¿Shujtajcunataca mana allitachu juzgangui?

Maijancunaca shujtaj raza cajpi, shujtaj llajtamanta cajpi, shujtaj shimita parlajpi, shujtaj religionta charijpi, charij o pobre cajpi, cꞌari o huarmi cajpimi mana allita juzgancuna. Shujtajcunaca ima edadta charijta ricushpa, mashnata estudiashcata ricushpa, discapacitado cajta ricushpa o ñahuita ricushpallami mana allita juzgancuna. Chai gentecunaca chashna yuyashpapish tucuicunata igual tratashcatami yuyancuna.

¿Canpishchu chashna yuyangui? Shujtajcunata mana allita tratajta ricunaca jahuallami can. Pero ñucanchijpish chashna trataj cashcataca manachari cuentata cunchij. Tucuicunami maipica shujtajcunamanta mana allita yuyanchij. Sociólogo David Williams runaca: “Shuj grupo gentecunamanta mana allita yuyashpaca, qꞌuipata chai grupomanta shuj personahuan tupashpaca mana cuentata cushpami mana allita tratashun” ninmi.

Europa ladomanta Yovitsa shuti runapi yuyashun. Pai causan llajtapica shuj uchilla grupo gentecunami causan. Paica: “Chai grupomanta gentecunaca mana allicunami can nishpami yuyaj carcani. Shinapish mana allita juzgacushcataca mana yuyarcanichu. ‘Paicunaca chashnatajmi can’ nishpami yuyaj carcani” ninmi.

Achca gobiernocunami shujtaj raza cajcunata ama llaquichichun, tucuicunata igual tratachun leycunata churashca. Shinapish gentecunaca shujtajcunataca yangata shinami juzgashpa catincuna. ¿Imamanta? Chai leycunaca gentecuna imata rurashcata jarcangapajllami can. Pero shujtajcunata yangata shina ricunaca ñucanchij yuyaimanta, shungumantami llujshin. Chaitaca gobiernocunaca mana jarcai tucuncunachu. Shinashpaca, ¿gentecunaca shujtajcunata yangata shina tratanataca saquingacunachu?