Diosmi tandalla cachun ayudan

APÓSTOL Pabloca Efesopi caj huauqui panicunataca: “Cꞌuyaihuan caishuj chaishuj ahuantanacuichij. Cancunataca espíritu santomi shuj shinallata rurarca. Chaimanta caishujhuan chaishujhuan tandalla cangapaj, sumajta causangapaj esforzarichij” nircami (Efesios: 4:2, 3).

Apóstol Pabloca: “Cancunataca espíritu santomi shuj shinallata rurarca” nishpaca ¿imatataj nisha nirca? Jehová Dios paita sirvijcuna tandalla cachun ayudaj cashcatami yachachisha nirca. Yayitu Dios paipaj espíritu santota cushpa ayudashcamantami Diosta sirvijcunaca tandalla cai tucunchij. Shinapish apóstol Pablo nishca shinaca cada unomi tandalla catingapaj esforzarina canchij.

Caipi yuyashun. Canman shuj mushuj carrota pi convidajpica alli cuidangapajmi esforzaringuiman. Shinapish mana alli cuidashcamanta carro dañarijpica convidajtaca mana juchachinguimanchu.

Chai shinallatajmi Jehová Diospish shuj regalota cuj shina paipaj espíritu santota ñucanchijman cushca. Chaimantami tandalla cai tucunchij. Shinapish ¿shuj huauquihuan o shuj panihuan mana alli apanacushpaca imatataj rurana canchij? Convidashca carrota alli cuidaj shinallatajmi paicunahuan alli apanacungapaj, tandalla catingapajpish cada uno esforzarina canchij.

TANDALLA CANGAPAJ SHUNGUMANTA ESFORZARISHUNCHIJ

Apóstol Pablo nishca shinaca huauqui panicunahuan tandalla catingapajca sinchitami esforzarina canchij. ¿Shinapish shuj huauqui o pani ñucanchijta llaquichijpica imatataj rurana canchij? ¿Paihuan alli tucungapajchu parlanacuna canchij? Mana, maipica paihuan parlanacunapaj randica llaquichishcata cungarishpami perdonanalla canchij. Chashnami paihuan alli apanacushpa catishun (Proverbios 19:11; Marcos 11:25).

Fotocuna: Shuj huauquica perdonanatami munan. 1. Pero caishuj huauquica pꞌiñarishpami caparicun. 2. Caishuj huauqui imata rurashcapi yuyai. 3. Bibliata liyishpa imata liyishcapi yuyai. — ‘¿Shuj huauquihuan shuj pꞌiñanacui tiyajpica chaimanta ashtahuan problemata jatarichishpaca paihuan tandallachu purisha o ashtahuan problematachu jatarichisha?’ nishpa tapuri

Apóstol Pabloca: “Cꞌuyaihuan caishuj chaishuj ahuantanacuichij” nishpami consejarca (Efesios 4:2). Caita nishpaca ñucanchijpish, ñucanchij huauqui panicunapish juchayujcuna cashcata yuyarishpa, caishuj chaishuj ahuantanacushpa catina cashcatami nisha nirca. Juchayujcuna cashcata intindishpa, Diosta alli sirvingapaj tucuicuna esforzaricujta ricushpami caishuj chaishuj perdonanacunaca ashtahuan jahualla canga (Efesios 4:23, 24; Romanos 3:23). Chashnami tucuicuna tandalla causashun.

Efesios 4:3-pica: “Tandalla cangapaj, sumajta causangapaj esforzarichij” ninmi. Cai shimicunami griego rimaipica angu mucucuna, tullucunata tandachij cashcata yuyachin (Colosenses 2:19). Chai shinallatajmi ñucanchijpish tandalla catingapaj esforzarina cashcata nisha nin. Chaimantami maijan huauqui o pani ñucanchijta llaquichijpipish shungumanta perdonangapaj esforzarishpa catina canchij.

Llaquichij huauquipaj o panipaj mana allicunallataca mana ricunachu canchij. Ashtahuanpish tucuicuna juchayujcuna cashcatami yuyarina canchij. Caita alli yuyarishpaca caishujmanta chaishujmanta tandalla catingapaj, cꞌuyaita ricuchinacungapajpishmi esforzarishun (Colosenses 3:12).