Diciembre

¿Jehová Diosca huañushcacunata causachingapaj poderta charinchu? Ari. Paica tucui poderta charij Diosmi can (Apocalipsis 1:8). Paica poderoso cashcamantami huañuitapish, paipaj contracunatapish tucuchinga (1 Corintios 15:26). Yayitu Jehová Diosca tucuicunamanta yalli alli yuyaitami charin. Chaimantapishmi huañushcacunata pai causachinapica tucui shunguhuan crinchij. Bibliapica Jehová tucui estrellacunapaj shuticunata yuyarishcata, tucui huañushcacunatapish alli yuyarishcatami yachachin (Isaías 40:26; Job 14:13; Lucas 20:38). Paica huañushcacuna ima shina cashcataca tucuitami yuyarin. Chaimantami paicuna ima shina cashca laya paicunapaj tucui yuyaicunahuan causachinga. ¿Jehová Dios huañushcacunata causachinapica imamantataj crinchij? Caicama ricushca shinaca Jehová Diosca huañushcacunata causachina munaitami charin. Chaita pajtachingapajpish achca podertami charin. Ashtahuancarin Bibliapica Jehová Dios huaquincunata ña causachishcatami parlan. Cai tucuita intindishpaca Dios huañushcacunata causachinapica tucui shunguhuanmi crinchij. Jehová Diosca huaquin runacunamanmi huañushcacunata causachichun poderta curca. w23.04 págs. 9, 10 párrs. 7-9

Ñucanchijraj respetohuan, alaja shimicunahuan parlajpica gentecunaca mana pꞌiñarishpami uyanata munangacuna. Pero paicuna sinchita rimajpi o burlari callarijpica mana parlashpa catinatami decidi tucunchij (Proverbios 26:4). Huaquin gentecunallami ñucanchijtaca mana alli tratancuna. Ashtahuanpish la mayoriami ñucanchijta uyanata munangacuna. Chaimantami shujtajcuna mana alli tratajpi, sinchi tapuicunata rurajpica manso shungu cangapaj Jehová Dios ñucanchijta ayudachun mañana canchij. Manso shungu cashpallami shujtajcuna pꞌiñachisha nijpipish mana pꞌiñarishun. Ashtahuanpish respetohuan cutichijpica paicunaca paicunapaj yuyaitami cambiangacuna. Bibliapi nishcacuna ciertotaj cashcatapishmi intindingacuna. Shinaca ‘manso shunguhuan, respetohuan cutichingapajmi allichirishca cana canchij’ (1 Pedro 3:15). Chaimanta manso shungu, imata mana manchaj, sinchi cashunchij. w23.09 pág. 19 párrs. 18, 19

Cunanca pacienciata ima shina ricuchina cashcatami yachashun. Por ejemplo, pacienciata charishpaca mana utca pꞌiñarishunchu. Shinallataj imatapish utca rurachun nijpica mana rato colerashunchu. Shujtajcuna llaquichijpipish mana chashnallataj llaquichishunchu (Éxodo 34:6). Pacienciata charishpaca imatapish mana pꞌiñarishpami shuyashun. Achcata shuyana cajpipish mana pꞌiñarishunchu (Mateo 18:​26, 27). Pacienciata charishpaca imatapish alli yuyashpami rurashun. Importante cosascunataca mana apuradochu rurai callarina canchij. Shinallataj mana apuradochu tucuchina canchij. Chaipaj randica chaicunata ima shina ruranatami alli yuyanaraj canchij. Chai qꞌuipaca alli trabajota rurangapajmi tiempota llujchina canchij. Llaquicunata, jarcaicunataca mana quejarishpallami ahuantana canchij. Chashnami pacienciata charishpaca llaquicunata charishpapish Jehová Diosta cushilla sirvishpa catingapaj esforzarishun (Colosenses 1:11). Shinashpaca pacienciata charishcata pajtachingapajmi esforzarina canchij. w23.08 págs. 20, 21 párrs. 3-6

Gentecunaca ñucanchij shungu ucupi ima tiyashcataca mana yachai tucunchu. Pero Jehová Diosca ñucanchij shungu ucupi ima tiyashcataca tucuitami yachan. Chaimantami shungupi mana alli yuyaicunata, mana alli munaicunata ama charingapaj cuidarina canchij. Shinallataj Jehová Diospaj mandashcacunata ñucanchij shungupi huaquichingapajmi esforzarina canchij. Chaita rurajpica Diablopaj yachachishcacunaca ñucanchij shungumanca mana yaicui tucungachu (1 Juan 5:​18, 19). Ashtahuancarin Diospaj mandashcacunata ñucanchij shungupi huaquichingapaj esforzarijpica Yaya Diosca cushillami sintiringa (Juan 4:14). Jehová Diospajman ashtahuan cꞌuchuyangapaj esforzarishpaca paitaca ashtahuanmi cꞌuyashun. Shinallataj mana alli ruraicunata rurashpa Jehová Diospaj shunguta ama llaquichingapajmi esforzarishun. Croacia llajtapi causaj pani Martamanta parlashun. ¿Paica tentacioncuna ricurijpi juchapi ama urmangapajca imatataj rurarca? Paica: “Tentacioncuna ricurijpica allita ruranata agllana, aicha munaicunata mishanaca sinchimi carca. Pero juchapi urmashca cashpaca ratocamallami cushicuiman carcani. Jehová Diosta mashnata cꞌuyashcata yuyarinami juchapi ama urmachun fuerzasta curca” nircami. Cai panica juchapi urmashpaca achca llaquicunata charina cashcatami cuentata curca. Ñucanchijpish tentacioncuna ricurijpica achca llaquicunata charinatami yuyarina canchij. w23.06 págs. 20, 21 párrs. 3, 4

Jehová Dios paipaj shuti cutin alli nishca cachun munashcataca Jesusca allimi yachan. Chaimantami paita catijcunamanca cashna nishpa mañachun yachachirca: ‘Jahua pachapi caj ñucanchij Yaya, cambaj shutica jucha illaj nishca cachun’ (Mateo 6:9). Jesuspajca Jehová Diospaj shutita jatunyachinami tucuimanta ashtahuan importante carca. Chaimantami Diospaj shutita jatunyachingapajca tucuita rurashca. Pai shinaca pi mana rurashcachu. Chaita rurajpipish paipaj contracuna prezu japishpaca ‘Diospaj shutitami mapayachishcangui’ nishpami yangamanta juchachircacuna. Pero Jesusca Diospaj shutita mapayachinataca mana nunca yuyarcallapishchu. Jesusca paita yangamanta juchachishpa huañuchinataca allimi yacharca. Chaimantami paita manaraj prezu japijpica yallitaj llaquilla sintirirca (Lucas 22:​41-44). w24.02 pág. 11 párr. 11

Ñucanchijca ñucanchij familiata yallimi Jehová Diosta y Jesusta cꞌuyana canchij (Mateo 10:37). Pero chaica mana nisha ninchu ñucanchij familiata mana cuidana cashcata. Ashtahuanpish Jehová Diospaj, Jesuspaj ñaupajpi alli ricurisha nishpaca ñucanchij familiatami alli cuidana canchij (1 Timoteo 5:​4, 8). Chaita rurashpaca cushi causaitami charishun. ¿Imamanta? Jehová Diosca familiacunataca cushilla causachunmi rurarca. Cusa huarmicuna paicunapura cꞌuyaita, respetota ricuchinacushpa, yaya mamacunapish huahuacunata cꞌuyaihuan yachachishpa, huahuacunapish yaya mamata tucuipi cazushpaca cushillami causangacuna (Efesios 5:33; 6:​1, 4). Tal vez ñucanchij yuyashca shinami ñucanchij familiataca cuidanata munashun. Mana cashpaca ñucanchij culturapi yachachishca shina o yachaj gentecuna nishca shinami familiataca cuidanata munashun. Pero chaita ruranapaj randica familia ucupica tucuicunami Bibliapi nishcacunata pajtachina canchij. Ñucanchij publicacioncunapica Bibliapi nishcacunata ima shina pajtachinatami yachachin. w23.08 pág. 28 párrs. 6, 7

Diosta alli sirvij panicunaca chꞌican chꞌican trabajocunata, ruraicunatami alli ruranata yachana can. Can uchillaraj cajpi imalla yachashcacunaca tucui vidapajmi sirvinga. Por ejemplo, alli liyinata, alli escribinatami yachai tucungui. Huaquin gentecunaca “huarmicunaca liyinata, escribinataca mana yachanachu can” nishpami yuyancuna. Pero Diosta sirvij panicunapajca liyinata, escribinata yachanaca achca valishcami can (1 Timoteo 4:13). Chaimantami panicunaca jarcaicuna ricurijpipish alli liyinata, alli escribinata yachana can. ¿Chaita ruranaca imamantataj valishca can? Alli liyijcuna, alli escribijcuna cashpaca trabajota japinaca ashtahuan jahuallami canga. Shinallataj chaicunata yachanami Bibliata alli estudiachun, shujtajcunamanpish Diosmanta yachachichun ayudanga. Ashtahuantajca Diospaj Shimita liyi tucushcamantami Jehová Diospajmanca ashtahuan cꞌuchuyai tucungui (1 Timoteo 4:15). w23.12 págs. 20, 21 párrs. 10, 11

Tentacioncunapi ama urmangapaj Jehová Diosta mañashunchij. Juchayujcuna cashcamantami tentacioncunapi ama urmangapaj punllanta esforzarishpa catina canchij. Diabloca tucui laya trampacunata churashpami ñucanchijta urmachisha nin. Por ejemplo, mapa, mana alli diversioncunahuanmi Diosmanta caruyachisha nin. Cai mana alli diversioncunapi chagrurishpaca Diospaj ñaupajpimi mana alli ricurishun. Qꞌuipacarin hasta jatun juchacunapimi urmashun (Marcos 7:​21-23; Santiago 1:​14, 15). Tentacioncunataca mana ñucanchijllachu ahuantai tucunchij. Chaimantami Jehová Dios ñucanchijta ayudachun minishtinchij. Jesusca Jehová Diosta cashna nishpa mañachunmi yachachirca: “Ima mana alli ruraicunapi urmachunpish ama saquihuangui. Diablopaj maquimantapish quishpichihuangui” (Mateo 6:13). Jehová Diosca ñucanchijta ayudangapajca listomi can. Pero ñucanchijta ayudachunca paitami mañana canchij. Diosta mañashpapish tentacioncunapi ama urmangapajca cada unomi esforzarishpa catina canchij. w23.05 págs. 6, 7 párrs. 15-17

Cusa huarmicunaca Jehovapaj alli amigocuna cashpaca tucui shunguhuanmi paipaj mandashcacunata cazunata munangacuna. Chashnami matrimonio ucupi jarcaicuna ricurijpipish cꞌuyaica mana chiriyanga. Shinallataj Jehová Diosta cꞌuyaj cusa huarmicunaca pai shina tucuita rurangapajmi esforzarincuna. Por ejemplo, cꞌuyaita, pacienciata ricuchingapaj, shungumanta perdonangapajpishmi esforzarincuna (Efesios 4:32–5:1). Chai cualidadcunata ricuchij cusa huarmicunaca cushillami causancuna. Por ejemplo, pani Lenaca 25 huatacunatami cazada can. Paica: “Ñuca cusaca Jehová Diostaca tucui shunguhuanmi cꞌuyan. Chaimantami paitaca tucui shunguhuan cꞌuyani” nircami. Jesuspaj yaya mamacuna cachunca Jehová Diosca Davidpaj familiamantaca José y Mariatami agllarca. Pero, ¿imamantataj paicunataca agllarca? José y Mariaca Jehová Diospaj alli amigocunami carca. Chaimantami cazarashca qꞌuipa paita tucui shunguhuan sirvishpa catinataca seguro carca. w23.05 págs. 20. 21 párrs. 3, 4

Ñucanchijta jatun Pushajca Jesusmi can. Paica jucha illaj, imapipish mana pandarijmi can. Pero cai Allpapi ñucanchijta pushachun pai agllashcacunaca juchayujcunami can. Chaimantami paicunata cazunaca huaquinpica sinchi can. Cai huauquicuna ñucanchij mana munashca instruccioncunata cujpicarin paicunata cazunaca ashtahuan sinchimi canga. Apóstol Pedroca chashnami sintirirca. Shuj ángel leypi mandashca shina mana micuna cashca animalcunata micuchun mandajpica Pedroca quimsa cutinmi chaitaca manataj micushachu nirca (Hechos 10:​9-16). Paica chai animalcunataca nunca mana micushcachu carca. Chaimanta Diospaj ángel mushuj instruccioncunata cujpica mana cazusha nircachu. Cutin apóstol Pabloca paiman cushca instruccioncunatami cazuj carca. Chaimi Jerusalenpi caj ancianocunaca Moisesman cushca leyta cazucushcata ricuchichun Pablota nircacuna. Chaipajca Pabloca chuscu huauquicunandij temploman rishpa Moisesman cushca leypi nishca shinami chuyayarina carca. Pabloca Jesusta catijcuna Moisesman cushca leyta ña mana cazuna cashcata, pai ima mana allita mana rurashcataca allimi yacharca. Chashnapish anciano huauquicuna nishcatami cazurca. “Cayandij punllaca Pabloca chai runacunata pushashpami Moisesman cushca leypi nishca shina paicunandij chuyayarirca” (Hechos 21:​23, 24, 26). Pabloca anciano huauquicunata cazushpami congregacionpi caj tucui huauqui panicuna tandalla cachun ayudarca (Romanos 14:​19, 21). w23.10 pág. 10 párrs. 15, 16

Alli amigocunaca manchaita ricuchina cashcataca manachari yuyashcanchij. Shinapish, Salmo libropi nishca shinaca Jehová Diospaj alli amigocuna casha nishpaca paitami manchana canchij. Jehová Diosta mashna huatacunata sirvicushpapish paita tucui shunguhuan cazungapaj, manchangapajmi esforzarina canchij. Pero ¿Diosta manchanaca imataj can? Jehová Diosta manchajcunaca paitami tucui shunguhuan cꞌuyancuna. Shinallataj paicunapaj ruraicunahuan paita cushichi tucushcata o llaquichi tucushcatami yachancuna (Salmo 78:41; Proverbios 27:11). Paimanta ama caruyangapajpishmi esforzarincuna. Bibliapi nishca shinaca Jesusca Yaya Diostami tucui shunguhuan cazuj, manchaj carca (Hebreos 5:7). Pero Bibliapi chashna nishpaca, mana nisha ninchu Jesús Jehová Diosta manchaihuan, chujchuihuan sirvij cashcata (Isaías 11:​2, 3). Ashtahuancarin Jesusca Jehová Diosta tucui shunguhuan cꞌuyashcamantami paita tucuipi cazungapaj esforzarirca (Juan 14:​21, 31). Ñucanchijpish Jehová Diosta tucui shunguhuan cꞌuyashcamantami paitaca sirvinchij. Shinallataj Jehová Dios cꞌuyaj, tucuita yachaj, cashcata ruraj, tucui poderyuj cashcataca allimi yachanchij. Chaimantami paita sirvisha ninchij. w23.06 págs. 14, 15 párrs. 1, 2, 5

Uziasca jatun mandaj tucushpaca Jehová Dios alli mandaj cachun paita ayudashcatami cungarirca. ¿Paimantaca imatataj yachanchij? Mana cuidadota charishpaca Jehová Dios ayudashcamanta paita alli sirvi tucushcatami cungarishun. Ñucanchijca Diospaj pueblopi imapi ayudacushpapish ñucanchijllataj alabarinapaj randica Jehová Diostami jatunyachina canchij (1 Corintios 4:7). Ashtahuanpish siempremi juchayujcuna cashcamanta imapi pandarijlla cashcata yuyarina canchij. 60 yalli huatacunata charij huauquica cashnami nirca: “Shujtajcunata yalli cashcata ama yuyangapajmi esforzarini. Imapi pandarishcamanta shujtajcuna corregijpica paicuna nishcacunata alli chasquingapajmi esforzarini”. Ñucanchijpish humildecuna cangapaj, Jehová Diosta tucuipi cazungapaj esforzarishpaca cushillami causashun (Proverbios 22:4). w23.09 págs. 10, 11 párrs. 10, 11

Jesusta catijcunaca llaquicunata ahuantangapajmi esforzarina carcacuna. Paicunaca Diosta sirvishcamantami ashtahuan llaquicunata charircacuna. Por ejemplo, paicunataca panda religioncunata pushajcuna, autoridadcunapishmi llaquichijcuna carca. Paicunapaj familiacunapishmi paicunapaj contra carcacuna (Mateo 10:21). Shinallataj huauqui panicunata chꞌicanyachingapajmi apostatacunaca pandata yachachijcuna carca (Hechos 20:​29, 30). Chai llaquicunata charishpapish paicunaca ahuantashpami catircacuna (Apocalipsis 2:3). ¿Ahuantangapajca imatataj rurarcacuna? Paicunaca ñaupa tiempopi Diosta sirvijcunapimi yuyajcuna carca. Por ejemplo, Jobpimi yuyajcuna carca (Santiago 5:​10, 11). Shinallataj Jehová Diostami mañajcuna carca (Hechos 4:​29-31). Llaquicunata ahuantashcamanta Jehová Dios bendicianatapishmi seguros carcacuna (Hechos 5:41). Ñucanchijcunapishmi llaquicunataca ahuantai tucunchij. Chaipajca Bibliapi, publicacioncunapi tiyaj ejemplocunapimi yuyana canchij. w23.07 pág. 3 párrs. 5, 6

Ñucanchijcuna pandarijpipish Jehová Diospish, Jesuspish ñucanchijpimi confiashpa catingacuna. Apóstol Pedropi yuyashun. Quimsa cutin Jesusta negashca qꞌuipaca Pedroca Jehová Diosmanta caruyanata, o Jesusta catishpa catinatami decidina carca. Jesusca manaraj huañushpaca Pedrotaca: ‘Cambaj crishca ama chiriyachunmi ñucaca Diosta rogarishpa mañashcani. Cambaj huauquicunata sinchiyachingui’ nishcami carca (Lucas 22:​31, 32). Pedroca Jesuspaj shimicunata yuyarishpami achcata animarishcanga. Ñucanchijpish huaquinpica sinchi decisioncunatami japina canchij. Pero chai ratoca Jehová Diosca ancianocunata utilizashpami paimanta ama caruyachun ayudanga (Efesios 4:​8, 11). Jehová Diosca Pedroman, caishuj apostolcunamanpishmi imalla minishtishcacunata cushpa ayudarca. Jehová Diospaj Gobiernota punta lugarpi churajpica paica ñucanchijmanpishmi imalla minishtishcacunata cunga. w23.09 págs. 24, 25 párrs. 14, 15

Yayitu Jehová Diosmi tucuita ricucun. Shujtajcunata ayudashpaca paiman mañachishca shinami can. Anciano o siervo ministerial ña mana cajpipish chai asignacioncunata tucui shunguhuan pajtachishcataca Jehová Diosca manataj cungarinchu (1 Corintios 15:58). Shinallataj Jehová Diosca cꞌuyaita ricuchishpa catingapaj esforzaricushcatami ricun. Jehová Diosca paita, shujtajcunatapish cꞌuyachunmi munan. Paita ashtahuan cꞌuyangapajca paipaj Shimitami liyina canchij, chaipi nishcacunapipishmi yuyana canchij, punllanta mañangapajpishmi esforzarina canchij. Shinallataj huauqui panicunata cꞌuyashcata ricuchingapajca paicunatami imapi minishtishcapi ayudana canchij. Caicunata rurashpaca Jehová Diospajman, huauqui panicunapajmanmi ashtahuan cꞌuchuyashun. Chashnami paicunahuanca huiñai huiñaita alli apanacushun. w23.07 págs. 10-13 párrs. 11, 13, 18

Cada unomi jambiringapaj ima tratamientota catina cashcata agllana canchij. Shuj tratamientota agllacushpaca Bibliapi nishcatami yuyarina canchij. Pero Bibliapica saludmanta parlashpaca achca mandashcacunataca mana cunchu. Yahuarmanta jarcarina cashcata, brujianamanta caruyana cashcallatami nin (Hechos 15:20; Gálatas 5:​19, 20). Chai mandashcacunata yuyaipi charishpami cada uno ima tratamientota catinata agllana canchij. Tal vez “cai tratamientoca allimi, pero chai tratamientoca mana allichu nishpachari” yuyashun. Pero ñucanchij yuyashca shina yuyachunca shujtajcunataca mana obliganachu canchij. Chaipaj randica cada uno imata decidishcatami respetana canchij. Shinallataj cai chuscu yuyaicunatami yuyaipi charina canchij: 1) Jehová Diospaj gobiernollami tucui ungüicunata tucuchinga (Isaías 33:24). 2) Cada unomi “quiquin ima yuyacushcataca alli cashcata crina can” (Romanos 14:5). 3) Shujtajcuna ima decidishcataca mana juzganachu canchij. Paicunataca mana ñitcachinapishchu canchij (Romanos 14:13). 4) Ñucanchijcunallapi yuyanapaj randica congregacionpi tucuicuna tandalla cachunmi ayudana canchij (Romanos 14:​15, 19, 20). w23.07 págs. 24, 25 párr. 15

¿Jehová Diostaca mashnataj cꞌuyangui? ¡Seguramente paitaca achcatami cꞌuyangui! Ñaupa punllacunamantapachami achca gentecunaca Jehová Diostaca achcata cꞌuyashcacuna (Salmo 104:​33, 34). Paicunaca Jehová Diosta ashtahuan sirvingapajca huaquin cosascunatami ladoman saquircacuna. Chashnami paita cꞌuyashcata ricuchircacuna. Israelpi causaj nazareocunami chaitaca rurarcacuna. Huaquin israelitacunaca Jehová Diosta ashtahuan sirvingapajmi huaquin sacrificiocunata rurarcacuna. Paicunataca nazareocuna o agllashcacuna nishpami rijsijcuna carca. Moisesman cushca leypica cꞌari cashpa, huarmi cashpapish Jehová Diosta ashtahuan sirvingapaj shuj ari ninacuita rurai tucushcatami nirca. Paicuna ari ninacushca tucuringacamami nazareocuna shina causana carcacuna (Números 6:​1, 2). Nazareocunaca israelitacuna mana pajtachina cashca mandashcacunatami pajtachina carcacuna. ¿Pero paicunaca imamantataj nazareo tucunata agllajcuna carca? Jehová Diosta cꞌuyashcamanta, pai cushcacunamanta pagui ningapajmi chashna rurajcuna carca (Deuteronomio 6:5; 16:17). w24.02 pág. 14 párrs. 1, 2

Bibliapica Jehová Diosca paita sirvijcunata cꞌuyashcamanta paicunamanta mana caruyaj cashcatami nin. Shinallataj Diosta sirvijcunapish paicunapura cꞌuyanacushpa tandalla cana cashcatami nin (2 Samuel 9:​6, 7). Yaya Diosca paita cꞌuyashcamanta paimanta mana caruyachunmi munan. Chaimantami Jehová Diosta ashtahuan cꞌuyangapaj esforzarina canchij. ¿Danielca Jehová Diosta tucui shunguhuan cꞌuyashcataca ima shinataj ricuchirca? Danielca tucui vidami Jehová Diosta cꞌuyashcata ricuchirca. Pero 90 huatacunata charishpaca shuj jatun jarcaihuanmi chꞌimbapurarca. Rey Dariota huaquin sirvijcunaca Danieltaca mana ricunachijcunachu carca. Jehová Diostapish mana respetajcunachu carca. Chaimantami Danielta huañuchisha nircacuna. Chai millai runacunaca Darío shuj mushuj leyta aprobachunmi rurarcacuna. Reyta respetashcata ricuchingapajca chai leypi nishca shinaca Danielca 30 punllacunatami Jehová Diostaca mana mañana carca. Shujtaj gentecunaca ama huañungapajllami chai leytaca cazurcacuna. Pero Danielca paicuna shinaca mana carcachu. Paica imata mana manchashpami chai leyta mana cazunata decidirca (Daniel 6:​12-15, 20-22). w23.08 págs. 5, 6 párrs. 10-12

Jehová Diosca huauqui panicunata cꞌuyachunmi munan. ¿Shuj huauqui o pani mana alli tratashca cajpica imatataj rurana canchij? Ñucanchijta de adrede llaquichisha nishcataca mana yuyanachu canchij. Ashtahuanpish allicunata rurangapaj esforzaricushcatami yuyarina canchij. Chashnami paicunata cꞌuyashcata ricuchishun (Proverbios 12:18). Juchayujcuna cajpipish Jehová Diosca tucuicunatami cꞌuyan. Chaimantami ñucanchijcuna imapi pandarijpica paica mana pꞌiñarishca saquirin. Ashtahuanpish ñucanchijpimi confiashpa catin (Salmo 103:9). Chaimanta Jehová Dios shina shujtajcunata perdonashunchij (Efesios 4:32–5:1). Diospaj punlla cꞌuchuyamucushcamantami huauqui panicunahuan tandalla canaca minishtirishca can. Chai punllacunapica Diosta sirvijcunataca ashtahuanmi llaquichingacuna. Maijancunatacarin carcelpimi churangacuna (Proverbios 17:17). w24.03 págs. 15, 16 párrs. 6, 7

Bibliapica huaquin jovencunaca Jehová Diospajman ashtahuan cꞌuchuyangapaj, paipaj ñaupajpi alli ricuringapaj esforzarishcatami nin. Chaimantami paicunaca cushilla causaita charircacuna. Por ejemplo, Davidca jovenraj cashpaca Jehová Diosta sirvinatami agllarca. Chaimantami mandaj tucushpapish Jehová Diosta tucuipi cazushpa catirca (1 Reyes 3:6; 9:​4, 5; 14:8). Davidpaj causaimanta Bibliapi estudiashpaca pai shinami Jehová Diosta sirvinata munangui. Shinallataj Marcosmanta, Timoteomanta ashtahuan yachangapajmi investigai tucungui. Paicunaca jovenmantapachami Jehová Diosta sirvircacuna. Chaita rurashcamantami paicunaca Jehová Diospaj shunguta cushichircacuna. Shamuj punllacunapi cushilla causasha nishpaca cunanmantami esforzarina cangui. Canpi confianapaj randi Jehová Diospi confiajpica paillatajmi alli decisioncunata japichun ayudanga. Canca cushillami causai tucungui. Jehová Diosca paita cushichingapaj sinchita esforzarijta ricushpaca cushillami sintirin. Cꞌuyaj Yayitu Jehová Diosta sirvinaca valishcami can. Chaita rurashpallami cushilla causai tucungui. w23.09 pág. 13 párrs. 18, 19

Apóstol Pabloca huauqui panicuna juchayujcuna cashcamanta imapipish pandarijllacuna cashcataca allimi yacharca. ¿Huaquincunaca Pablotaca ima shinataj tratarcacuna? Por ejemplo, Jerusalenpi tiyaj congregacionman ri callarijpica maijan huauqui panicunaca pai shungumanta cambiashcataca mana crircacunachu (Hechos 9:26). Maijancunacarin Pablomantami huashalla mana allicunata rimai callarircacuna (2 Corintios 10:10). Shinallataj Pabloca apóstol Pedro huauqui panicunata ima shina ñitcachicushcatami ricurca (Gálatas 2:​11, 12). Paipaj alli amigo Marcospish paihuan huillanaman mana risha nishcamantami Pabloca llaquilla sintirishcanga (Hechos 15:​37, 38). ¿Huauqui panicuna chashna llaquichijpica Pabloca paicunamanta caruyarcachu? Mana. Ashtahuanpish Pabloca paicunamanta allicunata yuyashpami paicunahuan shuj shinalla Jehová Diosta sirvishpa catirca. Pabloca huauqui panicunataca achcatami cꞌuyarca. Chaimantami cai punllapaj versopi ricushca shinaca paicunapaj pandarishcacunallata ricunapaj randica paicunapaj alli ruraicunata ricurca. Shinallataj paicunata cꞌuyashcamantami shungumanta perdonarca. w24.03 pág. 15 párrs. 4, 5

Bibliapica manso shungu cana valishca cashcatami yachachin. Por ejemplo, Guerar pueblopi causacujpica filisteocunaca Isaactami envidiai callarircacuna. Chaimi paipaj yaya causacujpiraj allashca pugyucunataca allpahuan taparcacuna. Pero Isaacca paicunahuan pꞌiñanacunapaj randica shujtaj ladopimi causanaman rirca. Chaipica shujtaj pugyucunatami allarca (Génesis 26:​12-18). Shinapish filisteocunaca ‘chai pugyucunapi tiyaj yacucunapish ñucanchijpajmi can’ nircacunami. Paicuna chashna nijpipish Isaacca mana pꞌiñarircachu (Génesis 26:​19-25). ¿Filisteocuna pꞌiñachisha nijpipish imamantataj mana pꞌiñarirca? Paipaj yaya mamami manso shungu canata yachachishcangacuna. Abrahamca imatapish pacienciahuanmi ruraj carca. Cutin, Saraca ‘sumaj causaita mashcaj, manso shungumi’ carca (1 Pedro 3:​4-6; Génesis 21:​22-34). w23.09 pág. 15 párr. 4

Jehová Diosca cꞌuyaj cashcamantami pai agllashca horas paipaj shujlla Churita cai Allpaman cacharca. Jesusca Diospaj Gobiernomantami gentecunaman parlarca. Ashtahuanpish ñucanchijcunata juchamanta, huañuimanta quishpichingapajmi paipaj causaita curca. Chai qꞌuipaca jahua pachapi causarishpami Diospaj Gobiernopi mandaj tucurca. Pero ¿paipaj munaita pajtachingapajca Jehová Diosca imatataj ashtahuan rurarca? Jesús Diospaj Gobiernopi mandacushpa Diospaj munaita cai Allpapi pajtachijpica Diospaj shutica ima mapa illaj, ima juchachina illajmi saquiringa. Bibliaca chai yuyaimantami ashtahuan parlan. Diospaj munai pajtarishpa catichunca pi mana jarcai tucunchu. Paica ‘ñuca munaica ñuca nishca shinallatajmi pajtaringa’ ninmi (Isaías 46:10; Hebreos 6:​17, 18). Cai Allpa shuj Paraíso tucujpimi Adán y Evapaj huahua huahuacunaca jucha illajcuna tucushpa huiñai huiñaita causangacuna (Salmo 22:26). Pero ¿Diospaj munai pajtarichunca ima ashtahuantaj tucuna can? Jahua pachapi, cai Allpapi causajcunaca shujlla familia shina tucushpami Jehová Dioslla mandana cashcata reconocina can (Efesios 1:​8-11). ¿Diospaj munai ima shina pajtarinata yachashpaca manachu cushilla sintirinchij? w23.10 pág. 20 párrs. 7, 8

Babiloniapi causaj judiocunaca Jerusalenman chayashpaca huaquin jarcaicunahuanmi chꞌimbapurarcacuna. Por ejemplo, Babiloniapi causashca shinaca ña mana causai tucurcacunachu. Shinallataj huaquin mandajcunapaj culpamanta, Diospaj enemigocunamantapishmi problemacunata charircacuna. Chaimantami huaquincunapajca Diospaj huasita allichishpa ayudanaca sinchi carca. Chaimi Jehová Diosca paicunata animachun Ageo y Zacariasta cacharca (Ageo 1:1; Zacarías 1:1). Paicuna animajpimi israelitacunaca cutin tucui shunguhuan trabajai callarircacuna. Pero 50 huatacuna qꞌuipaca israelitacunaca cutinmi desanimarircacuna. Chaimi Babiloniapi causaj Esdrasca paicunata animangapaj Jerusalenman tigrarca. Esdrasca Diospaj mandashcacunata copiajmi carca (Esdras 7:​1, 6). Ageopish, Zacariaspish ima tucunata huillashpami Jehová Diospi confiashpa catichun judiocunata ayudarcacuna. Ñucanchijpish paicuna nishcacunata yachashpami Jehová Dios tucuipi ayudanata seguros cashun (Proverbios 22:19). w23.11 págs. 14, 15 párrs. 2, 3

¿Shungumanta cꞌuyajcuna cashcataca ima shinataj ricuchi tucunchij? Chaipajca huauqui panicunatami animana canchij. Shinallataj paicunata llaquishcamantami ayudai tucunchij (1 Tesalonicenses 4:18). Ashtahuanpish ¿cꞌuyai ama chiriyachunca imatataj rurana canchij? Shujtajcuna pandarishcacunata shungumanta perdonangapajmi esforzarina canchij. ¿Cunan punllacunapi cꞌuyaita ricuchinaca imamantataj minishtirishca can? Apóstol Pedroca: ‘Tucui imalla tiyashcacuna tucurinaca ñami cꞌuchuyamucun. Chaimanta caishuj chaishuj cꞌuyaita ricuchinacuichij’ nircami (1 Pedro 4:​7, 8). ¿Shamuj punllacunapica imataj tucunga? Jesusca paita catijcunamanca: “Ñucata catij cashcamantami cancunataca tucui llajtacunapi pꞌiñangacuna” nishpami huillarca (Mateo 24:9). Gentecuna ñucanchijta pꞌiñajpipish Jehová Diosta sirvishpa catingapajca tandallami cana canchij. Diabloca huauqui panicunamantami chꞌicanyachinata munan. Pero caishuj chaishuj cꞌuyanacungapaj esforzarijpica ñucanchijtaca mana chꞌicanyachi tucungachu (Filipenses 2:​1, 2). w23.11 pág. 13 párrs. 18, 19

Diospaj Shimipi yachachishcacunaca achca valishcami can. Gentecunaman Yaya Dios ima shina cashcata yachachijpica paicunaca achcatami beneficiarincuna. Paicunaca Bibliamanta yachai callarishpaca Diablopaj llullacunapi crinatami saquincuna. Chashnami Jehová Dios yallitaj cꞌuyaj, llaquij cashcata cuentata cuncuna. Shinallataj Jehová Dios tucui poderta charishcata yachashpami sorprendidos saquirincuna (Isaías 40:26). Cutin, Jehová Dios cashcata ruraj cashcata, alli yachaita charishcata yachashpaca cushillami sintirincuna (Deuteronomio 32:4; Isaías 55:9; Romanos 11:33). Yayitu Dios cꞌuyaj cashcata yachashcamantapishmi achcata cushicuncuna (1 Juan 4:8). Shinallataj paicunaca Jehová Diospajman cꞌuchuyashpaca huiñai huiñaita causai tucushcata, Diospaj huahuacuna tucui pudishcatami cri callarincuna. Caipi ricushca shinaca gentecuna Diospajman cꞌuchuyachun ayudanaca achca valishcami can. Chaita rurashpami Jehová Dioshuanca tandalla trabajai tucunchij (1 Corintios 3:5). w24.02 págs. 12, 13 párr. 15

¿Canca Bibliata estudiacunguichu? ¿O cambaj yaya mamacunaca testigo de Jehovacunachu can? Seguramente paicunaca canmanca Bibliamantami yachachicuncuna. Tal vez canca bautizarinatami munangui. Chaita ruranaca allimi can. Pero manaraj bautizarishpaca Yaya Diosmanmi mingarina cangui. ¿Jehová Diosmanca ima shinataj mingarinchij? Paitami: “Canllatami adorasha, ñuca causaipica tucuimanta yallica cambaj munaitami rurasha” nishpa mañana canchij. Chashna mañashpaca Yayitu Diosta ‘tucui shunguhuan, tucui causaihuan, tucui yuyaihuan, tucui fuerzahuan’ cꞌuyagrishcatami ricuchinchij (Marcos 12:30). Ñucanchijlla cashpami Yaya Diosta mañashpa paiman mingarinchij. Cutin Diosman mingarishcata tucuicuna yachachunca tucuicunapaj ñaupajpimi bautizarinchij. Yaya Diosman mingarinaca mana shuj pugllaillachu can. Chaimantami ñucanchij ari nishcata pajtachingapaj esforzarina canchij. Jehová Diosca chaita rurachunmi munan (Eclesiastés 5:4). w24.03 págs. 2-4 párrs. 2, 5

Bibliapi nishca shinaca tucui cazarashcacunami ‘causaipica llaquicunata charingacuna’ (1 Corintios 7:28). Cusapish, huarmipish juchayujcuna cashcamantami matrimonio ucupica problemacuna, llaquicuna tiyai tucun. Shinallataj cusapish, huarmipish chꞌican chꞌican yuyaicunata, munaicunata, culturacunata charishcamantami huaquinpica pꞌiñanacuicuna tiyai tucun. Ashtahuanpish noviocuna cashpaca cada uno ima laya cashcataca manachari tucuita alli yacharcacuna. Chaimantami cazarashca qꞌuipaca llaquicunata chari tucuncuna. Shinallataj huaquincunaca pandarishcacunata reconocinapaj randica caishuj chaishuj juchachinacushpami llaquicunataca mana allichinata munancuna. Ashtahuancarin chꞌicanyarinata, divorciarinatami yuyai callarincuna. ¿Pero chai decisionta japinaca allichu canga? Mana. Jehová Diosca cazadocuna paicunapura respetohuan tratarichunmi munan. w24.03 págs. 16, 17 párrs. 8, 11

Ña bautizarishca cashpapish Jehová Diosmanta ashtahuan yachashpa catishcamantami cai Allpa paraíso tucujpi huiñai huiñaita cushilla causai tucushcata ashtahuan seguro cangui (Hebreos 5:13–6:1). Romanos 5:2 al 4-pi nishca shinaca llaquicunata ahuantashcamantami Diospaj ñaupajpi alli ricuringui. Shinallataj Diospaj shunguta cushichishcamantami paipaj nishcacuna shamuj punllacunapi pajtarinataj cashcata ashtahuan seguro cangui. Chai esperanzata charishcamantami cunanca alli yuyashpa imatapish decidingui, cambaj tiempotapishmi alli utilizangui, cambaj familiatapish alli tratangapajmi esforzaringui. Apóstol Pabloca ‘Diospaj ñaupajpi alli nishca cashcamantami shuyashpa catishun’ nishca qꞌuipaca shujtaj sumaj yuyaitami yachachirca. Paica ñucanchij shuyacushca pajtarinataj cashcata seguros cai tucushcatami yachachirca (Romanos 15:13). w23.12 págs. 12, 13 párrs. 16-19

Tucuicunami imatapish alli yuyashpa rurangapaj esforzarinchij. Pero jatun llaquicunahuan chꞌimbapuracushpaca imatapish alli yuyashpa ruranaca sinchimi canga. Tal vez mama cucha yacucuna barcota caiman chaiman cuyuchicuj shinami sintirishun. ¿Ñucanchijpish chashna sintirijpica tranquilo sintirichunca Yayitu Diosca ima shinataj ayudan? Paica ama yallitaj sustarichunmi ayudasha nin. Mama cuchapi jatun tamya acapana jatarijpica barcoca caiman chaimanmi cuyuri tucun. Shinapish achca barcocunaca jatun acapanacuna caiman chaiman cuyuchisha nijpipish ama yallitaj cuyuringapajmi rurashca can. Chai barcocuna chashna rurashca cashcamantami barcopi cajcunaca tranquilo viajai tucuncuna. Pero chai barcocunaca ama caiman chaiman yallitaj cuyuringapajca mama cuchapi shayarishpa saquirinapaj randica ñaupajmanmi catina can. Caimantaca ¿imatataj yachanchij? Llaqui punllacunapi Jehová Dios sumaj causaita cuchun munashpaca paitami sirvishpa catina canchij. w24.01 pág. 22 párrs. 7, 8

Manchaita charishpaca “¿Jehová Diosca ñaupa punllacunapica imallatataj rurashca?” nishpa yuyai. Por ejemplo, Jehová Dios imalla rurashcacunapimi yuyai tucungui. Paica pajaritocuna, sisacuna paiman rijchaj mana rurashca cajpipish, paita mana adorai tucujpipish allimi cuidan. Chaicunapi yuyashpami Jehová Dios canta ayudai tucushcata seguro cangui (Mateo 6:​25-32). Shinallataj Jehová Dios paita sirvijcunata ima shina ayudashcatami yuyai tucungui. Ñaupa punllacunapi o cunan punllacunapi Jehová Dios paita sirvijcunata ima shina ayudashcatapishmi yuyai tucungui. Chaitaca Bibliapi o ñucanchij publicacioncunapimi ricui tucungui. Ashtahuanpish Jehová Dios canta ima shina ayudashcata yuyai. Por ejemplo, ¿Jehová Diosca paita rijsichunca cantaca ima shinataj ayudarca? (Juan 6:44). ¿Cambaj mañashcacunataca ima shinataj cutichishca? (1 Juan 5:14). ¿Paipaj Churita cushcamanta canca cada punlla ima shinataj beneficiarishcangui? (Efesios 1:7; Hebreos 4:​14-16). w24.01 págs. 4, 7 párrs. 6, 17