunga. Chaimantami Jehová Diospish, Jesuspish ñucanchijta quishpichingapaj imallata rurashcapi yuyana canchij. Chashnami shamuj punllacunapi shuj Paraíso tiyanata, chaipi huiñaita causai tucushcatapish tucui shunguhuan crishun. ¿Imamantataj chaita ninchij? Jehová Diospish, Jesuspish ñucanchijta quishpichingapaj imallata rurashcapi yuyashunchij. Jehová Diosca paipaj shujlla Churi Jesustaca achcatami cꞌuyarca, paihuanca dimastij allimi apanacurca. Shinapish Diosca ñucanchijmanta huañuchunmi Jesustaca shuj jucha illaj runa shina cai Allpapi huacharichun cacharca. Jesusca cai Allpapica achca llaquicunata apashpami llaquinaita huañurca. Pero caipi yuyashun: ¿Jehová Diosca paipaj Churi yangamanta chashna huañuchunchu saquirca? ¿Ñucanchijcuna ashalla huatacunata alli causachunchu paipaj Churi huañuchun saquirca? Mana, Jehová Diosca gentecuna para siempre cushilla causachunmi paipaj Churi chashna llaquinaita sufrishpa huañuchun saquirca (Juan 3:16; 1 Pedro 1:​18, 19). Paipaj Churipaj valishca causaita cushcamantami cai Allpata shuj Paraisota rurangapajca tucuita ruranga. w23.04 págs. 27, 28 párrs. 8, 9

¿Jehová Diosca huañushcacunata causachina munaita charinchu? Ari. Paica chai munaitami charin. Jehová Diosca huaquin cꞌaricunataca causarinamantami Bibliapi quillcachirca (Isaías 26:19; Apocalipsis 20:​11-13). Yayitu Diosca pai tucui nishcacunatami siempre pajtachin (Josué 23:14). Ashtahuancarin paica huañushcacunata causachina punlla chayachunmi tucui shunguhuan, tucui munaihuan shuyacun. Jobpi yuyashunchij. Jobca Yayitu Dios paita causachina munaita charishcata, paita cutin tigra ricuna munaita charishcataca allimi yacharca (Job 14:​14, 15). Jehová Diosca paita tucui sirvijcunatami causachinata munan. Paica alli saludta charichun, tucuicuna cushilla causachunmi munan. ¿Cutin Jehová Diosta manaraj rijsishpa huañushcacunataca causachisha ningachu? Ari. Yayitu Diosca paicunata cꞌuyashcamantami paicunatapish causachisha nin (Hechos 24:15). Paicuna paita rijsina oportunidadta charichun, cai Allpapipish para siempre causachunmi munan (Juan 3:16). w23.04 pág. 9 párrs. 5, 6

¿Bendicioncunata chasquina yuyailla causangapajca imatataj rurana cangui? Paraisopi causana esperanzata charishpaca Paraisomanta Bibliapi liyicushpaca chaipi cashcata yuyai (Isaías 25:8; 32:​16-18). Shinallataj ¿Paraisopi yuyacushpaca canpish chaipi cashcatachu yuyangui? Paraisopi yuyangapaj tiempota llujchishpaca ‘llaquicunaca ashacamalla apanalla cashcatami’ seguros cashun (2 Corintios 4:17). Paica ñucanchijta sinchiyachingapajca tucui laya ayudacunatami cun. Chaimantami ñucanchijman mingashcacunata pajtachina sinchi laya ricurijpi, llaquicunata cushilla ahuantangapaj esforzaricushpaca Jehová Dios ayudachun mañana canchij. Bibliatapishmi estudiana canchij. Huauqui panicuna ñucanchijta ayudachunpishmi saquina canchij. Paraisopi yuyanatapish manataj saquinachu canchij. Chaita rurajpimi Yayitu Diosca ‘paipaj jatun poderhuan ñucanchijta sinchiyachinga. Chai jatun podermi ñucanchijtaca pacienciahuan, cushicushpa tucuita ahuantachun ayudanga’ (Colosenses 1:11). w23.10 pág. 17 párrs. 19, 20

Jehová Diostaca achca cosascunamantami agradici tucunchij. Tucui allicunaca Jehová Diosmantami shamun. Chaimantami paitaca tucui shunguhuan agradicina canchij (Santiago 1:17). Por ejemplo, Jehová Diostaca cai Allpapi tucui imalla tiyashcacunata rurashcamanta, causaita cushcamanta, ñucanchij familiata charishcamanta, ñucanchij amigocunamanta, shamuj punllacunapi sumaj causai tiyagrishcamanta, paihuan alli apanacui tucushcamantami pagui nina canchij. ¿Canca imacunallamantataj Jehová Diosta pagui ni tucungui? Chaita cuentata cunaca huaquinpica sinchimi can. ¿Imamanta? Cai millai mundopi causacushcamanta. Jehová Diosta mana sirvijcunaca agradecido canapaj randica ashtahuan charina yuyaillami causancuna. Ñucanchijpish paicuna shina yuyashpaca Jehová Diostaca ñucanchij munashcacunallata cuchunmi mañai callarishun. Ama chashna mañangapajca agradecido cangapajmi esforzarina canchij. Shinallataj Jehová Diosta tucui imalla minishtishcacunata cushcamanta pagui ningapajmi esforzarina canchij (Lucas 6:45). w23.05 pág. 4 párrs. 8, 9

Jehová Diosca ñucanchijta cꞌuyashcamantami imamantapish ama sufrichun munan (Isaías 63:9). Chashnapish paica tucui ñucanchij llaquicunataca mana anchuchinchu. Bibliapi nishca shinaca ñucanchij llaquicunaca ‘jatun yacucuna, nina shinami’ cai tucun (Isaías 43:2). Pero tucui ñucanchij llaquicunata mana anchuchishpapish Yaya Diosca paipaj espíritu santota cushpami chai llaquicunahuan chꞌimbapurachun ayudanga. Shinallataj paica huiñaipaj sufrishpa catichunca mana saquingachu (Lucas 11:13; Filipenses 4:13). Chaimantami Jehová Diosta sirvishpa catichun paillataj ayudanata seguros canchij. Jehová Diosca paipi confiachunmi munan (Hebreos 11:6). Jatun llaquicunahuan chꞌimbapuracushpaca Jehová Dios ñucanchijta mana ayudacushcatachari yuyashun. Llaquicunahuan chꞌimbapuranaca shuj jatun pircata huichiyacuj shinami can. Pero Bibliapi nishca shinaca Jehová Diosca chai jatun pircata huichiyachunmi ayudan (Salmo 18:​29, NWT). Chaimanta paipaj nishcacunapi confiashpa catishunchij. Ashtahuanpish shungumanta Jehová Diosta mañashunchij. Paica ñucanchij mañaicunata cutichingapajca listomi canga (Santiago 1:​6, 7). w23.11 pág. 22 párrs. 8, 9

Cai shimicunaca sumajmari. Caipi nishca shinaca cusa huarmicunaca cꞌuyaita ricuchinacushpami tucui vida cushilla causai tucuncuna. Cusa huarmicunaca cꞌuyai ama chiriyachunmi ishquindijllataj esforzarina can. Ninapi yuyashun. Nina ama huañuchunca yantatami churashpa catina can. Chashna layallatajmi cꞌuyai ama chiriyachunca cusa huarmicunaca cꞌuyaita ricuchinacushpa catina can. Shinapish huaquinpica cullquimanta problemacuna tiyajpi, ungüicuna ricurijpi o huahuacunata huiñachina cashcamantami cꞌuyaica asha asha chiriyai tucun. Matrimonio ucupi cꞌuyai ama chiriyachunca cusa huarmicunaca Jehová Dioshuan alli apanacungapajmi esforzarina can. w23.05 págs. 20, 21 párrs. 1-3

Tal vez cambaj yaya mamaca imata mana manchashpami Jehová Diosta sirvincuna. Pero canpish mana manchaj cangapajmi sinchita esforzarina cangui. Cai ejemplopi yuyai. Imata yachasha nishpaca ñucanchijman yachachijtami atencionhuan ricuna, uyana canchij. Paipaj ejemplotapishmi catina canchij ¿nachu? Chashna layallatajmi mana manchaj cangapajca mana manchajcunapaj ejemplomanta yachana canchij. Paicunapaj ejemplota catingapajpishmi esforzarina canchij. Daniel shinami Bibliata alli estudiana canchij. Shinallataj Jehová Diospaj alli amigo tucungapajca shungumantami paita mañana canchij. Paipi confiajpi tucuipi ayudanatapishmi seguro cana canchij. Chaita rurashpami jarcaicuna ricurijpica ahuantai tucunchij. w23.08 págs. 2, 4, 5 párrs. 2, 8, 9

Griego rimaipi “alli ricuraichij” nishpaca shuj joya alli o yanga metalhuan rurashca cashcata ricunatami nisha nin. ¿Caimantaca imatataj yachanchij? Ñucanchijpish ima uyashcacuna, liyishcacuna cierto cashcata o llulla cashcatami alli ricuna canchij. Jatun llaqui punllacuna quichquiyamucushcamantami chaita rurana canchij. Gentecuna nishcacunata rato crinapaj randica alli yuyashpa Bibliapi nishcacunahuan, Jehová Diospaj organización nishcacunahuan chꞌimbapurashpami cierto cashcata o mana cierto cashcata ricuna canchij. Chashna rurajpimi demoniocunaca llulla parlocunahuanca mana pandachi tucungacuna (Proverbios 14:15; 1 Timoteo 4:1). Jatun llaqui punllacuna shamujpi Jehová Dios paipaj pueblota quishpichinatami seguros canchij. Chai punlla chayamungacama cada unohuan ima tucunataca mana yachanchijchu (Santiago 4:14). Pero jatun llaqui punllacuna manaraj shamujpi huañujpipish o mana huañujpipish Jehová Diosta tucui shunguhuan sirvijpica paica huiñai causaita cushpami bendicianga. Chaimanta Jehová Diospaj punllapaj allichirishpa catishunchij. Ashtahuantajca Jehová Dios cusha nishcacunata japina yuyailla causashunchij. w23.06 pág. 13 párrs. 15, 16

Huaquin profeciacuna ima shina pajtarinataca mana yachanchijchu (Daniel 12:​8, 9). Pero chai profeciacuna ima nisha nishcata manaraj intindishpapish pajtarinataca pajtaringatajmi. Jehová Diosllatajmi pai agllashca punllapi chai profeciacuna imata nisha nishcataca alli intindichinga. Chaitaca segurosmi canchij. Llajtacunaca ñallami: “¡Sumajta, mana manchashpami causacunchij!” ningacuna (1 Tesalonicenses 5:3). Chai qꞌuipaca gobiernocunami panda religioncunata tucuchingacuna (Apocalipsis 17:​16, 17). Chai huashaca Diospaj pueblotami llaquichisha ningacuna (Ezequiel 38:​18, 19). Chai qꞌuipaca Armagedón jatun macanacuimi callaringa (Apocalipsis 16:​14, 16). Cai profeciacuna ñalla pajtarina cashcataca segurosmi canchij. Pero pajtaringacamaca ima shina pajtaricushcatami yachashpa catina canchij. Shujtajcunatapish chai profeciacunata intindichunmi ayudana canchij. Chashnami Jehová Diosta tucui shunguhuan cꞌuyashcata ricuchishun. w23.08 pág. 13 párrs. 19, 20

Apóstol Pabloca feta, esperanzata, cꞌuyaita charinamanta parlacushpaca “cai quimsamanta ashtahuan yallica cꞌuyaimi” nircami (1 Corintios 13:13). ¿Pabloca imamantataj chaita nirca? Yuyashun. Shamuj punllacunapi Jehová Dios sumaj causaita cunataca tucui shunguhuanmi crinchij ¿nachu? Pero cai Allpapi sumaj causai tiyajpica chaipi crinataca ña mana minishtishunchu. Pero Paraisopi causacushpapish Jehová Diosta, huauqui panicunata cꞌuyashpa catinaca minishtirishcami canga. Cꞌuyaica manataj tucuringachu. Caishuj chaishuj cꞌuyanacushpaca Jesusta alli catijcuna cashcatami ricuchishun. Jesusca paita catijcunamanca: “Cancuna chashna caishuj chaishuj cꞌuyanacujpimi ñucata catijcuna cashcata tucuicuna yachangacuna” nircami (Juan 13:35). Shinallataj cꞌuyaita ricuchinami tandalla cachun ayudan. Chaimi apóstol Pabloca: “Cꞌuyaimi gentecunataca tucuipi shuj shinallata ruran” nirca (Colosenses 3:14). Ashtahuanpish huauqui panicunata cꞌuyashpaca Jehová Diostapish cꞌuyashcatami ricuchishun. Chaimi apóstol Juanca: “Diosta cꞌuyajca paipaj huauquitapish cꞌuyachun” nirca (1 Juan 4:21). w23.11 págs. 8, 9 párrs. 1, 3

Bibliapi nishca shinaca Diosta sirvijcunaca shuj carrerapimi callpacunchij. Cai carrerata tucuchishpaca huiñai huiñaita causanatami premiota shina chasquishun (2 Timoteo 4:​7, 8). Cai carreraca ñallami tucurigrin. Chaimantami callpashpa catingapaj esforzarina canchij. Apóstol Pablo shina ñucanchijpish cai carrerata tucuchingapajca pai nishcatami pajtachina canchij. Pabloca ‘tucui llashacuj cargatapish, anchuchishunchij. Ñucanchij ñaupajpi churashca carrerapica ahuantashpa catishunchij’ nircami. Pabloca ima cargatapish mana apana cashcataca mana nicurcachu. Ashtahuanpish mana minishtishca cargacunata saquina cashcatami nicurca. Cai shaicuchij cargacunaca utca callpashpa catichunca mana saquingachu. Chaimantami cai cargacunataca rato ladoman saquina canchij. Pero minishtishca cargacunataca apashpami catina canchij. Chaicunata mana apashpa catijpica Yayitu Diosca carrerapi callpashpa catichunca ña mana saquingachu (2 Timoteo 2:5). w23.08 pág. 26 párrs. 1, 2

Shujtajcunata respetashpami paicunata intindishcata ricuchishun. Por ejemplo, maijan panicunaca ñahuitami pintarincuna o maquillarincuna. Pero shujtajcunaca mana chaita rurancunachu. Cutin shujtaj huauqui panicunaca asha tragotami ubyancuna. Pero shujtajcunaca shuj copallatapish mana ubyancunachu. Shinallataj alli saludta charingapajca cada unomi chꞌican chꞌican tratamientocunata agllanchij. Pero tucuicuna ñucanchij munashca shina decidichun obligajpica congregación ucupica chꞌicanyarinacuicunami tiyanga. Shinallataj shujtajcunatami ñitcachishun (1 Corintios 8:​9, 10:​23, 24). Jehová Diosca ima ropata churarinataca mana ninchu. Chaipaj randica alaja consejocunata cushpami alli decidichun ayudan. Diosta sirvijcunaca ‘sumajta, mana pinganayajta, alli yuyaihuanmi churarina’ canchij (1 Timoteo 2:​9, 10). Gentecuna ricuchunllaca mana imatapish churarinallachu canchij. Shinallataj ancianocunaca ima shina churarinamanta, ima shina allichirinamanta Bibliapi ima nishcatami yuyarina can. Chashnami paicuna munashca shina rurachun huauqui panicunataca mana obligangacuna. w23.07 págs. 23, 24 párrs. 13, 14

Jehová Diosca cushilla causangapajmi imata rurana cashcata yachachin. Chꞌahuanyashca, yuyai illaj huarmipaj invitacionta chasquijcunaca mapa ruraicunata rurashpa cushilla causanatami yuyancuna. Pero paicunaca ‘Pambana Utcumanmi’ ringacuna (Proverbios 9:​13, 17, 18). Cutin alli yachaj huarmipaj invitacionta chasquijcunaca cushillami causancuna (Proverbios 9:1). Ñucanchijpish Jehová Dios millashca ruraicunata millanayachingapajmi esforzarina canchij (Salmo 97:10). Ashtahuanpish Proverbios 9-pi parlaj huarmicuna shinami cana canchij. Paicunaca ‘jatun pircacuna jahuamantami yachai illajcunapish, alli yuyaita mana charijcunapish caiman shamuichij’ nincunami. Chai invitacionta chasquijcunaca cunan punllacunapish shamuj punllacunapishmi achca bendicioncunata charishun. Pero chai bendicioncunata chasquingapajca ‘alli yuyaita japishpa, sumajta causana ñanpimi purishpa catina’ canchij (Proverbios 9:​3, 4, 6). w23.06 págs. 24, 25 párrs. 17, 18

¿Trabajopi, escuelapi o colegiopi cambaj crishcacunamanta tapujpica ima shinataj sintiringui? ¿Manchaita charinguichu? Achcacunami chashna sintirinchij. Pero manchaita charishpapish gentecuna imamanta ñucanchij crishcacunamanta tapushcatami intindina canchij. Chashnami paicunamanca huillai tucushun. Shinapish huaquinpica maijancunaca pꞌiñarishca cashcamantami sinchi shimicunahuan tapuicunata rurangacuna. Pero mana mancharinachu canchij. Tal vez shujtajcuna nishcacunata crishcamantami chashna tapungacuna (Hechos 28:22). Ashtahuancarin tucuri punllacunapi causacushcamantami maijan gentecunaca ‘alli tucunata mana munajcuna, pꞌiña millaicuna’ can (2 Timoteo 3:​1, 3). ¿Sinchi shimicunahuan ñucanchij crishcacunamanta tapujpi mana pꞌiñarishpa, alli shimicunahuan cutichingapajca imatataj rurana canchij? Chaipajca manso shungu canatami yachana canchij. Manso shungu cashpaca mana rato pꞌiñarishunchu. Ashtahuanpish pꞌiñachisha nijpipish, paicunaman ima shina cutichinata mana yachashpapish pacienciatami charishun. w23.09 pág. 14 párrs. 1, 2

Diospaj organizacionta pushaj huauquicunaca cullqui yuyailla ama causachun, jatun llaquicunapi ama urmachunmi sumaj consejocunata cun. Chai consejocunata cazushpaca jatun llaquicunapica mana urmashunchu (Isaías 48:​17, 18; 1 Timoteo 6:​9, 10). Jatun llaqui punllacunapi, shinallataj Jesús cai Allpata mil huatacunata mandacujpipish Jehová Diosca ñucanchijta ñaupajman pushachunca pushaj huauquicunatami churanga. Chai punllacunapica ¿pushaj huauquicunatachu cazushun? Cunanmanta cazujcuna cangapaj esforzarishpaca shamuj punllacunapi pushaj huauquicunata cazunaca jahuallami canga. Chaimanta Jehová Diosta, pai churashca pushajcunata shungumanta cazushpa catishunchij (Isaías 32:​1, 2; Hebreos 13:17). Cunanca imamanta Jehová Diospi confiana cashcataca allimi intindinchij. Paica llaquicunapi urmachunca mana munanchu. Ashtahuanpish Paraisopi huiñai huiñaita cushilla causachunmi munan. w24.02 pág. 25 párrs. 17, 18

Apóstol Pabloca cushillami Jehová Diosta sirvirca. Pero huaquin jarcaicunahuanmi chꞌimbapurarca. Paica Diosmanta huillangapajmi achcata viajana carca. Chai punllacunapica shujtaj ladocunaman viajanaca ashtahuan sinchimi carca. Chaimantami jatun yacucunapi cashcamanta, shuhuacunamanta, millai gentecunamanta llaquicunata charirca (2 Corintios 11:​23-27). Shinallataj huaquin huauqui panicunaca apóstol Pablo paicunata ayudasha nijpipish mana alli chasquircacunachu (2 Corintios 10:10; Filipenses 4:15). ¿Chashna jahuapish Jehová Diosta sirvishpa catingapajca Pabloca imatataj rurarca? Paica Diospaj Shimitami alli estudiaj carca. Jehová Dios paipaj causaipi ima shina ayudaj cashcata cuentata cungapajpishmi esforzarij carca. Chashnami Jehová Dios paita cꞌuyaj cashcata seguro carca (Romanos 8:​38, 39; Efesios 2:​4, 5). Pabloca Jehová Diosta tucui shunguhuan cꞌuyashcamantami ‘jucha illaj huauquicunata sirvishpa catirca’ (Hebreos 6:10). w23.07 pág. 9 párrs. 5, 6

Achca gentecunaca autoridadcuna tiyachun minishtirishca cashcatami yuyancuna. Chaimantami paicunaca autoridadcuna churashca huaquin leycunata cazuncuna. Pero shuj ley mana alli o sinchi cashcata yuyashpaca paicunaca ña mana cazusha nincunachu. Bibliapi nishca shinaca cai pacha gobiernocunaca Diablopaj maquipi cashcamantami gentecunataca achcata llaquichicuncuna. Chaimantami Jehová Diosca ñalla paicunata tucuchinga (Salmo 110:​5, 6; Eclesiastés 8:9; Lucas 4:​5, 6). Shinapish Bibliapica: “Autoridadcunapaj contra tucushpaca Diospaj contrami tucunchij” ninmi. Jehová Diosca cai Allpapi orden tiyachunmi autoridadcuna tiyachun saquishca. Paica paicunata cazuchun, respetachunmi munan. Shinallataj ‘paicunaman cuna cashcata’, impuestoscunatapishmi cuna canchij (Romanos 13:​1-7). Huaquinpica huaquin leycunata cazunaca sinchi cashcatachari yuyashun. Mana cashpaca huaquin impuestocunata pagana yallitaj caro cashcamantachari mana paganata munashun. Pero ñucanchijcunaca Jehová Diostami cazuna canchij. Paica gobiernocunata cazuchunmi munan. Pero gobiernocuna Diospaj mandashcacunata mana cazuchun nijpica paicunataca mana cazunachu canchij (Hechos 5:29). w23.10 pág. 8 párrs. 9, 10

Sansón huacharijpica filisteocunami israelitacunata mandacurca (Jueces 13:1). Paicunaca israelitacunataca achcatami llaquichircacuna. Chaimantami Sansón huacharijpica Jehová Diosca filisteocunapaj maquimanta paicunata quishpichichun agllarca (Jueces 13:5). Chaita rurangapajca Sansonca Jehová Diospimi confiana carca. Filisteo soldadocunaca Sansonta japingapajmi Lehí pushtuman rishcacuna carca. Chaica Judá llajtapimi saquirishcanga. Judapi causajcunaca filisteocunata ricushpaca achcatami mancharircacuna. Chaimantami ishqui mushuj huascacunahuan huatashpa Sansontaca filisteocunaman entregarcacuna (Jueces 15:​9-13). Pero Diospaj espíritu poderta cujpimi Sansonca cacharirirca. Chai qꞌuipaca ‘manaraj alli chaquishca burro quijadosta japishpami huaranga filisteocunata huañuchirca’ (Jueces 15:​14-16). w23.09 págs 2, 3 párrs. 3, 4

Bibliapi nishca shinaca ‘Diosca pai imata rurasha nishcataca huiñaimantami yuyarishca’. Chaica ¿imatataj nisha nin? Yaya Dios tucui pai imata rurasha nishcacuna pajtarichun achca tiempo pasachun saquishcatami nisha nin. Shinallataj Diospaj munai pajtarijpica huiñai huiñaipajmi bendicioncunata charishun. Bibliapi paipaj munai ima shina pajtarinata asha asha yachachishcamantami paitaca achcata agradicinchij. ‘Jehová Diosca tucuitami imapaj cashpapish shuj yuyaihuan rurashca’ (Proverbios 16:4). Chaimantami pai nishcacunaca siempre pajtarin. Pero ¿Diospaj munaica maijantaj can? ¿Paipaj munaita pajtachingapajca imallatataj rurashca? Jehová Diosca punta cꞌariman, punta huarmimanmi paipaj munai maijan cashcata huillarca. Paica: ‘Achca huahuacunata charishpa, mirarishpa allpapi jundarichij. Cai allpatapish cuidaichij. Allpapi causaj tucui animalcunatapish mandaichij’ nircami (Génesis 1:28). Adán y Eva Diospaj contra tucujpimi cai pachapica juchaca tiyai callarirca. Shina cajpipish Jehová Diosca paipaj munaita pajtachingapajca shujtaj decisiontami japirca. Cai Allpapi paipaj munai pajtarichunca jahua pachapi shuj Gobiernota churanatami chai rato decidirca (Mateo 25:34). w23.10 págs. 19, 20 párrs. 6, 7

Jehová Diosca ñucanchijtaca mana alli munaicunata, yuyaicunata mishashpa catichunmi ayudai tucun. Mana alli munaicunata mishangapaj achca huatacunata esforzarishca cashpaca chaita rurashpa catinaca sinchimi cai tucun. Huaquinpicarin apóstol Pedrota yalli mana alli munaicunata charishcatami yuyai tucunchij. Pero Jehová Diosmi ñaupajman catichun fuerzasta cushpa ayudanga (Salmo 94:​18, 19). Por ejemplo, shuj huauquica Jehová Diosta manaraj rijsishpaca achca huatacunatami shujtaj cꞌaricunahuan huainayashpa causarca. Paica chai mapa ruraicunata ña saquishca cashpapish huaquinpica mana alli yuyaicunatami charij carca. ¿Pero ñaupajman catingapajca imatataj rurashca? Cai huauquica: “Jehovami ñucamanca fuerzasta cushpa ayudan. Pai espíritu santota cujpimi pai munashca shina causai tucushcani. Ñuca juchayuj cajpipish fuerzasta cunataca manataj saquishcachu” nircami. w23.09 pág. 23 párr. 12

Joven huauquicuna maqui cruzashca saquirishpaca sinchi crijcunaca mana tucunguichijchu. Ashtahuanpish sinchi crijcuna tucusha nishpaca alli ejemplocunata catingapaj, yachaisapa cangapaj, confianalla cangapaj, chꞌican chꞌican ruraicunata alli rurajcuna cangapajmi esforzarina canguichij. Chashnami shamuj punllacunapi imata mingajpipish alli pajtachinguichij. Joven huauquicuna, espiritualmente sinchi tucungapaj sinchita esforzarina cashcata cuentata cushpaca ashatachari sustaringuichij. Pero Jehová Diosmi cancunata ayudasha nin (Isaías 41:​10, 13). Shinallataj congregacionpi caj huauqui panicunapishmi cancunataca ayudangacuna. Espiritualmente sinchi tucushpaca cushillami causanguichij. Joven huauquicuna, cancunataca achcatami cꞌuyanchij. Sinchi crijcuna tucungapaj sinchita esforzaricushcamanta Jehová Dios cancunata bendiciashpa catichun. w23.12 pág. 29 párrs. 19, 20

Cai ejemplopi yuyashun. Huauqui panicunahuan alajata pasashpaca tandallachari shuj fotota llujchinata munanguichij. Canca quimsa fotocunatami llujchingui. Pero qꞌuipaca shuj huauqui shuj fotopi mana alli llujshishcatami cuentata cungui. Seguramente chai fotota borrashpa ashtahuan alli fotocunallahuanmi saquiringuiman ¿nachu? Huauqui panicunahuan cushilla pasashcatami siempre yuyarinchij. Pero ¿maijan huauqui o pani ñucanchijta llaquichijpica imatataj rurana canchij? Shuj fotota borracuj shinami paicuna llaquichishcataca mana yuyaricunalla canchij (Efesios 4:32). Chaita rurashpaca chai huauquihuan o chai panihuan alli pasashcallatami alaja fotocuna shina yuyaipi charishun. w23.11 págs. 12, 13 párrs. 16, 17

Apóstol Pabloca ‘alli yuyaihuan churarichij’ nishpaca huarmicuna paicuna churarishcahuan Jehová Diosta respetashcata ricuchina cashcatami nisha nirca. Shinallataj huarmicunaca shujtajcunata ama ñitcachingapajmi alli yuyashpa imata churarinata agllana can. Diosta alli sirvij panicuna, ¡cancuna chaita ruracushcamantaca achcatami felicitanchij! Shinallataj Diosta alli sirvij panicunaca alli yuyaiyujcunami cana can. ¿Chaica imatataj nisha nin? Alli yuyaiyujcuna cashpaca ima alli cashcata, ima mana alli cashcata yachashcamantami alli decisioncunata japishun. Por ejemplo, Abigailmanta parlashun. Abigailpaj cusa mana alli decisionta japishcamantami tucui paipaj familiaca achca llaquicunata charigrirca. Pero Abigailca paipaj familia ama llaqui tucuchunmi imata ruranata alli yuyarca. Chashnami paipaj familiata salvarca (1 Samuel 25:​14-23, 32-35). Shinallataj alli yuyaiyujcuna cashpaca ima hora parlanata, ima hora upalla saquirinatami yachashun. Manaraj shujtajcunata ayudashpapish paicunata ama mana alli sintichingapajmi ima shina ayudanata alli yuyashun (1 Tesalonicenses 4:11). w23.12 pág. 20 párrs. 8, 9

Apóstol Pabloca cai punllapaj versopi nishcacunataca Romapi caj huauqui panicunamanmi quillcarca. Paicunaca Jesusmanta, Jehovamanta yachashca qꞌuipaca paicunapimi feta churarcacuna. Chaimi paicunaca Jesusta catijcuna tucurcacuna. Paicuna sinchi feta charishcata ricushpami Jehová Diosca paicunataca “cashcata rurajcunata” shina ricui callarirca. Shinallataj espíritu santohuanmi shuj esperanzata charichun paicunataca agllarca (Romanos 5:1). Chai huauqui panicunaca paicuna shuyacushca pajtarinataj cashcatami seguros carcacuna. Pabloca Efesopi caj huauqui panicunamanmi ‘jucha illajcuna’ shuj bendicionta chasquina cashcata intindichirca (Efesios 1:18). Shinallataj Colosaspi caj huauqui panicunamanca chai bendicionta maipi chasquinatami nirca. Paica ‘Jahua pachapi cancunapaj huaquichishca bendiciontami shuyacunguichij’ nircami (Colosenses 1:​4, 5). Shinashpaca ungidocunaca causarishca qꞌuipaca jahua pachapi huiñai huiñaita causana esperanzatami charincuna. Paicunaca jahua pachapica Jesushuanmi mandangacuna (1 Tesalonicenses 4:​13-17; Apocalipsis 20:6). w23.12 pág. 9 párrs. 4, 5

Griego rimaipi “huaquichinga” nishpaca shuj llajtata ama llaquichichun soldadocuna cuidacushcatami nin. Soldadocuna chai llajtapaj pungucunata cuidacushcamantami chaipi causajcunaca tranquilo dormi tucurcacuna. Chashna layallatajmi Diospaj sumaj causaica ñucanchijcuna tranquilo sintirichun ñucanchij shungutapish, yuyaitapish huaquichin (Salmo 4:8). Ñucanchij llaquicuna mana utca tucurijpipish Ana shinami asha tranquilo sintiri tucunchij (1 Samuel 1:​16-18). Chashna tranquilo sintirishcamantami alli yuyashpa imatapish alli agllashun. ¿Ñucanchijca imatataj rurai pudinchij? Ima shinami ñaupa llajtapi causajcuna paicunata cuidachun shuj soldadota mañaj carca, ñucanchijpish Jehová Dios ñucanchijta cuidachunmi mañana canchij. Paitaca tranquilo sintiringacamami mañana canchij (Lucas 11:9; 1 Tesalonicenses 5:17). Jatun llaquicunahuan chꞌimbapuracushpaca Yayitu Diosta mañanataca amataj saquichu. Chashna mañajpimi paica cambaj shungutapish, yuyaitapish huaquichinga (Romanos 12:12). w24.01 págs. 21, 22 párrs. 5, 6

Jesusca Diospaj shutita jatunyachingapajca mana pꞌiñarishpami achca llaquicunata ahuantarca. Paitaca yangamantami juchachircacuna, macarcacuna, cꞌamircacunapish. Jesusca Jehová Diosta tucuipi cazushcamantami paimanta burlarijpipish mana pingarishpa huañurca (Hebreos 12:2). Shinallataj Jesusca chai sinchi punllacunapi Diablo paita llaquichicushcatami yacharca (Lucas 22:​2-4; 23:​33, 34). Diabloca Jesustaca Jehová Diosmantami caruyachisha nirca. Pero mana pudircachu. Ashtahuanpish Yaya Diosta tucuipi cazushpami Jesusca Diablo llulla cashcata ricuchirca. Shinallataj Diosta sirvijcuna achca llaquicunata charishpapish Jehová Diosta tucui shunguhuan sirvi tucushcatami ricuchirca. ¿Jesusta cushichisha ninguichu? Chaipajca Diospaj shutitami jatunyachina cangui. Shinallataj shujtaj gentecunatapish Jehová Diosta alli rijsichunmi ayudana cangui. Chashnami Jesuspaj ejemplota caticushcata ricuchingui (1 Pedro 2:21). Ashtahuanpish shujtajcunaman Diosmanta yachachishpami Jehová Diosta cushichingui. Diablo llulla cashcatapishmi ricuchingui. w24.02 págs. 11, 12 párrs. 11-13

Huata 2018-manta huata 2022-camaca shuj millón yalli gentecunami bautizarishcacuna. Jehová Diosman mingarishpaca Jesuspaj catijcuna canatami agllanchij. Shinallataj ñucanchij causaipi Diospaj munaita ruranata punta lugarpi churanatami agllanchij. Jesusca: “Maijanpish ñucata catisha nijca paipajllaca ña ama causachun” nircami (Mateo 16:24). Griego rimaipi “paipajllaca ña ama causachun” nishpaca “pai munashcata ama rurachun” ninmi. Shinashpaca Jehová Diosman mingarishpaca pai millashca ruraicunamantami caruyana canchij (2 Corintios 5:​14, 15). Por ejemplo, aichapaj ruraicunamanta, huainayanamantami caruyana canchij (Gálatas 5:​19-21; 1 Corintios 6:18). ¿Chai mapa ruraicunamanta caruyanaca sinchichu can? Jehová Diosta tucui shunguhuan cꞌuyashpa, shinallataj paipaj mandashcacuna ñucanchij allipajllataj alli cashcata seguro cashpaca mapa ruraicunamanta caruyanaca mana sinchichu canga (Salmo 119:97; Isaías 48:​17, 18). w24.03 págs. 2, 3 párrs. 1, 4

Jehová Diosca paipaj ñaupajpi alli ricurijcunamanmi espíritu santota cun (Mateo 12:18). Jehová Dios espíritu santota cujpimi ñucanchij causaipica chꞌican chꞌican alli cualidadcunata ricuchi tucunchij. Chaimantami tucuicuna: “¿Espíritu santota charishcataca ñuca causaipi ricuchicunichu?” nishpa tapurina canchij. Por ejemplo, Jehová Diosta manaraj rijsishpaca ashalla pacienciatachari charircanchij. ¿Pero paita rijsishca pachamantaca ashtahuan pacienciatachu charinchij? Shinashpaca Diospaj espíritu santopaj ayudahuan ñucanchij causaipi alli cualidadcunata ricuchishpaca Jehová Diospaj ñaupajpi alli ricurishcatami cuentata cushun. Jesús paipaj causaita cushcamantami quishpiri tucunchij. Pero Jehová Diosca paipaj ñaupajpi alli ricurijcunallamanmi chai oportunidadta cun (1 Timoteo 2:​5, 6). Ñucanchijca Jesús huañushcapi crishpa bautizarishpaca Jehová Diospaj ñaupajpimi alli ricurinchij. Pero ña bautizarishca cashpapish Diospaj ñaupajpi mana alli ricurishcata yuyashpaca ¿imatataj rurana canchij? Juchayujcuna cashcamantami huaquinpica ñucanchij shunguca chai panda yuyaihuan pandachi tucun. Chaimantami huaquinpica ñucanchij shungupica mana confiana canchij. Ashtahuanpish Jehová Diospimi confiana canchij. Paica ‘Jesús quishpichij cashcata crijpica bendiciashami’ ninmi (Salmo 5:12; Romanos 3:26). w24.03 págs. 30, 31 párrs. 15, 17