¿Maipitaj verdadta huillacun?

Achca huatacuna huashamanca millai ungüicuna ima shina mirarishcataca mana pi yacharcachu. Chaimantami achca gentecunaca huañushcacuna. Pero tiempohuanca cientificocunami ungüicuna ima shina mirarishcata alli yacharcacuna. Paicunaca bacteriacunamanta, viruscunamantami achca ungüicuna tiyan nircacunami. Chaita yachashpami ñucanchijpish ama ungüi japichun ima shina cuidarinata, ungushca cashpapish ima shina jambirinata ricushcanchij. Chashnami mana tanto ungurishpa ashtahuan causashcanchij.

Shujtaj tapuicunatapish yachanatami minishtinchij. Por ejemplo:

• ¿Diosca pitaj can?

• ¿Jesusca pitaj can?

• ¿Diospaj gobiernoca imataj can?

• ¿Shamuj punllacunapica ima shinataj causashun?

Cai tapuicunamanta verdadta yachashpami achca gentecunaca paicunapaj causaita cambiashpa alli causancuna. Canpish cai tapuicunamanta yachashpaca allimi causangui.

¿VERDADTA YACHANACA SINCHICHU CAN?

Cunan punllacunapica ima cierto cashcata, ima llulla cashcata yachanaca asha sinchimi ricurin. ¿Imamantataj sinchi ricurin?

Gobiernocuna, empresacuna, noticiata huillajcunaca mana tucuita verdadta nincunachu. Maipica mana alli yachashpapish paicunapaj yuyaillamantami imatapish nincuna. Hasta llullancunami. Chaimantami achca gentecunaca paicunapi ña mana confiancuna.

Chashna gentecuna tiyajpipish importante tapuicunamanta yachanaca mana sinchichu can. ¿Imamantataj mana sinchi can? Caita intindingapajca cada punlla imata rurajcuna cashcapi yuyashun.

¿VERDADTACA IMA SHINATAJ YACHAI TUCUNGUI?

Tucui punllacunami imatapish aseguranchij. Por ejemplo, Jessica huarmica manihuan chagrushca micunataca mana randinchu. Paica: “Ñuca ushushica manitaca mana micui tucunchu. Pꞌichillata micushpapish huañuimanmi chayai tucun. Chaimantami micunata manaraj randishpa imallahuan rurashca cashcata liyiniraj. Qꞌuipaca pꞌichillatapish manita mana churaj cashcata yachangapajmi chai micunacunata ruraj empresacunata tapuni. Shinallataj chai empresacuna alli micunacunata rurajcuna cashcata yachangapajmi internetpi verdadta huillaj paginacunata mashcani” ninmi.

Canca importante tapuicunata yachangapajca manachari Jessica laya ruranata minishtingui. Pero pai shinallatajmi rurai tucungui. Por ejemplo:

• Imalla huillacushcata liyi.

• Ashtahuan yachai.

• Maipi verdadta huillacushcata ricui.

Caita rurashpami valishca tapuicunamanta yachai tucungui. Ricushun.

SHUJ LIBROLLAMI VERDADTA HUILLAN

Jessica huarmica paipaj huahuapaj micunata randingapajca allimi ricuraj carca. Bibliamanta verdadta yachangapajpish chashnallatajmi rurarca. Paica: “Alli liyishpa, alli investigashpami Bibliamanta verdadta yachashcani” ninmi. Achca gentecunaca Jessica layallatajmi rurashcacuna. Chaimi cai tapuicunamanta alli yachashcacuna:

• ¿Imapajtaj causanchij?

• ¿Huañushpaca imataj tucunchij?

• ¿Imamantataj llaquicuna tiyan?

• ¿Diosca ima shinataj llaquicunata tucuchinga?

• ¿Familiahuan cushilla causangapajca imatataj rurana canchij?

Canpish cai tapuicunamanta, shujtaj tapuicunamanta verdadta yachasha nishpaca Bibliatami liyina cangui. Cutin ashtahuan yachasha nishpaca jw.org paginapimi mashcana cangui.