Canca yallitaj valishcami cangui

1, 2. ¿Jehová Diospaj ñaupajpi achca valishca cashcata tucui shunguhuan cringapajca imatataj rurana canchij?

JEHOVÁ DIOSCA paita tucui sirvijcunatami achcata cꞌuyan. Chashna achcata cꞌuyajpipish huaquincunaca paicunata pꞌiñashcamantami imapaj mana valishca cashca shina sintirincuna. ¿Canpish chashnachu sintirishcangui? ¿Jehová Diospaj ñaupajpi valishca cashcata yachangapajca imatataj rurai tucungui?

² Jehová Diosca caishuj chaishujpura cꞌuyanacuchunmi munan. Chaimantami Diosta sirvijcunamanta yachanaca alli can. Por ejemplo, Jesusca gentecunataca cꞌuyaihuan, respetohuanmi tratarca. Chashna tratashpami paipajpish, paipaj Yaya Jehová Diospajpish humilde gentecuna achca valishca cashcata ricuchirca (Juan 5:19; Hebreos 1:3). Pero ¿gentecuna Jehová Diospaj ñaupajpi achca valishca cashcataca Jesusca ima shinataj ricuchirca? ¿Canpish Jehová Diospaj ñaupajpi achca valishca cashcata tucui shunguhuan cringapajca imatataj rurai tucungui? Chai tapuicunamantami cunanca yachashun (Ageo 2:7).

GENTECUNA ACHCA VALISHCA CASHCATAMI JESUSCA RICUCHIRCA

3. ¿Jesusca Galileapi causaj gentecuna paipajman cꞌuchuyajpica ima shinataj ayudarca?

³ Religionta pushajcunaca gentecunataca imapaj mana valishca cashcata shinami ricujcuna carca. Chaimantami mana intindij gentecunataca Diosca millanayachinmi nijcuna carca (Juan 7:​47-49). Pero Jesusca mana chashnachu ricuj carca. Shuj cutinca Jesusca Galileapimi predicacurca. Chaimi gentecunaca yachachichun, jambichun paipajman cꞌuchuyarcacuna. Chashna cꞌuchuyajpimi Jesusca paicuna “michij illajlla, shitashca cashcata llaquichishca ovejacuna shina” cashcata ricurca. Chaita ricushpami Jesusca paicunamanta llaquirishpa Diospaj Shimita yachachirca, ungushcacunatapish jambirca. Chashnami Jesusca gentecuna achca valishca cashcata ricuchirca (Mateo 9:​35, 36). Shinallataj Jesusca ashtahuan gentecunata ayudashpa catingapajca paipaj apostolcunataca Diosmanta yachachichun, tucui laya ungüicunata charij gentecuna jambichunmi mandarca (Mateo 10:​5-8).

4. ¿Jesús humilde gentecunata cꞌuyaihuan tratashcamantaca imatataj yachanchij?

⁴ Pꞌiñashca gentecunataca Jesusca cꞌuyaihuan, respetohuanmi tratarca. Chashnami paipajpish, paipaj Yayapajpish gentecuna achca valishca cashcata ricuchirca. Canca Jehová Diostachari sirvicungui. Chashna jahuapish maipica imapaj mana valishca shinachari sintiringui. Chashna sintirishpaca paimanta yachanata munaj humilde gentecunata Jesús cꞌuyaihuan tratashcata yuyari. Chashnami Jehová Diospaj ñaupajpi achca valishca cashcata cuentata cungui.

5. ¿Jesús rijsishca huarmica ima ungüitataj charirca?

⁵ Jesusca mana yachachishpalla purircachu. Ashtahuanpish gentecunataca ayudarcami. Por ejemplo, Jesús Galileapi predicacushpaca shuj ungushca huarmihuanmi tuparca. Chai huarmica 12 huatacunatami yahuar cachariricuj ungüita charirca (Marcos 5:25). Chai huarmica chai ungüita charishcamantami Leypi nishca shinaca mapa carca. Chaimantami pi paita tuparishpaca mapa saquiri tucurca. Chaimi paica ni pihuan mana pasai tucushcanga. Sinagogapipish, fiestacunapipish mana shujtaj gentecunahuan tandalla Jehová Diosta adorai pudishcangachu (Levítico 15:​19, 25). Chai huarmica mana ungushcallachu carca. Ashtahuanpish paita pi mana cꞌuyashcatami yuyashcanga. Chaimi imapaj mana valishca shina sintirishcanga (Marcos 5:26).

6. ¿Yahuar cachariricun huarmica ima shinataj alliyarca?

⁶ Chai humilde huarmica Jesús jambichunmi munarca. Pero paipajman cꞌuchuyashpa ñucata jambihuai nishpaca mana mañarcachu. ¿Ima nishpataj mana mañarca? Paica chai ungüita charishcamantami achca pingaihuan carca. Shinallataj chai ungüihuan mapa cashca jahua gentecunapurapi yaicushcamanta Jesús rimanatami mancharca. Chaimantami Jesuspaj churanallapi tuparirca. Paica Jesuspaj churanapi tuparishpalla jambirinatami tucui shunguhuan crirca (Marcos 5:​27, 28). Tucui shunguhuan crishcamantami chai rato alliyarca. Chaimi Jesusca: “¿Pitaj ñuca churanapi tuparirca?” nishpa tapurca. Chaita uyashpami chai huarmica manchaihuan tucuita huillarca. ¿Chaita ricushpaca Jesusca imatashi nishcanga?

7. ¿Jesusca ungushca huarmitaca ima shinataj tratarca? (Marcos 5:34).

⁷ Jesusca chai huarmi manchaihuan chujchucujtami ricurca. Chaimantami cꞌuyaihuan, respetohuan: “Huahua, canca feta charishcamantami alliyashcangui” nirca (Marcos 5:33; Marcos 5:​34-ta liyipai). Jesús shuj huarmita “huahua” nishcaca Bibliapica shuj cutinllami ricurin. Chai huarmi achca manchaita charishcata ricushpami chashna nishcanga. Caipi yuyashun, ¿Jesús paipaj churanapi tuparishcamanta, achca gentecunapurapi cashcamanta animalta colerashpa sinchita rimashca cajpica chai huarmica ima shinashi sintirinman carca? Chai ungüimanta alliyashca cashpapish shungu ucupica demastijmi culpayuj sintirinman carca. Pero Jesús mana chashna tratashcataca yachanchijmi. Ashtahuanpish chai huarmita Jehová Dios achcata cꞌuyashcatami Jesusca ricuchirca.

8. ¿Brasilmanta shuj panica ima llaquicunatataj charirca?

⁸ Cunan punllacunapipish Diosta sirvijcunamanta huaquincunaca ungüicunatami charincuna. Chaimantami paicunaca llaquilla, imapaj mana valishca shina sintirincuna. Brasil llajtamanta Renatapaja ejemplomanta yachashun. Paica precursora regularmi can. Paica ishqui changacuna illaj, lluqui maqui illajmi huacharirca. Renataca: “Ñuca escuelapi cajpica tucui tiempomi ñucamantaca burlarijcuna carca. Fiero apodocunatapishmi churajcuna carca. Ñuca familiapish maipica ñuca imapaj mana valishca cashcata shinami sintichirca” nircami.

9. ¿Jehová Diospaj achca valishca cashcataca ima shinataj cuentata curca?

⁹ Renataca testigo de Jehovami tucurca. Chaimi congregacionmanta huauqui panicunaca paitaca cꞌuyaihuan animarcacuna. Jehová Dios paita ima shina ricushcata paipish chashnallataj ricuchunmi ayudarcacuna. Chaimantami Renataca Jehová Diospaj ñaupajpi achca valishca cashcata intindirca. Paica: “Ñucataca achca huauqui panicunami ayudarcacuna. Paicunapaj shuticunata shuj listata rurashpa escribishpaca mana nunca tucuchinimanchu. Cꞌuyaj familiata ñucaman cushcamantami Jehová Diostaca tucui shunguhuan diosolopagui nini” nircami.

10. ¿María Magdalenaca ima llaquitataj charirca? (Fotocunamantapish parlapai).

¹⁰ Cunanca María Magdalenata Jesús ima shina ayudashcata ricushun. Chai huarmipica siete demoniocunami yaicushca carca (Lucas 8:2). Chaimantami paica loca tucurca. Chaimi gentecuna paimanta caruyajcuna carca. Chai llaquita charishcamantami paica achca manchaita charishcanga. Pi paita mana cꞌuyashcata, pi mana ayudasha nishcatapishmi yuyashcanga. Pero Jesusca paimantami demoniocunata llujchirca. Chaimi María Magdalenaca paipaj discípula tucurca. Chashna ayudashpami Jesusca Jehová Diospaj ñaupajpi achca valishca cashcata ricuchirca.

11. ¿Jesusca María Magdalenataca ima invitacionatataj rurarca? (Fotomantapish parlapai).

¹¹ ¿Jesusca ima shinallataj María Magdalenamanca Jehová Dios paita cꞌuyashcata ricuchirca?b Jesusca paitapish, paita catijcunatapish predicacionpi compañachunmi María Magdalenata invitarca. Chaimantami paica Jesús gentecunaman imallata yachachishcata uyashcanga. Shinallataj Jesusca pai causarishca punllaca paiman ricurishpami paihuan parlanacurca. Apostolcunaman pai causarishcata huillachunpishmi cacharca. Chashnami María Magdalenamanca Jehová Dios paita achcata cꞌuyashcata Jesusca ricuchirca (Juan 20:​11-18).

12. ¿Imamantataj Lidiaca shujtajcuna paita mana cꞌuyashcata yuyaj carca?

¹² María Magdalena shinami cunan punllacunapipish achca gentecunaca paicunata pi mana cꞌuyashcata yuyancuna. Españapi causaj Lidia shuti panimanta yachashun. Paipaj mamaca paita shullunatami yuyashca carca. Chaita mana rurashpapish Lidiataca uchillamantapachami paipaj mamaca mana cꞌuyashcata ricuchirca. Llaquichij shimicunatapishmi nij carca. Lidiaca: “Ñucaca gentecuna ñucata cꞌuyachun, ñuca amigacuna tucuchunmi munarcani. Shinapish ñuca mama ñucata mana alli trataj cashcamantami millai persona cashcata yuyarcani. Chaimantami ‘gentecunaca ñucataca mana nunca cꞌuyangachu’ nishpa manchaj carcani” ninmi.

13. ¿Lidiaca Yaya Jehová Diospaj ñaupajpi achca valishca cashcataca ima shinataj cuentata curca?

¹³ Lidiaca Bibliatami estudiai callarirca. Chaimantami paica Jehová Diosta mañaj carca, Bibliatapish liyij carca. Hermanocunapish paimanca cꞌuyaitami ricuchircacuna. Sumaj shimicunahuanmi animajcuna carca. Chaimi paica Jehová Diospaj ñaupajpi achca valishca cashcata cuentata curca. Pani Lidiaca: “Ñuca cusaca ‘cantaca achcatami cꞌuyani’ ninmi. Cutin, cutinmi ‘canca shuj alli personami cangui’ nishpa yuyachin. Shujtajcunapish chaillatataj rurashpami ñucataca animancuna” ninmi. Lidia shinami huaquin huauqui panicunaca maipica imapaj mana valishca shina sintirincuna. Paicuna Jehová Diospaj ñaupajpi achca valishca cashcata cuentata cuchunca ñucanchij ruraicunahuan, rimaicunahuanmi cꞌuyaita ricuchi tucunchij.

JEHOVÁ DIOSPAJ ACHCA VALISHCA CASHCATA CRINGAPAJCA CAITA RURAI

14. ¿1 Samuel 16:​7-pica Jehová Diosmantaca imatataj yachachin? (“¿Imamantataj Jehová Diosca paita sirvijcunataca achcata valoran?” nishca recuadrotapish ricui).

¹⁴ Gentecuna ricushca shina Jehová Dios mana ricuj cashcata yuyari (1 Samuel 16:​7-ta liyipai). Cai pachapi causaj gentecunaca achca cullquita charijcunallata, estudiashca gentecunallata, sumaj ñahuita charijcunallatami valishca cashcata shina ricuncuna (Isaías 55:​8, 9). Chaimanta paicuna shinaca ama yuyaichu. Ashtahuanpish Jehová Dios yuyashca shina yuyai. ¿Jehová Dios shina yuyangapaj imatataj rurana cangui? Eliaspaj, Noemipaj, Anapaj causaimanta yachai. Paicunaca maipica imapaj mana valishca shinami sintirircacuna. Paicunamanta yachacushpaca Yaya Dios cꞌuyaita ima shina paicunaman ricuchishcapi yuyai. Shinallataj cambaj causaipi Jehová Dios ima shina cꞌuyaita ricuchishcapi yuyai. Qꞌuipaca chaicunata ama cungaringapaj shuj cuadernopi escribi. O imapaj mana valishca shina sintirishpaca chai yuyaimantami ñucanchij publicacioncunapi mashcai tucungui.c

15. ¿Imamantataj Jehová Diosca Danielta “canca yallitaj valishcami cangui” nirca? (Daniel 9:23).

¹⁵ Jehová Dios paita tucui shunguhuan sirvijcunata achcata valoraj cashcataca ama cungarichu. Profeta Danielca ñami 100 huatacunata charirca. Shuj cutinca paica achca desanimado shaicushcami sintirirca (Daniel 9:​20, 21). ¿Paita animangapajca Jehová Diosca imatataj rurarca? Ángel Gabrieltami paipaj mañashcacuna uyashca cashcata huillachun cacharca. Ángel Gabrielca paitaca: “Canca yallitaj valishcami cangui” nircami (Daniel 9:​23-ta liyipai). ¿Imamantataj Jehová Diosca Danielta achcata cꞌuyarca? Danielca tucui shunguhuanmi Jehová Diosta sirvirca. Siempremi allicunata rurashpa causarca. Chaimantami Jehová Diosca paita cꞌuyaj carca (Ezequiel 14:14). Yaya Jehová Diosca ñucanchijta animangapaj, cushichingapajmi Danielpaj causaimanta Bibliapica quillcachirca (Romanos 15:4). Danielta uyashca shinami cambaj mañashcacunatapish Jehová Diosca uyan. Shinallataj can allicunata ruranata munashcamanta, paita tucui shunguhuan sirvicushcamantami cantaca achcata valoran (Miqueas 6:8; Hebreos 6:10).

16. ¿Jehová Diostaca cambaj cꞌuyaj Yaya cashcata shina ricungapajca imatataj rurana cangui?

¹⁶ Jehová Dios cꞌuyaj Yaya cashca shinata ricui. Paica canpica ima pandarishcallataca mana ricucunchu. Ashtahuanpish canta cꞌuyashcamantami ayudata munan (Salmo 130:3; Mateo 7:11; Lucas 12:​6, 7). Jehová Dios cꞌuyaj cashcapi yuyashpami achca gentecunaca imapaj mana valishca shina sintirishpapish qꞌuipaca alli sintirishcacuna. Españamanta pani Michellepaj ejemplomanta yachashun. Achca huatacunatami paipaj cusaca llaquichij shimicunahuan paita rimaj carca. Chaimantami Michelleca pi paita mana cꞌuyashcata, imapaj mana valishca cashcata sintirca. Paica: “Casi siempremi ñuca umamanca imapaj mana valishca yuyaicuna shamun. Chashna yuyaicuna shamujpimi Jehová Dios paipaj rigrapi cꞌuyaihuan ñucata apacushcata, ñucata cuidacushcata yuyangapaj esforzarini” ninmi (Salmo 28:9). Cutin Sudafricamanta pani Lauraca: “Jehová Diosca ñucataca cꞌuyaihuanmi paipaj puebloman pushamushca. Cai tucui huatacunatami paipaj cꞌuchullapi cachun ñucataca ayudashca. Shujtajcunaman paipaj Shimimanta yachachina bendiciontapishmi cushca. Chaimantami ñucaca achca valishca shina sintirini” ninmi (Oseas 11:4).

17. ¿Jehová Dios cambaj alli ruraicunamanta cushilla sintirishcataca ima shinataj yachai tucungui? (Salmo 5:12; fotomantapish parlapai).

¹⁷ Can allita ruracushcamanta Jehová Dios cushilla sintirishcata tucui shunguhuan cri (Salmo 5:​12-ta liyipai). Rey Davidca: “Mandaj Dioslla muyujta escudohuan pacaj shinami cꞌuyaihuan muyuchingui” nircami. ¿Cai shimicunaca imatataj nisha nin? Ima hora can imapaj mana valishca shinata sintirishpaca Jehová Diosca cambaj alli ruraicunamanta cushicushcata, canta cꞌuyashcatami yuyarina cangui. Chashna yuyarishpami imapaj mana valishca yuyaicuna canta mishachunca mana saquingui. ¿Jehová Dios canhuan cushilla cashcataca ima shinataj yachai tucungui? Bibliapimi Yaya Dios ñucanchijtaca achcata cꞌuyashcata, ñucanchijmanta preocuparishcata huillacun. Shinallataj ancianocunaman, amigocunaman, huauqui panicunamanmi can achca valishca cashcata nichun yuyaita cun. Chashnami Yaya Diosca canhuan cushilla cashcata ricuchin. Shinapish ¿shujtajcuna canta sumaj shimicunahuan animachijpica imatataj rurai tucungui?

18. ¿Shujtajcunapaj animachij shimicunataca imamantataj chasquina cangui?

¹⁸ Shujtajcuna canmanta ima allicunata nijpica “paicunaca pandaricunmi” nishpaca ama yuyaichu. Ashtahuanpish Jehová Dios canta cꞌuyashcata ricuchingapaj paicunaman chai yuyaita cucushcata yuyaipi chari. Párrafo 16-pi parlashca pani Michelleca: “Shujtajcuna ñucamanta ima allicunata nishpa animachijpi Jehová Dios chaita crichunmi munan. Chaimantami mana fácil cajpipish shujtajcuna ima nishcata cringapaj esforzarini” ninmi. Ancianocunapish Jehová Dios paita achcata cꞌuyashcata crichunmi ayudashcacuna. Chaimantami cunanca paica precursora can. Betelpipish huaquin punllacunatami ayudan.

19. ¿Imatataj mana nunca cungarina cangui?

¹⁹ Jesusca cꞌuyaihuanmi ñucanchijcuna Jehová Diospaj achca valishca cashcata yachachirca (Lucas 12:24). Chaimantami Jehová Diospaj achca valishca cashcataca manataj cungarina cangui. Shinallataj shujtajcuna Jehová Diospaj ñaupajpi achca valishca cashcata crichun paicunata ayudanatapish ama saquinguichu.