¿Diosca cambaj shungupi ima tiyashcataca yachanchu?

¿DIOSCA ÑUCANCHIJTACA IMA LAYATAJ RURARCA?

Gemelos huacharishca gentecunaca ishquindijmi alli apanacuncuna. Paicunaca ¿imamantataj shina apanacuncuna? Gemelocunata estudiaj doctora Nancy Segalca paipaj ñañahuanca gemelacunami can. Paica: “Gemelocunaca sumajtami alli apanacuncuna” ninmi. Shuj huarmipish, “ñuca ñañahuanca gemelacunami canchij. Chaimantami alli rijsinacunchij” ninmi.

Gemelocunaca chai huasillapitaj huiñashca cashcamantami alli apanacuncuna. Paicunapaj ADNa nishcaca ishquindijpajmi igual can. Chaimantami paicunaca igual yuyancuna, imatapish igual ruranata munancuna.

CAIPI YUYAI: Yaya Diosmi gentecunataca ADN nishcahuan rurarca. Chaimantami paica ñucanchij ima shina cashcata alli rijsin. Rey Davidca: “Mamapaj huijsapi pacallapi huiñacushpapish quiquinpica ñuca cuerpoca mana pacallachu carca. Allpa ucujman shina pacalla huiñacushpapish quiquinpica mana pacallachu cashcani. Mamapaj huijsapi tiyarishca pachamanta ñuca cuerpopi imalla tiyaj tucui ajushtaricujtami ricucurcangui. Chaicunataca ñuca manaraj tiyajpimi libropi quillcashcata ña charicurcangui” nircami (Salmo 139:13, 15, 16). Diosca ñucanchij ñahuillataca mana ricunchu. Paica ñucanchij shunguta, ñutcutami alli rijsin. Chaimantami ñucanchij ima shina sintirishcataca alli intindin.

BIBLIAPICA DIOSMANTACA ¿IMATATAJ YACHACHIN?

Rey David Diosta mañashpaca: “Mandaj Dios, ñucata allimi callarishpa ricungui. Allimi rijsingui. Ñuca tiyarijtapish, jatarijtapishmi ricucungui. Ñuca imallata yuyacujtaca carumantami yachangui” nircami (Salmo 139:1, 2, 4). Yaya Diosca ñucanchij shungupi imalla tiyashcataca allimi rijsin. Shinallataj ñucanchij imata ruragrishcatapish, munashcatapish paica allimi yachan (1 Crónicas 28:9; 1 Samuel 16:6, 7).

Diosta mañacushpaca ñucanchij ima shina sintirishcata ninaca a vecesca sinchimi can. Pero Yaya Diosca ñucanchij imata yuyacujta, ima shina sintiricushcataca allimi intindin. Paica ñucanchijcuna ima munaihuan imatapish ruracujtaca ricucunmi. Shinallataj Diosca ñucanchijcuna alli munaihuan imatapish rurasha nishcataca allimi yachan. Ashtahuancarin pai shinallataj cꞌuyaj cachunmi ñucanchijtaca rurarca (1 Juan 4:7-10).

Bibliapica cashnami nin:

• “Jatun Diosca cashcata rurajcunataca ricuracunmi. Paipaj rinrinpish, paicuna mañashcacunataca uyaracunmi” (1 PEDRO 3:12).

• Diosca: ‘Can mai ñancunallata purinataca ñucami intindichisha, ñucami yachachisha. Ñuca ñahuitaca canmanta manataj anchuchishachu’ ninmi (SALMO 32:8).

DIOSCA ÑUCANCHIJTACA ALLIMI INTINDIN

Llaquicunahuan cajpi Dios ñucanchijmanta sustarij cashcata yachashpaca ¿ima shinataj sintirinchij? Nigeria llajtapi causaj Anna shuti huarmimanta parlashun. Paica: “Achca llaqui atraso causacushcamantami causashpa catinataca mana munarcani. Puntapica ñuca cusami huañurca. Cutin qꞌuipataca ñuca chuchupi cáncer japishcatami doctorcunaca huillarca. Chaimantami achca tratamientocunata hospitalpi rurarcacuna. Ñuca hospitalpi cai horasllatajmi ñuca ushushipish hospitalpi carca. Paipaj umapica yacu junda cashcatami doctorcunaca huillarca. Chai ungüitaca hidrocefalia nishpami rijsincuna” ninmi.

Anna huarmi cashna llaquicunata ahuantangapajca ¿imatataj rurarca? Paica: “Filipenses 4:6, 7-pica, ‘tucui poderta charij Diospaj fuerzami cancunapaj shungutaca huaquichinga’ ninmi. Llaquihuan cashpaca cai versotami yuyarij carcani. Chashnami Yaya Diospaj cꞌuchullapi cashcata sintircani. Shinallataj Jehová Dios ñuca llaquicunata ricuj cashcatami intindircani. Achca turi ñañacunami ñucataca animarcacuna” ninmi.

Annaca: “Cunancamami asha ungüihuan causacuni. Pero cashna problemacunahuan cashpapish Jehová Dios ñuca ladopi cashcamantami cushilla sintirini. Santiago 5:11-ta yuyarishpami animota japircani. Chaipica: ‘Ñucanchijca llaquita apajcunataca, cushichishcacunami ninchijmi. Job llaquita apashcataca uyashcanguichijmi. Llaquita apashca qꞌuipa, Jatun Dios imata cushcatapish ricushcanguichijmi. Jatun Diosca yallitaj llaquij, mana pꞌiñarijmi’ ninmi” nishpami Annaca parlarca. Yaya Diosca Jobpaj problemacunataca allimi intindirca. Shinallatajmi cambaj problemacunatapish paica alli intindin.