Maltratashca huarmicunataca Diosmi ayudasha nin
“Cai muyundij Allpapica huaranga huaranga huarmicunatami jatun cajpipish, uchilla cajpipish maltratashcacuna, llaquichishcacuna. ¿Cantapishchu chashna llaquichishcacuna? Caipimi Jehová Dios cantapish, tucui huarmicunatapish ayudasha nishcata, canta llaquichijcunatapish imata rurana cashcata yachangui”.
JW.ORG paginapica: “Seguridad para la mujer: ¿Qué dice la Biblia?” nishca yachaica cai jahuapi tiyaj shimicunahuanmi callarin. Cai yachaipaj tucuri partepica cai yachaita descarganpajmi shuj enlace tiyan. Descargashca huashaca imprimishpami chai pꞌangataca chaupipi doblana cangui. Estados Unidos llajtamanta pani Stacyca: “Ñucanchij congregacionpaj cꞌuchullapica centro de acogida de mujeres nishca huasimi tiyan. Chaipi causaj maltratashca huarmicunaman cungapajmi chai yachaipaj achca pꞌangacunata imprimircani. Cai pꞌangacunata saquingapajca shuj panihuanmi rircani” ninmi.
Chai huasipi trabajaj shuj huarmica ashtahuan folletocunatami mañarca. Chaimi 40 folletocunata, 30 jw.org tarjetacunata chasquishpaca chai huasipi causaj huarmicunaman curca. Chai huasipi imalla minishtirishcata ricuraj huarmipishmi chaipi causaj huarmicuna Bibliata yachai callarichun munarca. Chaimantami paica Testigocuna Bibliata ima shina yachachij cashcata ricuchichun chai panicunata mañarca.
Pani Stacyca ishqui panicunahuanmi shujtaj centro de acogida de mujeres nishca huasimanpish rircacuna. Chaipica chai panicunataca allimi chasquircacuna. Cinco folletocunatapish chasquishpami ashtahuan folletocunata apamuchun mañarcacuna. Chai huasipi trabajaj shuj huarmica: “Cai folletopi tiyaj yachaicunami caipi causaj huarmicunataca achcata ayudanga” nircami. Chaimi chai panicunaca Bibliamanta ima shina yachachijcuna cashcata ricuchingapaj cutin tigrarcacuna. Huaquin huarmicunami paicunata uyangapaj tandanacurcacuna. Ishqui huarmicunacarin fin de semanapi tiyaj tandanacuimanmi risha nircacuna.
Pani Stacyca: “‘Seguridad para la mujer: ¿Qué dice la Biblia?’ nishca folletota imprimishpa maltratashca huarmicunata caihuan yachachinaca sumajmi cashca. Cai maltratashca huarmicuna Dios cushichichun, ayudachunpish minishtishcatami ricushcanchij. Chaimi cai huasicunapi huillanaman ringapaj esforzarishcanchij. Cai huarmicunaman Diospaj Gobiernomanta yachachichun Jehová Dios ima shina ayudagrishcatami ricushun ninchij” ninmi.